ಭಿಲಾಯ್‌ ಸ್ಟೀಲ್‌ ಪ್ಲಾಂಟ್‌ ದುರಂತ : 11ಕ್ಕೇರಿದ ಮೃತರ ಸಂಖ್ಯೆ

ರಾಯಪುರ : ಛತ್ತೀಸ್‌ಗಢದ ಭಿಲಾಯ್‌ ಸ್ಟೀಲ್‌ ಪ್ಲಾಂಟ್‌ನಲ್ಲಿ ನಿನ್ನೆ ಮಂಗಳವಾರ ಸಂಭವಿಸಿದ್ದ ಭೀಕರ ಸ್ಫೋಟದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದ ಇಬ್ಬರು ನೌಕರರು ಇಂದು ಮೃತಪಡುವುದರೊಂದಿಗೆ  ಈ ದುರಂತದಲ್ಲಿ ಅಸುನೀಗಿರುವವರ ಸಂಖ್ಯೆ 11ಕ್ಕೇರಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನಿನ್ನೆ ಮಂಗಳವಾರ ಅವಘಡ ಸಂಭವಿಸಿದ್ದ ವೇಳೆ 9 ಮಂದಿ ಮಡಿದಿದ್ದು ಇತರ 14 ಮಂದಿ ಗಾಯಗೊಂಡಿದ್ದರು. ಸರಕಾರಿ ಒಡೆತನದ ಸ್ಟೀಲ್‌ ಅಥಾರಿಟಿ ಆಫ್ ಇಂಡಿಯಾಗೆ ಸೇರಿದ ಈ ಘಟಕದಲ್ಲಿ ಗ್ಯಾಸ್‌ ಪೈಪ್‌ಲೈನ್‌ ಸ್ಫೋಟಗೊಂಡಿತ್ತು. 

ತೀವ್ರ ಸುಟ್ಟಗಾಯಗಳೊಂದಿಗೆ ನಿನ್ನೆ ಭಿಲಾಯ್‌ ನ ಜವಾಹಾರ್‌ ಲಾಲ್‌ ನೆಹರೂ ಆಸ್ಪತ್ರೆಗೆ ದಾಖಲಾಗಿದ್ದ 14 ಮಂದಿಯ ಪೈಕಿ ನಿನ್ನೆ ತಡರಾತ್ರಿ ಇಬ್ಬರು ಕೊನೆಯುಸಿರೆಳೆದರು ಎಂದು ಘಟಕದ ಪಿಆರ್‌ಓ ತಿಳಿಸಿದ್ದಾರೆ.