Chennai Super Kings; ಧೋನಿ ಅನ್‌ಕ್ಯಾಪ್ಡ್  ಆಟಗಾರ?

ಮುಂಬಯಿ: ಎಂ.ಎಸ್‌. ಧೋನಿ ಅವರನ್ನು ಅನ್‌ಕ್ಯಾಪ್ಡ್ ಆಟಗಾರನಾಗಿ ಉಳಿಸಿ ಕೊಳ್ಳಲು ಚೆನ್ನೈ ಸೂಪರ್‌ ಕಿಂಗ್ಸ್‌ ಯೋಚಿಸಿ ದೆಯೇ? ಹೌದು ಎನ್ನುತ್ತಿವೆ ಮೂಲಗಳು. ಈ ಕುರಿತು ಇತ್ತೀಚೆಗಿನ ಸಭೆಯಲ್ಲಿ ಬಿಸಿಸಿಐಗೆ ಚೆನ್ನೈ ಮನವಿ ಸಲ್ಲಿಸಿದ್ದು, ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿ 5 ವರ್ಷ ಮುಗಿದ ಆಟಗಾರರನ್ನು ಅನ್‌ಕ್ಯಾಪ್ಡ್ ಆಟಗಾರನಾಗಿ ಉಳಿಸಿಕೊಳ್ಳುವ ಹಳೆಯ ನಿಯಮ ಮರು ಜಾರಿ ಮಾಡುವಂತೆ ಮನವಿ ಮಾಡಿದೆ ಎನ್ನಲಾಗಿದೆ.

ಐಪಿಎಲ್‌ ಆರಂಭದಿಂದ 2021ರ ವರೆಗೆ, ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿಯಾಗಿ 5 ವರ್ಷವಾದ ಆಟಗಾರರನ್ನು ಅನ್‌ಕ್ಯಾಪ್ಡ್ ಪಟ್ಟಿಗೆ ಸೇರಿಸುವ ನಿಯಮವೊಂದು ಚಾಲ್ತಿಯಲ್ಲಿತ್ತು. ಅನಂತರ ಅದು ರದ್ದಾಗಿತ್ತು. 2025ರ ಹರಾಜಿನಲ್ಲಿ ಧೋನಿ ಅವರನ್ನು ಅನ್‌ಕ್ಯಾಪ್ಡ್ ಆಟಗಾರನಾಗಿ ಉಳಿಸಿಕೊಂಡರೆ, ತಂಡದಲ್ಲಿರುವ ಕ್ಯಾಪ್ಡ್ ಆಟಗಾರರನ್ನು ಗರಿಷ್ಠ ಪ್ರಮಾಣದಲ್ಲಿ ಉಳಿಸಿಕೊಳ್ಳಲು ಸಾಧ್ಯ. ಜತೆಗೆ ಕಡಿಮೆ ಮೊತ್ತಕ್ಕೆ ಧೋನಿಯನ್ನು ಉಳಿಸಿಕೊಳ್ಳಬಹುದು ಎಂಬ ಲೆಕ್ಕಾಚಾರವಿದೆ ಎನ್ನಲಾಗಿದೆ.