BJP ಅಧ್ಯಕ್ಷರ ಬದಲಾವಣೆ ಭ್ರಮೆ: ದಿಲ್ಲಿಯಿಂದ ವಾಪಸಾಗಿ ವಿಜಯೇಂದ್ರ

ಬೆಂಗಳೂರು: ಅಧ್ಯಕ್ಷರ ಬದಲಾವಣೆ ಯಾಗುತ್ತದೆ ಎಂಬ ಭ್ರಮೆಯಲ್ಲಿ ಇರುವವರ ಆಸೆ ಈಡೇರುವುದಿಲ್ಲ. ನಾನು ಅವರನ್ನು (ಯತ್ನಾಳ್‌) ಉಚ್ಚಾಟನೆ ಮಾಡಿ ಎಂದು ದಿಲ್ಲಿಯಲ್ಲಿ ದೂರು ನೀಡಿಲ್ಲ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಹಠಾತ್‌ ದಿಲ್ಲಿ ಪ್ರವಾಸ ಮುಗಿಸಿ ಬೆಂಗಳೂರಿಗೆ ವಾಪಸ್‌ ಆದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ವರಿಷ್ಠರನ್ನು ಭೇಟಿಯಾಗಿ ರಾಜ್ಯ ರಾಜಕೀಯ ಬೆಳವಣಿಗೆ ಹಾಗೂ ಉಪಚುನಾವಣೆ ಫ‌ಲಿತಾಂಶದ ಬಗ್ಗೆ ವಿವರಣೆ ನೀಡಿದ್ದೇನೆ. ಎಲ್ಲವನ್ನೂ ಯಾರ ಗಮನಕ್ಕೆ ತರಬೇಕೋ ಅವರ ಗಮನಕ್ಕೆ ತಂದಿದ್ದೇನೆ. ವಿಜಯೇಂದ್ರ ಏನೂ ಮಾತನಾಡುತ್ತಿಲ್ಲ ಅಂದರೆ ಅದು ನನ್ನ ಅಸಾಮರ್ಥ್ಯ ಎಂದು ಯಾರಾದರೂ ಭಾವಿಸಿದ್ದರೆ ತಪ್ಪಾಗುತ್ತದೆ. ಯಡಿಯೂರಪ್ಪ ಅವರನ್ನು ಟೀಕೆ ಮಾಡಿದರೆ ಪ್ರಚಾರ ಸಿಗುತ್ತದೆ ಅಂದುಕೊಳ್ಳುವುದು ಕೇವಲ ಭ್ರಮೆ ಎಂದು ಯತ್ನಾಳ್‌ ಹೆಸರು ಹೇಳದೇ ತಿರುಗೇಟು ನೀಡಿದರು.