ಕೆಂಪು ತೋಟದೊಳಗೆ ಹಾರಲಿವೆ ಕಲರ್‌ಫ‌ುಲ್‌ ಚಿಟ್ಟೆಗಳು

ಬೆಂಗಳೂರು: ಸಸ್ಯಕಾಶಿ ಲಾಲ್‌ಬಾಗ್‌ ಅಂದವನ್ನು ಮತ್ತಷ್ಟು ಹೆಚ್ಚಿಸಲೆಂದು ಇನ್ನು ಕೆಲವೇ ದಿನಗಳಲ್ಲಿ ಹಾರುವ ಅತಿಥಿಗಳ ಆಗಮಿಸಲಿದ್ದಾರೆ. ಕೇವಲ ಹೂ, ಗಿಡ, ಮರಗಳ ಹಚ್ಚ ಹಸಿರಿನಿಂದ ತುಂಬಿದ್ದ ಲಾಲ್‌ಬಾಗ್‌ ಅಪರೂಪದ ಅತಿಥಿಗಳ ಆಗಮನದಿಂದ ವಿವಿಧ ಬಣ್ಣಗಳಲ್ಲಿ ಕಂಗೊಳಿಸಿ ಮನಸ್ಸಿಗೆ ಇನ್ನಷ್ಟು ಮುದ ನೀಡಲಿದೆ.

ಚಿಟ್ಟೆಗಳ ಉದ್ಯಾನವವವನ್ನು ಲಾಲ್‌ಬಾಗ್‌ನಲ್ಲಿ ನಿರ್ಮಾಣ ಮಾಡಲು ತೋಟಗಾರಿಕೆ ಇಲಾಖೆ ತೀರ್ಮಾನಿಸಿದ್ದು ಈ ಮೂಲಕ ಲಾಲ್‌ಬಾಗ್‌ನ ಸೌಂದರ್ಯ ಹೆಚ್ಚಿಸುವ ಜತೆಗೆ ಸುಮಾರು ವರ್ಷಗಳಿಂದ ಬಳಸದೇ ಖಾಲಿ ಉಳಿದಿದ್ದ ಜಾಗದ ಬಳಕೆಗೆ ಇಲಾಖೆ ಮುಂದಾಗಿದೆ.

ಲಾಲ್‌ಬಾಗ್‌ನ ಸಿದ್ದಾಪುರ ಗೇಟ್‌ ಬಳಿ ಸುಮಾರು 10 ಎಕರೆ ವಿಸ್ತೀರ್ಣದ ಜಾಗವು ಬಳಕೆಯಾಗದೇ ಖಾಲಿ ಬಿದ್ದಿದೆ. ಹಿಂದೊಮ್ಮೆ ಈ ಜಾಗದಲ್ಲಿ ಪಾರ್ಕಿಂಗ್‌ ವ್ಯವಸ್ಥೆ ಕಲ್ಪಿಸಲು ಇಲಾಖೆ ತೀರ್ಮಾನಿಸಿತ್ತು. ಆದರೆ ವಾಯುವಿಹಾರಿಗಳ ಹಾಗೂ ಪರಿಸರ ಪ್ರಿಯರ ವಿರೋಧದಿಂದ ಆ ಯೋಚನೆ ಇಲಾಖೆ ಕೈಬಿಡಲಾಗಿತ್ತು. 

ಹೀಗಾಗಿ, ಆ ಜಾಗವನ್ನು ಬಳಕೆ ಮಾಡುವ ಉದ್ದೇಶದಿಂದ 2 ಎಕರೆ ಜಾಗದಲ್ಲಿ ಚಿಟ್ಟೆ ಉದ್ಯಾನವನ ನಿರ್ಮಾಣಕ್ಕೆ ಇಲಾಖೆ ಮುಂದಾಗಿದೆ. ಇದರಿಂದಾಗಿ  ಲಾಲ್‌ಬಾಗ್‌ ಚಿಟ್ಟೆಗಳ ಆಗಮನದಿಂದ ರಂಗು ಪಡೆಯಲಿದೆ . ಇನ್ನುಳಿದ 8 ಎಕರೆ ಜಾಗದಲ್ಲಿ ತಲಾ ಎರಡೆರಡು ಎಕರೆ ಪಶ್ಚಿಮಘಟ್ಟದ ವಿಶಿಷ್ಟ ಸಸಿಗಳು, ಅಳಿವಿನ ಅಂಚಿನಲ್ಲಿರುವ ಸಸಿಗಳು, ಕಾಡು ಹಣ್ಣಿನ ಸಸಿಗಳು, ಜೀವ ವೈವಿಧ್ಯ (ಟ್ಯಾಕ್ಸಾನಮಿ) ಸಸ್ಯಗಳನ್ನು ಹಾಕಲು ನಿರ್ಧರಿಸಲಾಗಿದೆ.    

