ಆತಿಥೇಯ ಎಸ್‌ಎಂಎಸ್‌ಗೆ  ಕ್ರಿಕೆಟ್‌ ಪ್ರಶಸ್ತಿ

ಬ್ರಹ್ಮಾವರ: ಇಲ್ಲಿನ ಎಸ್‌.ಎಂ.ಎಸ್‌. ಕಾಲೇಜು ಮತ್ತು ಮಂಗಳೂರು ವಿ.ವಿ. ಜಂಟಿ ಆಶ್ರಯದಲ್ಲಿ ಎಸ್‌.ಎಂ.ಎಸ್‌. ಕ್ರೀಡಾಂಗಣದಲ್ಲಿ ಜರಗಿದ ಮಂಗಳೂರು ವಿ.ವಿ. ವ್ಯಾಪ್ತಿಯ ಅಂತರ್‌ ಕಾಲೇಜು ಮಹಿಳೆಯರ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಆತಿಥೇಯ ಎಸ್‌ಎಂಎಸ್‌ ಕಾಲೇಜು ತಂಡ ಚಾಂಪಿಯನ್‌ ಆಗಿದೆ. ತೆಂಕನಿಡಿಯೂರು ಜಿ. ಶಂಕರ್‌ ಸರಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜು ತಂಡ ದ್ವಿತೀಯ ಸ್ಥಾನ ಪಡೆಯಿತು.

ಮಂಗಳೂರು ವಿ.ವಿ. ಕ್ಯಾಂಪಸ್‌ ತಂಡ ತೃತೀಯ ಮತ್ತು ಉಜಿರೆಯ ಎಸ್‌ಡಿಎಂ ಕಾಲೇಜು ತಂಡ ಚತುರ್ಥ ಸ್ಥಾನ ಪಡೆದವು. ಎಸ್‌.ಎಂ.ಎಸ್‌.ನ ಸುಪ್ರಿಯಾ ಸರಣಿಶ್ರೇಷ್ಠ ಗೌರವಕ್ಕೆ ಪಾತ್ರರಾದರು. ಸಮಾರೋಪದಲ್ಲಿ  ಪ್ರಾಂಶುಪಾಲ ಪ್ರೊ| ಎಂ. ಶ್ರೀಪಾದ್‌, ಮಂಗಳೂರು ವಿ.ವಿ. ತಂಡದ ಮಾಜಿ ಆಟಗಾರ ಪ್ರದೀಪ್‌ ವಾಝ್, ಒಎಸ್‌ಸಿ ಎಜುಕೇಶನಲ್‌ ಸೊಸೈಟಿಯ ಕಾಲೇಜು ವಿಭಾಗದ ಕಾರ್ಯದರ್ಶಿ ಮಾರ್ಟನ್‌ ಡಿ’ಸೋಜಾ, ಕೋಶಾ ಧಿಕಾರಿ ನೊವೆಲ್‌ ಡಿ’ಸೋಜಾ, ದೈ.ಶಿ. ನಿರ್ದೇಶಕ ಡಾ| ಕಿಶೋರ್‌ ಕುಮಾರ್‌ ಸಿ.ಕೆ., ನಿವೃತ್ತ ಪ್ರಾಂಶುಪಾಲೆ ಸುಶೀಲಾ ಆರ್‌. ರೈ, ಕಾಲೇಜಿನ ದೈ.ಶಿ. ನಿರ್ದೇಶಕ ವೆಂಕಟೇಶ್‌ ಭಟ್‌ ಉಪಸ್ಥಿತರಿದ್ದರು.