ಕ್ರಿಕೆಟಿಗರಿಗೆ ಕೊಡಬೇಕಾದ ಹಣ ಕೊಡ್ತಾ ಇಲ್ಲ ಬಿಸಿಸಿಐ!

ಮುಂಬೈ: ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ವಿರುದ್ಧ ಮತ್ತೂಂದು ಆರೋಪ ಕೇಳಿಬಂದಿದೆ. ಕ್ರಿಕೆಟ್‌ ಪಂದ್ಯಗಳ ನೇರಪ್ರಸಾರದಿಂದ ಪಡೆದ ಹಣದಲ್ಲಿ ಬಿಸಿಸಿಐ ಶೇ.26ರಷ್ಟನ್ನು ಆಟಗಾರರಿಗೆ ನೀಡಬೇಕೆಂಬ ನಿಯಮವಿದ್ದರೂ ನೀಡುತ್ತಿರುವುದು ಕೇವಲ ಶೇ.8 ಮಾತ್ರ ಎಂದು ಆಡಳಿತಾಧಿಕಾರಿಗಳಿಗೆ ತಿಳಿದುಬಂದಿದೆ. 2001ರಲ್ಲೇ ಈ ರೀತಿಯ ಒಪ್ಪಂದಕ್ಕೆ ಬಿಸಿಸಿಐ ಸಹಿ ಹಾಕಿತ್ತು. 2004ರಲ್ಲಿ ಇದನ್ನು ಜಾರಿ ಮಾಡುವುದಕ್ಕೆ ಜಗಮೋಹನ್‌ ದಾಲಿ¾ಯಾ ಕ್ರಮ ತೆಗೆದುಕೊಂಡಿದ್ದರು. ಆದರೂ ಅದು ಜಾರಿಯಾಗಿಲ್ಲ ಎಂದು ಆರೋಪಿಸಲಾಗಿದೆ.

ಒಟ್ಟಾರೆ ಬಿಸಿಸಿಐ ತನಗೆ ಬಂದ ಅಷ್ಟೂ ಆದಾಯದಲ್ಲಿ ಶೇ.70ರಷ್ಟನ್ನು ರಾಜ್ಯ ಕ್ರಿಕೆಟ್‌ ಸಂಸ್ಥೆಗಳಿಗೆ ನೀಡುತ್ತಿದೆ. ಉಳಿದ ಶೇ.30ರಷ್ಟು ಹಣದಲ್ಲಿ ಶೇ.26ರಷ್ಟನ್ನು ಆಟಗಾರರಿಗೆ ನೀಡುತ್ತಿದೆ. ಬಾಕಿ ಶೇ.3ನ್ನು ಮೈದಾನ ನಿರ್ಮಾಣ, ಮೂಲಭೂತ ಸೌಕರ್ಯ, ಮಂಡಳಿ ಆಡಳಿತ ನಿರ್ವಹಣೆಗೆ ವ್ಯಯಿಸುತ್ತಿದೆ. ಇನ್ನು ಐಸಿಸಿ ಕೂಟಗಳ ವೇಳೆ ಪ್ರಾಯೋಜಕತ್ವದಿಂದ ಬಂದ ಹಣದಲ್ಲೂ ಆಟಗಾರರಿಗೆ ಅತಿ ಕಡಿಮೆ ಪ್ರಮಾಣವನ್ನು ಬಿಸಿಸಿಐ ನೀಡುತ್ತಿದೆ. ಇದನ್ನೂ ಸರಿಪಡಿಸಲು ಸರ್ವೋಚ್ಚ ನ್ಯಾಯಪೀಠ ನಿಯೋಜಿತ ಆಡಳಿತಾಧಿಕಾರಿಗಳು ಚಿಂತಿಸಿದ್ದಾರೆ.