ಕರ್ನಾಟಕದಲ್ಲಿ ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನ, ಮೈಸೂರಿನ ಕಾರಂಜಿ ಕೆರೆ ಹಾಗೂ ಮಂಗಳೂರು ಬಳಿಯ ಬೆಳವಾಯಿ ಖಾಸಗಿ ಒಡೆತನದ ಪಾರ್ಕ್‌ ಒಂದರಲ್ಲಿ ಮಾತ್ರವೇ ಚಿಟ್ಟೆ ಉದ್ಯಾನವನ ಇದ್ದು, ಈಗ ಬೆಂಗಳೂರಿನಲ್ಲಿ ನಿರ್ಮಾಣ ಆಗುತ್ತಿರುವುದು ಪರಿಸರವಾದಿಗಳಲ್ಲಿ ಸಂತಸ ತಂದಿದೆ. ಅಂದಹಾಗೆ ಇಲ್ಲಿ ಚಿಟ್ಟೆ ಉದ್ಯಾನವನ ನಿರ್ಮಾಣವಾಗುವುದರಿಂದ ಅಳಿವಿನ ಅಂಚಿನಲ್ಲಿರುವ ಚಿಟ್ಟೆ ಸಂಕುಲವನ್ನು ಉಳಿಸುವುದರ ಜತೆಗೆ ಸಸ್ಯ ಸಂಕುಲದ ಪರಾಗ ಸ್ಪರ್ಶಕ್ಕೂ ಸಹಾಯವಾಗಲಿದೆ.

ಪರಿಸರ ಸಮೃದ್ಧಿ: ಚಿಟ್ಟೆಗಳು ಅತ್ಯಂತ ಸೂಕ್ಷ್ಮ ಜೀವಿಗಳಾಗಿದು, ಅವುಗಳು ನಗರಪ್ರದೇಶದ ಮಾಲಿನ್ಯ ಪರಿಸರದಲ್ಲಿ ವಾಸಿಸುವುದಿಲ್ಲ. ಸಮೃದ್ಧತೆಯಿಂದ ಕೂಡಿರುವ ಸಮ ಹವಾಗುಣ ಹಾಗೂ ವಾತಾವರಣವಿರಬೇಕು. ಇನ್ನು ಲಾಲ್‌ಬಾಗ್‌ನಲ್ಲಿ ಇಂತಹ ಚಿಟ್ಟೆಗಳಿಗಾಗಿಯೇ ಉದ್ಯಾನ ಸೃಷ್ಟಿಸುವುದರಿಂದ ಉತ್ತಮ ಹಾಗೂ ಸಮೃದ್ಧ ವಾತಾವರಣ ಇರಲಿದೆ. ಅಲ್ಲದೇ ಬೆಂಗಳೂರಿನ ಪರಿಸರದ ಶ್ರೀಮಂತಿಕೆಯನ್ನು ಎತ್ತಿಹಿಡಿಯಲು ಸಾಧ್ಯವಾಗುತ್ತದೆ ಎನ್ನುತ್ತಾರೆ ಪರಿಸರ ತಜ್ಞರು.

