ಸಿಂಗಾಪುರದಲ್ಲಿ ಕೋವಿಡ್‌ ಜತೆಗೆ ಡೆಂಗ್ಯೂಕಾಟ

ಸಿಂಗಾಪುರ: ಏರುತ್ತಿರುವ ಕೋವಿಡ್‌ ಸೋಂಕು ಪ್ರಮಾಣದಿಂದಾಗಿ ಸಿಂಗಾಪುರ ಏದುಸಿರು ಬಿಡುತ್ತಿರುವಂತೆಯೇ ಈಗ ಅಲ್ಲಿ ಡೆಂಗ್ಯೂ ಜ್ವರದ ಸಮಸ್ಯೆ ಉಲ್ಬಣಗೊಂಡಿದೆ. ಈ ಬಾರಿ ಸುಮಾರು 14 ಸಾವಿರ ಪ್ರಕರಣಗಳು ಕಾಣಿಸಿಕೊಂಡಿದ್ದು, ಕೋವಿಡ್‌ ಸೋಂಕಿತರ ಜತೆಗೆ ಅವರಿಗೂ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡುವುದು ಸಮಸ್ಯೆ ಸೃಷ್ಟಿಸಿದೆ. 2013ರಲ್ಲಿ ಇಲ್ಲಿ ಅತ್ಯಧಿಕ 22170 ಡೆಂಗ್ಯೂ ಪ್ರಕರಣಗಳು ಕಾಣಿಸಿಕೊಂಡಿದ್ದವು. ಇದು ಸಿಂಗಾಪುರ ಇತಿಹಾಸದಲ್ಲೇ ಅತ್ಯಧಿಕ ಪ್ರಕರಣಗಳಾಗಿತ್ತು.

ಸಿಂಗಾಪುರದಲ್ಲಿ ಡೆಂಗ್ಯೂ ಜ್ವರ ಹೆಚ್ಚಾಗಲು ಅಲ್ಲಿ ಲಾಕ್‌ಡೌನ್‌ ವಿಧಿಸಿದ್ದೂ ಒಂದು ಕಾರಣವಾಗಿರಬಹುದು ಎಂಬ ಅಭಿಪ್ರಾಯ ತಜ್ಞರದ್ದು. ಹೆಚ್ಚಿನವರು ಮನೆಯಲ್ಲೇ ಇರುವುದರಿಂದಾಗಿ ಸೊಳ್ಳೆ ಕಚ್ಚಿ ಸಮಸ್ಯೆಯಾಗಿರಬಹುದು ಎನ್ನಲಾಗಿದೆ.  ಎಪ್ರಿಲ್‌ ತಿಂಗಳಲ್ಲಿ ವಿದೇಶಿ ಕಾರ್ಮಿಕರಿರುವ ವಸತಿ ನಿಲಯಗಳಲ್ಲಿ ಕೋವಿಡ್‌ ಸೋಂಕು ಹರಡಿದ್ದು, ಇನ್ನೂ ಹರಡುತ್ತಿದೆ. ಇದರಿಂದ ನೂರರ ಒಳಗಿದ್ದ ದೇಶದ ಪ್ರಕರಣಗಳು ಸಾವಿರಕ್ಕೂ ಹೆಚ್ಚಾಗಿವೆ. ಇದೀಗ ಒಟ್ಟು 44,479 ಕೋವಿಡ್‌ ಪ್ರಕರಣಗಳು ಅಲ್ಲಿ ವರದಿಯಾಗಿವೆ.  ಶುಕ್ರವಾರ ಒಟ್ಟು 169 ಕೇಸುಗಳು ಪತ್ತೆಯಾಗಿವೆ. ಹೊಸದಾಗಿ ಸೋಂಕು ಬಾಧೆಗೊಳಗಾದವರು ವಿದೇಶಿ ಕಾರ್ಮಿಕರಾಗಿದ್ದಾರೆ. 11 ಪ್ರಕರಣಗಳು ಸಮುದಾಯದಲ್ಲಿ ಹಬ್ಬಿದ ಪ್ರಕರಣಗಳಾಗಿವೆ.