Ranji trophy: ಕರ್ನಾಟಕ-ಬಂಗಾಲ ಸೆಣಸಾಟ

ಬೆಂಗಳೂರು: ರಣಜಿ ಟ್ರೋಫಿ ಕ್ರಿಕೆಟ್‌ ಪಂದ್ಯಾವಳಿಯ 4ನೇ ಹಂತದ ಸ್ಪರ್ಧೆಗಳು ಬುಧವಾರ ಆರಂಭವಾಗಲಿದ್ದು, ಬೆಂಗಳೂರಿನ “ಎಂ. ಚಿನ್ನಸ್ವಾಮಿ ಸ್ಟೇಡಿಯಂ’ಲ್ಲಿ ಎಲೈಟ್‌ ಗ್ರೂಪ್‌ “ಸಿ’ಯಿಂದ ಆತಿಥೇಯ ಕರ್ನಾಟಕ ಮತ್ತು ಪಶ್ಚಿಮ ಬಂಗಾಲ ತಂಡಗಳು ಕಣಕ್ಕಿಳಿಯಲಿವೆ. ಕ್ವಾರ್ಟರ್‌ ಫೈನಲ್‌ ಹಿನ್ನೆಲೆಯಲ್ಲಿ ಮಾಯಾಂಕ್‌ ಅಗರ್ವಾಲ್‌ ಪಡೆಗೆ ಗೆಲುವು ಅನಿವಾರ್ಯವಾಗಿದೆ.

ಆಡಿರುವ 3 ಪಂದ್ಯಗಳಲ್ಲಿ ಕರ್ನಾಟಕ ತಂಡ ಒಂದನ್ನು ಜಯಿಸಿದ್ದು, ಎರಡನ್ನು ಡ್ರಾ ಮಾಡಿಕೊಂಡಿದೆ. 8 ಅಂಕಗಳೊಂದಿಗೆ 3ನೇ ಸ್ಥಾನದಲ್ಲಿದೆ. ಪಶ್ಚಿಮ ಬಂಗಾಲ 5 ಅಂಕದೊಂದಿಗೆ 4ನೇ ಸ್ಥಾನದಲ್ಲಿದೆ. ಹೀಗಾಗಿ ಕ್ವಾರ್ಟರ್‌ ಫೈನಲ್‌ ಆಸೆ ಜೀವಂತವಾಗಿರಿಸಿಕೊಳ್ಳಲು ಎರಡೂ ತಂಡಗಳೂ ಗೆಲುವನ್ನು ಎದುರು ನೋಡುತ್ತಿವೆ. ಈ ಪಂದ್ಯ ಸೇರಿ ರಾಜ್ಯ ತಂಡಕ್ಕಿನ್ನು 4 ಪಂದ್ಯಗಳು ಬಾಕಿ ಉಳಿದಿವೆ. ಇದರಲ್ಲಿ ಕನಿಷ್ಠ 3ರಲ್ಲಿ ಗೆದ್ದರೆ, ಅದಕ್ಕೆ ಕ್ವಾರ್ಟರ್‌ ಫೈನಲ್‌ಗೆ ಪ್ರವೇಶಿಸುವ ಅವಕಾಶವಿದೆ.

ಹಿಂದಿನ ಪಂದ್ಯದಲ್ಲಿ ರಾಜ್ಯ ತಂಡ ಬಿಹಾರ ವಿರುದ್ಧ 8 ವಿಕೆಟ್‌ಗಳ ಜಯ ಗಳಿಸಿತ್ತು. ಕೇರಳ ವಿರುದ್ಧದ ಪಂದ್ಯವನ್ನು ಬಂಗಾಲ ಡ್ರಾ ಮಾಡಿಕೊಂಡಿತ್ತು. ಬಿಹಾರ ವಿರುದ್ಧ ನಾಯಕ ಮಾಯಾಂಕ್‌ ಅಗರ್ವಾಲ್‌ ಶತಕ, ಮನೀಷ್‌ ಪಾಂಡೆ ಅರ್ಧ ಶತಕ ಸಿಡಿಸಿ ತಂಡದ ಗೆಲುವಿಗೆ ನೆರವಾಗಿದ್ದರು. ಶ್ರೇಯಸ್‌ ಗೋಪಾಲ್‌ 8, ಮೊಹ್ಸಿನ್‌ ಖಾನ್‌ 4 ವಿಕೆಟ್‌ ಕೆಡವಿ ಗಮನ ಸೆಳೆದಿದ್ದರು.