ಮತ್ತೆ ಆಸ್ಪತ್ರೆಯಿಂದ ಪರಾರಿಯಾದ ಕೋವಿಡ್-19 ಪಾಸಿಟಿವ್ ಕಳ್ಳ

ಕಾರವಾರ: ಒಮ್ಮೆ ಪರಾರಿಯಾಗಿ ನಂತರ ಪತ್ತೆಯಾಗಿದ್ದ, ಕೊವಿಡ್ -19 ಸೋಂಕಿತ ಕಳ್ಳನೋರ್ವ ನಗರದ ವೈದ್ಯಕೀಯ ಕಾಲೇಜಿನ ಕೋವಿಡ್ ವಾರ್ಡಿನಿಂದ ಮತ್ತೊಮ್ಮೆ ಪರಾರಿಯಾಗಿದ್ದಾನೆ. ಈತನಿಗಾಗಿ ಹುಡುಕಾಟ ಆರಂಭವಾಗಿದೆ.

ಬೈಕ್ ಕಳ್ಳತನ ಪ್ರಕರಣಕ್ಕೆ ಸಂಬಂದಿಸಿದಂತೆ ಧಾರವಾಡದಲ್ಲಿ ಕಳ್ಳನೋರ್ವನನ್ನ ಬಂಧಿಸಿದ್ದರು. ಅನಾರೋಗ್ಯ ಹಿನ್ನಲೆಯಲ್ಲಿ ಆತನನ್ನ ಪರೀಕ್ಷೆ ನಡೆಸಿದಾಗ ಕೋವಿಡ್-19 ಸೋಂಕು ಇರುವುದು ದೃಢಪಟ್ಟಿತ್ತು. ಕಳ್ಳನನ್ನ ಕಾರವಾರ ವೈದ್ಯಕೀಯ ಕಾಲೇಜು ಕೋವಿಡ್ ವಾರ್ಡಿಗೆ ದಾಖಲು ಮಾಡಲಾಗಿತ್ತು.  ಸೋಮವಾರ ವಾರ್ಡ್ ನಲ್ಲಿದ್ದ ಈತ, ಇಬ್ಬರ ಮೊಬೈಲ್ ಕದ್ದು ಪರಾರಿಯಾಗಿದ್ದ . ನಂತರ ಮಂಗಳವಾರ ಕಳ್ಳನನ್ನ ತಾಲೂಕಿನ ಕದ್ರಾ ಬಳಿ ಬಂಧಿಸಿ ಮತ್ತೆ ಆಸ್ಪತ್ರೆಗೆ ತಂದಿದ್ದರು.

ನಿನ್ನೆ ರಾತ್ರಿ ವೇಳೆ ಕೋವಿಡ್ ಪಾಸಿಟಿವ್ ಕಳ್ಳ ಮತ್ತೆ ಪೈಬರ್ ಬಾಗಿಲು ಮುರಿದು ವಾರ್ಡಿನಿಂದ ತಪ್ಪಿಸಿಕೊಂಡಿದ್ದಾನೆ.  ರಾತ್ರಿಯಿಂದ ತಪ್ಪಿಸಿಕೊಂಡವನ ಹುಡುಕಾಟಕ್ಕೆ ಪೊಲೀಸರು ನಿರಂತರ ಪ್ರಯತ್ನ ನಡೆಸಿದ್ದಾರೆ.

ಕಳ್ಳನಿಗೆ ಕೋವಿಡ್-19 ಇರುವ ಹಿನ್ನಲೆಯಲ್ಲಿ ಆತ ಮತ್ತೆ ಯಾರ ಸಂಪರ್ಕಕ್ಕೆ ಬರಬಹುದು, ಯಾರನ್ನು ಮುಟ್ಟಬಹುದು ಎಂಬ ಅನುಮಾನ ವ್ಯಕ್ತವಾಗಿದೆ.  ಕಾರವಾರದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿದೆ. ಪೊಲೀಸರು ಕೋವಿಡ್ ಪಾಸಿಟಿವ್ ಕಳ್ಳನನ್ನು ಮುಟ್ಟಲು ಹೆದರಿದ‌ ಕಾರಣ‌ ಅವನು ಮತ್ತೊಮ್ಮೆ ತಪ್ಪಿಸಿಕೊಂಡನೇ ಎಂಬ ಶಂಕೆ ವ್ಯಕ್ತವಾಗಿದೆ.