ಲಂಡನ್‌: ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರಬರುವ ಮುನ್ನ ಯುಕೆ ಸಂಸತ್ತಿನಿಂದ ಔಪಚಾರಿಕ ಅನುಮೋದನೆ ಪಡೆಯಬೇಕು ಎಂದು ಅಲ್ಲಿನ ಸುಪ್ರೀಂ ಕೋರ್ಟ್‌ ಮಹತ್ವದ ಆದೇಶ ಹೊರಡಿಸಿದೆ. ಯುಕೆಯ ಉನ್ನತ ನ್ಯಾಯಮಂಡಳಿ ಸರ್ಕಾರದ ವಾದವನ್ನು ತಳ್ಳಿಹಾಕಿದ್ದು, ಈ ಆದೇಶದಿಂದ ಪ್ರಧಾನಿ ಥೆರೇಸಾ ಮೇ ಅವರಿಗೆ ದೊಡ್ಡ ಹಿನ್ನಡೆ ಆದಂತಾಗಿದೆ. ಜನಮತಗಣನೆಯನ್ನೇ ಆಧರಿಸಿ ಪ್ರಧಾನಿ ತೆರೇಸಾ ಮೇ ಸರ್ಕಾರ ಐರೋಪ್ಯ ಒಕ್ಕೂಟದಿಂದ ಹೊರಬರಲು ಯೋಜನೆ ರೂಪಿಸಿತ್ತು. ಈ ಸಂಬಂಧ ತೆರೇಸಾ ಅವರ ನೀತಿಗೆ ಪ್ರತಿಕ್ರಿಯಿಸಿರುವ ಸುಪ್ರೀಂ ಕೋರ್ಟ್‌, ‘ಜನಮತಗಣನೆ ಎನ್ನುವುದು ರಾಜಕಾರಣದ ಮಹತ್ವದ ನಿರ್ಧಾರವೇ ಇದ್ದಿರಬಹುದು. ಆದರೆ, ಸಂಸತ್ತಿನ ನೀತಿ ಅನ್ವಯ ಸಾಧಕಬಾಧಕಗಳನ್ನು ಚರ್ಚಿಸಲೇಬೇಕಾಗುತ್ತದೆ. ಅಗತ್ಯ ಬದಲಾವಣೆ ಬೇಕಿದ್ದಲ್ಲಿ ಯುಕೆ ಸಂವಿಧಾನದ ಮೂಲಕವೇ ಮಾಡಬೇಕಾಗುತ್ತದೆ. ಈ ವಿಚಾರದಲ್ಲಿ ಸರ್ಕಾರ ತಡಮಾಡದೆ, ಮಾರ್ಚ್‌ ಅಂತ್ಯದೊಳಗೆ ಸರ್ಕಾರ ಅನುಮೋದನೆ ಪಡೆಯಬೇಕು’ ಎಂದು ಆದೇಶಿಸಿದೆ.
