ಲಕ್ನೋ : ಉತ್ತರ ಪ್ರದೇಶದ ಲಕ್ನೋದ ಚಿನಾಟ್‌ ಪ್ರದೇಶದಲ್ಲಿರುವ ರಜತ್‌ ಪಿಜಿ ಕಾಲೇಜಿನ ತರಗತಿಯೊಂದರಲ್ಲಿ ವಿದ್ಯಾರ್ಥಿಗಳ ಗುಂಪು ಪರಸ್ಪರ ಹೊಡೆದಾಡುತ್ತಿದ್ದುದನ್ನು ಕಂಡ ಕಾಲೇಜಿನ ಪ್ರಾಂಶುಪಾಲೆ ವಿದ್ಯಾರ್ಥಿಗಳಿಗೆ ಹಾಕಿ ಸ್ಟಿಕ್‌ ರುಚಿ ತೋರಿಸಿದ ಘಟನೆ ನಡೆದಿದೆ. ಕೆಲವು ವಿದ್ಯಾರ್ಥಿಗಳು ಇದನ್ನು ವಿಡಿಯೋ ಮಾಡಿಕೊಂಡು ಸಾಮಾಜಿಕ ಜಾಲ ತಾಣಗಳಿಗೆ ಅಪ್‌ಲೋಡ್‌ ಮಾಡಿದ್ದು ಅದು ಏಕ್‌ದಂ ವೈರಲ್ ಆಗಿದೆ.
ವಿದ್ಯಾರ್ಥಿಗಳ ಈ ಕೃತ್ಯಕ್ಕೆ ಪ್ರತಿಯಾಗಿ ಕಾಲೇಜಿನ ಆಡಳಿತ ಮಂಡಳಿಯು ತರಗತಿ ಕೋಣೆಯಲ್ಲಿ ವಿದ್ಯಾರ್ಥಿಗಳ ಗುಂಪು ಹೊಡೆದಾಡಿಕೊಳ್ಳುತ್ತಿದ್ದ ಸಿಸಿಟಿವಿ ವಿಡಿಯೋವನ್ನು ಇಂಟರ್‌ನೆಟ್‌ಗೆ ಹಾಕಿದೆ.
ತರಗತಿಯಲ್ಲಿ ವಿದ್ಯಾರ್ಥಿಗಳು ಪರಸ್ಪರ ಹೊಡೆದಾಡಿಕೊಳ್ಳುತ್ತಿದ್ದುದನ್ನು ಮೊದಲಾಗಿ ಕಂಡ ಕಾಲೇಜಿನ ಸಿಬಂದಿಗಳು ಕೂಡಲೇ ವಿಷಯವನ್ನು ಪ್ರಾಂಶುಪಾಲೆ ಪುಷ್ಪಲತಾ ಸಿಂಗ್‌ ಅವರಿಗೆ ತಿಳಿಸಿದರು.
ಪುಷ್ಪಲತಾ ಅವರು ಒಡನೆಯೇ ತರಗತಿಗೆ ಧಾವಿಸಿ ಬಂದು ಹೊಡೆದಾಟದಲ್ಲಿ ನಿರತರಾಗಿದ್ದ ಕೆಲವು ವಿದ್ಯಾರ್ಥಿಗಳಿಗೆ ಕಪಾಳಮೋಕ್ಷ ಮಾಡಿದರು. ಬಳಿಕ ಹಾಕಿ ಸ್ಟಿಕ್‌ ತಂದುಕೊಡುವಂತೆ ಸಿಬಂದಿಗಳನ್ನು ಕೇಳಿಕೊಂಡರು. ಹಾಕಿ ಸ್ಟಿಕ್‌ ಕೈಗೆ ಬಂದೊಡನೆಯೇ ಆಕೆ ವಿದ್ಯಾರ್ಥಿಗಳನ್ನು ಚೆನ್ನಾಗಿ ಥಳಿಸಿದರು. ಇದನ್ನು ವಿಡಿಯೋ ಮಾಡಿಕೊಂಡು ಯಾರೋ ಕೆಲವು ಹುಡುಗರು ಅದನ್ನು ಸಾಮಾಜಿಕ ಮಾಧ್ಯಮಗಳಿಗೆ ಅಪ್‌ಲೋಡ್‌ ಮಾಡಿದರು. ಒಡನೆಯೇ ಅದು ವೈರಲ್ ಆಯಿತು ಎಂದು ವರದಿಗಳು ತಿಳಿಸಿವೆ.
