ಹಿಂದಿ ಹೇರಿಕೆಯತ್ತ ಕೇಂದ್ರದ ಮತ್ತೂಂದು ಹೆಜ್ಜೆ

ಹೊಸದಿಲ್ಲಿ: ಇತ್ತೀಚೆಗೆ ಹಲವು ಕ್ರಮಗಳ ಮೂಲಕ “ಹಿಂದಿ ಹೇರಿಕೆ’ಯ ಆರೋಪಕ್ಕೆ ಗುರಿಯಾಗಿದ್ದ ಕೇಂದ್ರ ಸರಕಾರ, ಇದೀಗ ಮತ್ತೆ ಸದ್ದಿಲ್ಲದೇ ತನ್ನ ಇರಾದೆಯನ್ನು ಪೂರೈಸುವತ್ತ ಹೊರಟಿದೆ. ಮುಂದಿನ ಶೈಕ್ಷಣಿಕ ವರ್ಷದಿಂದ ತ್ರಿಭಾಷಾ ಸೂತ್ರದ ಅಡಿಯಲ್ಲಿ ಜರ್ಮನ್‌, ಫ್ರೆಂಚ್‌ನಂತಹ ವಿದೇಶಿ ಭಾಷೆಗಳು ಇರು ವಂತಿಲ್ಲ. ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ಉಲ್ಲೇಖೀಸಿದ ಭಾಷೆಗಳನ್ನು ಮಾತ್ರವೇ ತ್ರಿಭಾಷೆಗಳೆಂದು ಪರಿಗಣಿಸಬೇಕು ಎಂದು ಸಿಬಿಎಸ್‌ಇಗೆ ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಸೂಚನೆ ನೀಡಿರುವುದಾಗಿ ಮೂಲಗಳು ತಿಳಿಸಿವೆ. 

ಪ್ರಸ್ತುತ ತ್ರಿಭಾಷಾ ಸೂತ್ರದಂತೆ, ಹಿಂದಿ ಭಾಷಿಕ ಪ್ರದೇಶದಲ್ಲಿ ಹಿಂದಿ ಜತೆಗೆ ಇಂಗ್ಲಿಷ್‌ ಬೋಧಿಸಬೇಕು ಮತ್ತು ಹಿಂದಿಯೇತರ ಭಾಷಿಕ ಪ್ರದೇಶಗಳಲ್ಲಿ ಮಾತೃಭಾಷೆಯ ಜತೆಗೆ ಹಿಂದಿ ಮತ್ತು ಇಂಗ್ಲಿಷ್‌ ಬೋಧಿಸಬೇಕು. ಆದರೆ 18 ಸಾವಿರಕ್ಕೂ ಹೆಚ್ಚು ಸಂಸ್ಥೆಗಳು ಹಿಂದಿ, ಇಂಗ್ಲಿಷ್‌ ಜತೆಗೆ ಜರ್ಮನ್‌, ಮ್ಯಾಂಡರಿನ್‌ ಅಥವಾ ಫ್ರೆಂಚ್‌ ಭಾಷೆಗಳನ್ನು 8ನೇ ತರಗತಿಯವರೆಗೆ ಬೋಧಿಸುತ್ತಿವೆ. ಮುಂದಿನ ವರ್ಷದಿಂದ ವಿದೇಶಿ ಭಾಷೆ ಕಲಿಯಲು ಆಸಕ್ತಿ ಇರುವ ವಿದ್ಯಾರ್ಥಿಗಳು ಅದನ್ನು ನಾಲ್ಕನೇ ಅಥವಾ ಐದನೇ ಭಾಷೆಯಾಗಿ ಪರಿಗಣಿಸಬೇಕು. ಈ ಬಗ್ಗೆ ಸಿಬಿಎಸ್‌ಇ ಜತೆ ಸಮಾಲೋಚನೆ ನಡೆಸಲಾಗಿದ್ದು, ಶೀಘ್ರದಲ್ಲೇ ಅಧಿಸೂಚನೆ ಹೊರಡಿಸುವ ಸಾಧ್ಯತೆಯಿದೆ.