ವೀನಸ್‌ ವಿಲಿಯಮ್ಸ್‌ಗೆ ಸೋಲಿನ ಆಘಾತ

ಸ್ಯಾನ್‌ ಜೋಸ್‌ (ಕ್ಯಾಲಿಫೋರ್ನಿಯಾ): ಅಮೆರಿಕದ ವೀನಸ್‌ ವಿಲಿಯಮ್ಸ್‌ “ಸಿಲಿಕಾನ್‌ ವ್ಯಾಲಿ ಕ್ಲಾಸಿಕ್‌’ ಟೆನಿಸ್‌ ಕೂಟದ ಕ್ವಾರ್ಟರ್‌ ಫೈನಲ್‌ನಲ್ಲಿ ಸೋಲನುಭವಿಸಿ ಹೊರಬಿದ್ದಿದ್ದಾರೆ. ಅವರನ್ನು ಗ್ರೀಸ್‌ನ ಮರಿಯಾ ಸಕ್ಕರಿ 6-4, 7-6 (2) ಅಂತರದಿಂದ ಮಣಿಸಿದರು.

ಆರಂಭಿಕ ಸೆಟ್‌ನಲ್ಲಿ 3-0 ಮುಂದಿದ್ದರೂ ಇದನ್ನು ಕಾಯ್ದುಕೊಳ್ಳುವಲ್ಲಿ ವಿಫ‌ಲರಾದ ವೀನಸ್‌, ತನಗಿಂತ 15 ವರ್ಷ ಕಿರಿಯ ಆಟಗಾರ್ತಿಯ ಎದುರು ಒತ್ತಡಕ್ಕೊಳಗಾಗುತ್ತಲೇ ಹೋದರು. ಒಂದು ಗಂಟೆ, 43 ನಿಮಿಷಗಳ ಹೋರಾಟದ ಬಳಿಕ ವೀನಸ್‌ ಶರಣಾದರು.

ಮರಿಯಾ ಸಕ್ಕರಿ ಇನ್ನು ಅಮೆರಿಕದ ಮತ್ತೋರ್ವ ಆಟಗಾರ್ತಿ ಡೇನಿಯಲ್‌ ಕೊಲಿನ್ಸ್‌ ವಿರುದ್ಧ ಆಡಲಿದ್ದಾರೆ. ಪಂದ್ಯದ ಮಡುವೆ ವಿಕ್ಟೋರಿಯಾ ಅಜರೆಂಕಾ ಗಾಯಾಳಾದ್ದರಿಂದ ಕೊಲಿನ್ಸ್‌ ಮುನ್ನಡೆ ಸಾಧಿಸಿದರು. ಮೊದಲ ಸೆಟ್‌ ಅನ್ನು ಟೈ-ಬ್ರೇಕರ್‌ನಲ್ಲಿ ಜಯಿಸಿದ್ದ ಅಜರೆಂಕಾ, ದ್ವಿತೀಯ ಸೆಟ್‌ ವೇಳೆ 3-0 ಹಿನ್ನಡೆಯಲ್ಲಿದ್ದರು.

ಬ್ರಿಟನ್ನಿನ ಜೊಹಾನ್ನಾ ಕೊಂಟಾ ಅವರನ್ನು ಬೆಲ್ಜಿಯಂನ ಎಲಿಸ್‌ ಮೆರ್ಟೆನ್ಸ್‌ 7-6 (4), 6-3 ಅಂತರದಿಂದ ಹಿಮ್ಮೆಟ್ಟಿಸಿ ಸೆಮಿಫೈನಲ್‌ ತಲುಪಿದರು. ಇವರ ಎದುರಾಳಿ ರೊಮೇನಿಯಾದ ಮಿಹೇಲಾ ಬುಝರ್ನೆಸ್ಕಾ.