ಪಾರ್ಕ್‌ ನಿರ್ಮಾಣಕ್ಕೆ ವರ್ಷ ಬೇಕು: ಚಿಟ್ಟೆಗಳ ಪಾರ್ಕ್‌ ನಿರ್ಮಾಣ ಸಾಮಾನ್ಯ ಪಾರ್ಕ್‌ಗಳ ನಿರ್ಮಾಣದಂತಲ್ಲ. ಚಿಟ್ಟೆಗಳಲ್ಲಿ 300ಕ್ಕೂ ಹೆಚ್ಚು ಪ್ರಭೇದಗಳಿದ್ದು, ಅವುಗಳಲ್ಲಿ ಈ ಭಾಗದ ಚಿಟ್ಟೆಗಳ ಅಧ್ಯಯನ ಮಾಡಿ ಅವು ಆಕರ್ಷಿತವಾಗುವ ಗಿಡಗಳ ಬಗ್ಗೆ ತಿಳಿದು ಆ ಗಿಡಗಳನ್ನು ಬೆಳಸಬೇಕು.

ಜತೆಗೆ ಸಂತಾನೋತ್ಪತ್ತಿ ಪ್ರಕ್ರಿಯೆ ಆನಂತರ ಲಾರ್ವ ಸ್ಥಿತಿಯಿಂದ ಕೋಶ ನಿರ್ಮಾಣವಾಗಿ ಚಿಟ್ಟೆಯಾಗಲು ಅಗತ್ಯವಿರುವ ಗಿಡಬೆಳಸಬೇಕು. ಇನ್ನು ಆರಂಭದಲ್ಲಿ ಬರುವ ಚಿಟ್ಟೆಗಳಿಗೆ ಸಂತಾನೋತ್ಪತ್ತಿಗೆ ಯಾವುದೇ ಅಡಚಣೆಯಾಗದಂತದೆ ನೋಡಿಕೊಳ್ಳಬೇಕು.

ಆಗ ಮಾತ್ರವೇ ಚಿಟ್ಟೆಗಳ ಸಂಖ್ಯೆ ಹೆಚ್ಚಾಗುವ ಜತೆಗೆ ನಿರಂತರವಾಗಿ ಚಿಟ್ಟೆಗಳು ಹಾರಿ ಬರುತ್ತವೆ. ಮುಂದಿನ ದಿನಗಳಲ್ಲಿ ಈ ಸ್ಥಳಕ್ಕೆ ಹೊಂದಿಕೆಯಾದ ಮೇಲೆ ಚಿಟ್ಟೆ ಉದ್ಯಾನವನ ಪ್ರಕ್ರಿಯೆ ಪೂರ್ಣವಾಗುತ್ತದೆ ಇದಕ್ಕೆ ಸುಮಾರು 1 ವರ್ಷವಾದರೂ ಸಮಯಬೇಕು ಎನ್ನುತ್ತಾರೆ ಮಂಗಳೂರಿನ ಖಾಸಗಿ ಬಟರ್‌ಪ್ಲೆ„ಪಾರ್ಕ್‌ ಮಾಲೀಕ ಸಮ್ಮಿಲನ್‌ ಶೆಟ್ಟಿ.   

ಸಿದ್ದಾಪುರ ಗೇಟ್‌ಬಳಿಯ ಖಾಲಿ ಜಾಗವನ್ನು ಬಳಸಿಕೊಳ್ಳುವ ಉದ್ದೇಶದಿಂದ ಚಿಟ್ಟೆ ಪಾರ್ಕ್‌ ಯೋಜನೆ ರೂಪಿಸಲಾಗಿದೆ. ಈ ಕುರಿತು ತಜ್ಞರ ಜತೆಗೆ ಸೇರಿ ಚರ್ಚಿಸಲಾಗುತ್ತಿದ್ದು, ಮುಂದಿನ ತಿಂಗಳೊಳಗೆ ಕಾಮಗಾರಿ ಆರಂಭಿಸಲಾಗುವುದು. ಲಾಲ್‌ಬಾಗ್‌ನಲ್ಲಿ ಅಗತ್ಯ ಸೌಲಭ್ಯಗಳಿರುವುದರಿಂದ ಈ ಕಾಮಗಾರಿಗೆ ದೊಡ್ಡ ಪ್ರಮಾಣದ ಖರ್ಚು ಬರುವುದಿಲ್ಲ.
ಎಂ.ಆರ್‌. ಚಂದ್ರಶೇಖರ್‌, ಉಪನಿರ್ದೇಶಕರು ತೋಟಗಾರಿಕಾ ಇಲಾಖೆ

* ಜಯಪ್ರಕಾಶ್‌ ಬಿರಾದಾರ್‌