ದಶಕದ ಬಳಿಕ ಕನ್ನಡಿಗರಿಗೆ ದಕ್ಕಿದ ಬೆಳಗಾವಿ ಮೇಯರ್‌ ಹುದ್ದೆ 

ಬೆಳಗಾವಿ: ಎಂಇಎಸ್‌ ಪ್ರಾಬಲ್ಯ ಹೊಂದಿರುವ ಬೆಳಗಾವಿ ಮಹಾನಗರ ಪಾಲಿಕೆಯ ಮೇಯರ್‌ ಹುದ್ದೆ ದಶಕದ ಬಳಿಕ ಕನ್ನಡಿಗರ ಪಾಲಾಗಿದೆ. 

ಪರಿಶಿಷ್ಠ ಜಾತಿಗೆ ಮೀಸಲಾದ ಮೇಯರ್‌ ಹುದ್ದೆಗೆ ಕನ್ನಡಿಗ ಕಾಂಗ್ರೆಸ್‌ ಸದಸ್ಯ ಬಸಪ್ಪ ಚಿಕ್ಕಲದಿನ್ನಿ ಅವರು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. 58 ಸದಸ್ಯ ಬಲದ ಪಾಲಿಕೆಯಲ್ಲಿ 32 ಸದಸ್ಯ ಬಲದ ಹೊಂದಿದ್ದ ಎಂಇಎಸ್‌ ಬಳಿ ಎಸ್‌ಟಿ ಮೀಸಲಾತಿ ಹೊಂದಿದ ಸದಸ್ಯರಿಲ್ಲದ ಕಾರಣ ಕನ್ನಡಿಗರಿಗೆ ಮೇಲುಗೈ ಆಗಲು ಸಾಧ್ಯವಾಗಿದೆ. 

ಬಸಪ್ಪ ಚಿಕ್ಕಲದಿನ್ನಿ ಅವರು ಶಾಸಕ ಸತೀಶ್‌ ಜಾರಕಿಹೋಳಿ ಅವರ ಆಪ್ತರಾಗಿದ್ದಾರೆ. 5 ನೇ ಕನ್ನಡಿಗ ಮೇಯರ್‌ ಎಂಬ ಹೆಗ್ಗಳಿಕೆ ಬಸಪ್ಪ ಅವರದ್ದಾಗಿದೆ. 

ಕನ್ನಡಿಗ ಮೇಯರ್‌ ಆಯ್ಕೆಯಾದುದಕ್ಕೆ ಕನ್ನಡಿಗ ಸದಸ್ಯರು ಮತ್ತು ಕನ್ನಡ ಪರ ಸಂಘಟನೆಗಳ ಮುಖಂಡರು, ಕಾರ್ಯಕರ್ತರು ಸಂಭ್ರಮ ವ್ಯಕ್ತಪಡಿಸಿದ್ದಾರೆ. 

ಚುನಾವಣಾಧಿಕಾರಿ ಮೇಘಣ್ಣನವರ್‌ ಅವರು ಬಸಪ್ಪ  ಚಿಕ್ಕಲದಿನ್ನಿ ಅವರು ಆಯ್ಕೆಯಾಗಿರುವುದನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ. 

ಬಸಪ್ಪ ಅವರಿಗೆ ಕಾಂಗ್ರೆಸ್‌ನ ಇನ್ನೋರ್ವ ಎಸ್‌ಟಿ ಮೀಸಲಾತಿ ಹೊಂದಿದ್ದ ಸದಸ್ಯೆ ಸುಚೇತನಾ ತೀವ್ರ ಪೈಪೋಟಿ ನೀಡಿದ್ದರಾದರೂ ಅವಿರೋಧ ಆಯ್ಕೆ ಸಾಧ್ಯವಾಗಿದೆ.