3 ವರ್ಷಗಳ ಬಳಿಕ ಧ್ರುವ ಅಭಿಮಾನಿಗಳ ಸಂಭ್ರಮ

ಧ್ರುವ ಸರ್ಜಾ ಅವರ ಸಿನಿಮಾ ಬಾರದೇ ಮೂರು ವರ್ಷ ಆಗುತ್ತಾ ಬಂದಿದೆ. ಅಕ್ಟೋಬರ್‌ ಬಂದರೆ ಧ್ರುವ ನಟಿಸಿರುವ “ಬಹದ್ದೂರ್‌’ ಬಂದು ಬರೋಬ್ಬರಿ ಮೂರು ವರ್ಷ. ಆ ನಂತರ ಅವರ ಯಾವ ಸಿನಿಮಾನೂ ಬಂದಿಲ್ಲ. ಸಹಜವಾಗಿಯೇ ಅವರ ಅಭಿಮಾನಿಗಳು ಕಾಯುತ್ತಿದ್ದರು. ತಮ್ಮ ನೆಚ್ಚಿನ ನಟನ ಮೂರನೇ ಸಿನಿಮಾವನ್ನು ಯಾವಾಗ ಕಣ್ತುಂಬಿಕೊಳ್ಳುತ್ತೇವೋ ಎಂದು ಕಾಯುತ್ತಿದ್ದ ಧ್ರುವ ಸರ್ಜಾ ಅಭಿಮಾನಿಗಳು ಶುಕ್ರವಾರ (ನಿನ್ನೆ) “ಭರ್ಜರಿ’ ಸಿನಿಮಾಕ್ಕೆ ನುಗ್ಗಿ ಬಂದಿದ್ದಂತೂ ಸುಳ್ಳಲ್ಲ.

ಹಾಡು, ಟ್ರೇಲರ್‌ ಮೂಲಕ ನಿರೀಕ್ಷೆ ಹೆಚ್ಚಿಸಿದ್ದ ಸಿನಿಮಾವನ್ನು ಥಿಯೇಟರ್‌ನಲ್ಲೇ ಕಣ್ತುಂಬಿಕೊಳ್ಳಬೇಕೆಂಬ ಕಾರಣಕ್ಕೆ ಅಭಿಮಾನಿಗಳು ಥಿಯೇಟರ್‌ಗೆ ಬಂದಿದ್ದರು. ನರ್ತಕಿ ಹಾಗೂ ಸಂತೋಷ್‌ ಚಿತ್ರಮಂದಿರದ ಆವರಣದಲ್ಲಿ ಆ ತರಹದ ಒಂದು ಜನದಟ್ಟಣೆ ನೋಡದೇ ತುಂಬಾ ದಿನಗಳೇ ಆಗಿತ್ತು. ಆ ಮಟ್ಟಿಗೆ ಅಭಿಮಾನಿಗಳು “ಭರ್ಜರಿ’ಯತ್ತ ಹೆಜ್ಜೆ ಹಾಕಿದ್ದರು. ಕೇವಲ ಬಂದಿದ್ದಷ್ಟೇ ಅಲ್ಲ, ಅಭಿಮಾನಿಗಳು “ಭರ್ಜರಿ’ ಬಿಡುಗಡೆಯನ್ನು ತಮ್ಮದೇ ರೀತಿಯಲ್ಲಿ ಸಂಭ್ರಮಿಸಿದರು ಕೂಡಾ.

ಸುಮಾರು 300 ಲೀಟರ್‌ಗೂ ಅಧಿಕ ಹಾಲಿನಾಭಿಷೇಕ, 1 ಲಕ್ಷಕ್ಕೂ ಹೆಚ್ಚಿನ ಪಟಾಕಿ, ಹೀರೋ ಕಟೌಟ್‌ಗೆ 3 ಲಕ್ಷಕ್ಕೂ ಅಧಿಕ ವೆಚ್ಚದಲ್ಲಿ ಹಾರ, 100ಕ್ಕೂ ಹೆಚ್ಚು ಸ್ಟಾರ್‌ ಕಟ್ಟುವ ಮೂಲಕ ಅಭಿಮಾನ ಪ್ರದರ್ಶಿಸಿದರು. ಇಷ್ಟೇ ಅಲ್ಲದೇ, ಸಾಕಷ್ಟು ಮಂದಿಯಿಂದ ಥಿಯೇಟರ್‌ ಮುಂದೆ ಡೊಳ್ಳು ಕುಣಿತ ಕೂಡಾ ಆಯೋಜಿಸಲಾಗಿತ್ತು. ಈ ಮೂಲಕ ಮೂರು ವರ್ಷ ಬಳಿಕ ಅಭಿಮಾನಿಗಳ ಮುಂದೆ ಬಂದ ಧ್ರುವಗೆ ಅದ್ಭುತ ಪ್ರತಿಕ್ರಿಯೆ ಸಿಕ್ಕಿದೆ. 

ಇನ್ನು, ದಾವಣಗೆರೆ ಸೇರಿದಂತೆ ಅನೇಕ ಕಡೆ “ಭರ್ಜರಿ’ ಗುರುವಾರ ರಾತ್ರಿ ಹಾಗೂ ಶುಕ್ರವಾರ ಬೆಳಗ್ಗೆ 6 ಗಂಟೆಗೆ ಪ್ರದರ್ಶನ ಕಂಡಿತು.