ಬಂಟ್ವಾಳ: ಅಟ್ಟದಲ್ಲಿದ್ದ 11 ಅಡಿಕೆ ಚೀಲ ಕಳವು

ಬಂಟ್ವಾಳ: ಬಂಟ್ವಾಳ ಬೈಪಾಸ್‌ ರಸ್ತೆಯ ಮನೆಯೊಂದರ ಹಿಂಬದಿಯ ಕಿಟಕಿಯ ರಾಡ್‌ ತೆಗೆದು ಅಟ್ಟಳಿಗೆಯಲ್ಲಿ ಇಟ್ಟಿದ್ದ 11 ಗೋಣಿ ಅಡಿಕೆಯನ್ನು ಕಳವು ಮಾಡಿದ ಘಟನೆ ಮಾ. 2ರಂದು ಬೆಳಕಿಗೆ ಬಂದಿದೆ.

ಬೈಪಾಸ್‌ ನಿವಾಸಿ ಕೆ. ಜಿನಚಂದ್ರ ಜೈನ್‌ ಅವರು ಸುಮಾರು 3 ಕ್ವಿಂಟಾಲ್‌ ಅಡಿಕೆಯನ್ನು ಒಣಗಿಸಿ 11 ಗೋಣಿಗಳಲ್ಲಿ ತುಂಬಿಸಿ ಮನೆಯ ಅಟ್ಟಳಿಗೆಯಲ್ಲಿಟ್ಟಿದ್ದರು. ಮಾ. 1ರಂದು ಮನೆಗೆ ಬೀಗ ಹಾಕಿ ಹೋಗಿದ್ದು, 2ರಂದು ಬೆಳಗ್ಗೆ ಬಂದು ನೋಡಿದಾಗ ಕಳವಾಗಿರುವುದು ಬೆಳಕಿಗೆ ಬಂದಿದೆ.

ಕಳವಾದ ಅಡಿಕೆಯ ಮೌಲ್ಯ 60 ಸಾವಿರ ರೂ. ಎಂದು ಅಂದಾಜಿಸಲಾಗಿದೆ. ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.