ಒಲಿಂಪಿಕ್‌ ಅರ್ಹತೆ ಪಡೆದ ಬಾಕ್ಸರ್‌ಗಳ ಅಭ್ಯಾಸ ಶಿಬಿರ ವಿಳಂಬ

ಹೊಸದಿಲ್ಲಿ: ಆಡಳಿತಾಧಿಕಾರಿಗಳ ಅನುಮತಿ ಲಭಿಸದ ಕಾರಣ ಒಲಿಂಪಿಕ್‌ ಅರ್ಹತೆ ಪಡೆದ ಭಾರತದ ಬಾಕ್ಸರ್‌ಗಳ ಅಭ್ಯಾಸ ಶಿಬಿರ ವಿಳಂಬವಾಗಿ ಆರಂಭವಾಗಲಿದೆ.

ಪುರುಷರ ಮತ್ತು ವನಿತೆಯರ ಶಿಬಿರಗಳೆರಡನ್ನೂ ಜೂ. 10ರಿಂದ ಪಟಿಯಾಲ ಹಾಗೂ ಹೊಸದಿಲ್ಲಿಯಲ್ಲಿ ಪ್ರಾರಂಭಿಸಲು ನಿರ್ಧರಿಸಲಾಗಿತ್ತು. ಆದರೆ ಇದೀಗ ಕನಿಷ್ಠ ಒಂದು ವಾರ ಮುಂದೂಡಲ್ಪಡಲಿದೆ.

“ನಾವು ಸಾಯ್‌ ಪ್ರತಿಕ್ರಿಯೆಯ ನಿರೀಕ್ಷೆಯಲ್ಲಿದ್ದೇವೆ. ಅವರು ಸರಕಾರದ ಅನುಮತಿಯನ್ನು ಕಾಯುತ್ತಿದ್ದಾರೆ. ಒಂದೆರಡು ದಿನಗಳಲ್ಲಿ ಚಿತ್ರಣ ಸ್ಪಷ್ಟವಾಗಲಿದೆ. ಹೀಗಾಗಿ ಜೂ. 10ರಿಂದ ಆರಂಭಿಸಬೇಕಿದ್ದ ಬಾಕ್ಸಿಂಗ್‌ ಅಭ್ಯಾಸ ಶಿಬಿರ ಕನಿಷ್ಠ ಒಂದು ವಾರದ ಮಟ್ಟಿಗೆ ಮುಂದೂಡಲ್ಪಡಲಿದೆ’ ಎಂದು ಭಾರತೀಯ ಬಾಕ್ಸಿಂಗ್‌ ಫೆಡರೇಶನ್‌ ಪ್ರಧಾನ ನಿರ್ದೇಶಕ ಆರ್‌.ಕೆ. ಸಚೇತಿ ಹೇಳಿದ್ದಾರೆ.

ಟೋಕಿಯೊ ಒಲಿಂಪಿಕ್‌ ಗೇಮ್ಸ್‌ಗೆ ಈಗಾಗಲೇ ಭಾರತದ 9 ಬಾಕ್ಸರ್‌ಗಳು ಅರ್ಹತೆ ಪಡೆದಿದ್ದಾರೆ. ಇವರೆಂದರೆ ಅಮಿತ್‌ ಪಂಘಲ್‌ (52 ಕೆಜಿ), ಮನೀಷ್‌ ಕೌಶಿಕ್‌ (63 ಕೆಜಿ), ವಿಕಾಸ್‌ ಕೃಷ್ಣನ್‌ (69 ಕೆಜಿ), ಆಶಿಷ್‌ ಕುಮಾರ್‌ (75 ಕೆಜಿ), ಸತೀಶ್‌ ಕುಮಾರ್‌ (+91 ಕೆಜಿ), ಎಂ.ಸಿ. ಮೇರಿ ಕೋಮ್‌ (51 ಕೆಜಿ), ಸಿಮ್ರನ್‌ಜಿತ್‌ ಕೌರ್‌ (60 ಕೆಜಿ), ಲವ್ಲಿನಾ ಬೊರ್ಗೊಹೈನ್‌ (69 ಕೆಜಿ), ಪೂಜಾ ರಾಣಿ (75 ಕೆಜಿ).