ಕೊವಾಕ್ಸಿನ್‌ ಪ್ರಯೋಗ ಶೀಘ್ರವೇ ಪ್ರಾರಂಭ : 2 ಹಂತಗಳಲ್ಲಿ ಸಾವಿರಕ್ಕೂ ಅಧಿಕ ಮಂದಿಗೆ ನೀಡಿಕೆ

ಹೊಸದಿಲ್ಲಿ: ದೇಶದ ಮೊದಲ ಕೋವಿಡ್ ವೈರಸ್‌ ಲಸಿಕೆ ಅಭಿವೃದ್ಧಿ ಪ್ರಕ್ರಿಯೆ ವೇಗ ಪಡೆ­ದಿದ್ದು, ಸದ್ಯದಲ್ಲೇ ಮಾನವನ ಮೇಲೆ ಕೊವ್ಯಾ­ಕ್ಸಿನ್‌ ಲಸಿಕೆಯ ಪ್ರಯೋಗ ಆರಂಭವಾಗಲಿದೆ. ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ(ಐಸಿಎಂಆರ್‌), ಖಾಸಗಿ ಫಾರ್ಮಾ ಕಂಪೆನಿಯಾದ ಭಾರತ್‌ ಬಯೋಟೆಕ್‌ ಇಂಡಿಯಾ ಲಿಮಿಟೆಡ್‌ ಮತ್ತು ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಆಫ್ ವೈರಾಲಜಿ (ಎನ್‌ಐವಿ) ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಲಸಿಕೆ­ಯನ್ನು ಎರಡು ಹಂತಗಳಲ್ಲಿ ಸಾವಿರಕ್ಕೂ ಅಧಿಕ ಮಂದಿಯ ಮೇಲೆ ಪ್ರಯೋಗಿಸಲಾಗುತ್ತದೆ. ಮೊದಲ ಹಂತದಲ್ಲಿ 375 ಮಂದಿಯ ಮೇಲೆ ಮತ್ತು 2ನೇ ಹಂತದಲ್ಲಿ 750 ಮಂದಿಯ ಮೇಲೆ ಲಸಿಕೆಯ ಪ್ರಯೋಗ ನಡೆಯಲಿದೆ. ಈಗಾಗಲೇ ಭಾರತೀಯ ಔಷಧ ನಿಯಂತ್ರಣ ನಿರ್ದೇಶನಾಲಯ(ಡಿಜಿಸಿಐ)ವು ಮೊದಲ 2 ಹಂತದ ಪ್ರಯೋಗಕ್ಕೆ ಅನುಮತಿ ನೀಡಿದೆ. ಕರ್ನಾಟಕದ ಬೆಳಗಾವಿಯ ಜೀವನ್‌ರೇಖಾ ಆಸ್ಪತ್ರೆ ಸೇರಿದಂತೆ 12 ಸಂಸ್ಥೆಗಳಲ್ಲಿ ಕ್ಲಿನಿಕಲ್‌ ಟ್ರಯಲ್‌ ನಡೆಯಲಿದೆ.

3ನೇ ಹಂತಕ್ಕೆ 3 ಲಸಿಕೆಗಳು: ವಿಶ್ವ ಆರೋಗ್ಯ ಸಂಸ್ಥೆಯ ಮಾಹಿತಿ ಪ್ರಕಾರ, ಜಗತ್ತಿನಾದ್ಯಂತ ಒಟ್ಟು 19 ಲಸಿಕೆಗಳ ಅಭಿವೃದ್ಧಿ ಪ್ರಕ್ರಿಯೆ ನಡೆಯುತ್ತಿದೆ. ಈ ಪೈಕಿ ಆಸ್ಟ್ರಾಝೆನೆಕಾ ಮತ್ತು ಸಿನೋವಾಕೇರ್‌ ಎಂಬ ಎರಡು ಲಸಿಕೆಗಳು ಮಾನವನ ಮೇಲಿನ ಪ್ರಯೋಗದ ಮೂರನೇ ಹಂತ ತಲುಪಿವೆ. ಈಗ ಚೀನದ ಸಿನೋವ್ಯಾಕ್‌ ಬಯೋಟೆಕ್‌ ಕಂಪನಿ ಕೂಡ ಈ ಸಾಧನೆ ಮಾಡಿದ್ದು, ತನ್ನ ಲಸಿಕೆಯನ್ನು ಕೊನೆಯ ಹಂತದ ಪ್ರಯೋಗಕ್ಕೆ ಒಳಪಡಿಸುವ ಪ್ರಕ್ರಿಯೆ ಆರಂಭಿಸಿದೆ. ಇನ್ನು, ಪಿಫಿಜರ್‌, ನೋವಾ­ವ್ಯಾಕ್ಸ್‌, ಕ್ಯಾಡಿಲಾ ಹೆಲ್ತ್‌ಕೇರ್‌ ಸೇರಿದಂತೆ 6 ಸಂಸ್ಥೆಗಳು ಲಸಿಕೆಯ 2ನೇ ಹಂತದ ಪ್ರಯೋಗ ನಡೆಸುತ್ತಿವೆ.

24 ಗಂಟೆಯಲ್ಲಿ 22,252 ಹೊಸ ಕೇಸು
ಹೊಸದಿಲ್ಲಿ: ದೇಶದಲ್ಲಿ ಕೊರೊನಾ ಅಟ್ಟಹಾಸ ಮುಂದುವರಿದಿದ್ದು, ಸೋಮವಾರ­ದಿಂದ ಮಂಗಳವಾರದವರೆಗಿನ 24 ಗಂಟೆಗಳ ಅವಧಿಯಲ್ಲಿ 22,252 ಹೊಸ ಪ್ರಕರಣಗಳು ಪತ್ತೆಯಾಗಿವೆ. ಈ ಮೂಲಕ ಸತತ 5ನೇ ದಿನವೂ 20 ಸಾವಿರಕ್ಕಿಂತ ಹೆಚ್ಚು ಮಂದಿಗೆ ಸೋಂಕು ದೃಢಪಟ್ಟಂತಾಗಿದೆ. ಜತೆಗೆ, ಒಂದೇ ದಿನ 467 ಮಂದಿ ಬಲಿಯಾಗಿ, ಮೃತರ ಸಂಖ್ಯೆ 20 ಸಾವಿರದ ಗಡಿ ದಾಟಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ. ಒಟ್ಟಿನಲ್ಲಿ ಭಾರತ­ದಲ್ಲಿ ಒಂದು ಲಕ್ಷ ಸೋಂಕಿ­ತರು ಪತ್ತೆಯಾ­ಗಲು 110 ದಿನಗಳು ತೆಗೆದು­ಕೊಂಡರೆ, ಕೇವಲ 49 ದಿನಗಳಲ್ಲಿ ಈ ಸಂಖ್ಯೆ 7 ಲಕ್ಷ ದಾಟಿದೆ. ಇದೇ ವೇಳೆ, 4.39 ಲಕ್ಷ ಮಂದಿ ಗುಣಮುಖರಾಗಿದ್ದು, ಗುಣ­ಮುಖ ಪ್ರಮಾಣ ಶೇ.61.13ಕ್ಕೇರಿಕೆ­ಯಾಗಿದೆ.