ದಿಲ್ಲಿ ಅಬಕಾರಿ ನೀತಿ ಆಪ್‌ ಸರಕಾರಕ್ಕೆ ಸಂಕಷ್ಟ

ಪ್ರಾಮಾಣಿಕತೆ ಮತ್ತು ಭ್ರಷ್ಟಾಚಾರ ರಹಿತ ಹೆಸರನ್ನು ಹೇಳಿಕೊಂಡು ಅಧಿಕಾರಕ್ಕೆ ಬಂದಿರುವ ದಿಲ್ಲಿ ಆಪ್‌ ಸರಕಾರಕ್ಕೀಗ ಹೊಸ ಅಬಕಾರಿ ನೀತಿಯ ಸಂಕಷ್ಟ ತಲೆದೋರಿದೆ. ಡಿಸಿಎಂ ಮನೀಶ್‌ ಸಿಸೋಡಿಯಾ ಅವರಿಗೂ ಈ ನೀತಿ ಸಂಕಟವಾಗಿದೆ. ಹಾಗಾದರೆ, ಏನಿದು ಹೊಸ ಅಬಕಾರಿ ನೀತಿ? ಈ ಬಗ್ಗೆ ಒಂದು ನೋಟ ಇಲ್ಲಿದೆ.

ಏನಿದು ಅಬಕಾರಿ ನೀತಿ?
ತಜ್ಞರ ಸಮಿತಿಯೊಂದು ನೀಡಿದ ವರದಿ ಪ್ರಕಾರ, ಕೇಜ್ರಿವಾಲ್‌ ಸರಕಾರ, 2021ರ ನವೆಂಬರ್‌ 17ರಂದು ಹೊಸ ಅಬಕಾರಿ ನೀತಿಯನ್ನು ಜಾರಿಗೆ ತಂದಿತ್ತು. ಅದರಂತೆ ಖಾಸಗಿ ಕಂಪೆನಿಗಳಿಗೆ ಓಪನ್‌ ಟೆಂಡರ್‌ ಮೂಲಕ 849 ಲಿಕ್ಕರ್‌ ವೆಂಡ್ಸ್‌ಗಳನ್ನು ನೀಡಲಾಗಿತ್ತು. ಅಲ್ಲದೆ, ದಿಲ್ಲಿ ನಗರವನ್ನು 32 ವಲಯಗಳಾಗಿ ವಿಂಗಡಿಸಿ, ಪ್ರತೀ ವಲಯಕ್ಕೆ 27 ಮಾರಾಟ ಮಳಿಗೆಗಳನ್ನು ನೀಡಲಾಗಿತ್ತು. ಈ ಪ್ರಕ್ರಿಯೆಯಲ್ಲಿ ಅಕ್ರಮಗಳಾಗಿವೆ ಎಂದು ಶಂಕೆಯಿಂದ ದಿಲ್ಲಿ ಲೆ| ಗವರ್ನರ್‌ ವಿಕೆ ಸಕ್ಸೇನಾ ಅವರು ಸಿಬಿಐ ತನಿಖೆಗೆ ಆದೇಶಿಸಿದ್ದರು. ವಿಚಿತ್ರವೆಂದರೆ, ಈಗ ಹೊಸ ನೀತಿಯಿಂದ ಲಾಭಕ್ಕಿಂತ ನಷ್ಟವೇ ಹೆಚ್ಚಾಗಿದೆ ಎಂದು ಹಳೇ ನೀತಿಯನ್ನೇ ಜಾರಿಗೆ ತರಲಾಗಿದೆ.

ಸೀಸೋಡಿಯಾ ವಿರುದ್ಧದ ಆರೋಪ ಏನು?
ಎಫ್ಐಆರ್‌ ನಲ್ಲಿ ದಾಖ­ ಲಿ­­ಸಿರು­ವಂತೆ ಮನೀಷ್‌ ಸಿಸೋ ಡಿಯಾ ಅವರ ಆಪ್ತರು, ಅಬಕಾರಿ ಪರವಾನ­ಗಿ­ಗಳನ್ನು ತಮಗೆ ಬೇಕಾದವರಿಗೆ ನೀಡಿದ್ದು, ಇವರಿಗೆ 4 ರಿಂದ 5 ಕೋಟಿ ರೂ.ಗಳಷ್ಟು ಹಣ ಸಂದಾಯ ಮಾಡಲಾ­ಗಿದೆ. ಡಿಸಿಎಂ ಸೇರಿದಂತೆ 15 ಮಂದಿ ವಿರುದ್ಧ ಎಫ್ಐಆರ್‌ ಹಾಕಲಾಗಿದೆ.

ಆಗಿರುವ ಅಕ್ರಮವೇನು?
ಸಿಬಿಐ ಪ್ರಕಾರ, ಅಬಕಾರಿ ನೀತಿ 2021-22 ಅನ್ನು ದಿಲ್ಲಿ ಸರಕಾರ ಸಂಬಂಧಿತರ ಒಪ್ಪಿಗೆ ಪಡೆಯದೆಯೇ ಜಾರಿ ಮಾಡಿದೆ. ಹಾಗೆಯೇ ಅಬಕಾರಿ ಪರವಾನಗಿ ವಿಚಾರದಲ್ಲಿ ಕೆಲವೊಬ್ಬರಿಗೆ ಅನುಕೂಲವಾಗುವಂತೆ ಮಾಡಲಾಗಿದೆ. ದಿಲ್ಲಿ ಡಿಸಿಎಂ ಮನೀಶ್‌ ಸಿಸೋಡಿಯಾ ಮತ್ತು ಇಂಡೋ ಸ್ಪಿರಿಟ್‌ನ ಮಾಲಕ ಸಮೀರ್‌ ಮಹೇಂದು ಅವರ ಆಪ್ತರಿಗೆ ಕೋಟಿಗಳ ಲೆಕ್ಕಾಚಾರದಲ್ಲಿ ಹಣ ಪಾವತಿ ಮಾಡಲಾಗಿದೆ. ಅಲ್ಲದೆ, ಈ ಸಮೀರ್‌ ಮಹೇಂದು ಅವರೇ ಹೊಸ ಅಬಕಾರಿ ನೀತಿಯ ಅಕ್ರಮದಲ್ಲಿ ಪ್ರಮುಖ ಆರೋಪಿಯಾಗಿದ್ದಾರೆ.