ಬಾಬು ಕುಟುಂಬದ ಕೈ ಸೇರಿದ ಪಡಿತರ ಚೀಟಿ

ಸುಳ್ಯ : ಪಡಿತರ ಚೀಟಿ ಹೊಂದಿದ್ದರೂ ನಾಲ್ಕು ವರ್ಷಗಳಿಂದ ಪಡಿತರ ಸೌಲಭ್ಯ ಸಿಗದೆ ವಂಚಿತಗೊಂಡಿದ್ದ ಪೆರುವಾಜೆ ಗ್ರಾಮದ ಕುಂಡಡ್ಕ ಸಾರಕರೆ ನಿವಾಸಿ ಬಾಬು ಅವರಿಗೆ ಕೊನೆಗೂ ಹೊಸ ಅಂತ್ಯೋದಯ ಪಡಿತರ ಚೀಟಿ ದೊರೆತಿದೆ..!

ಜು. 12ರಂದು ಉದಯವಾಣಿ ಸುದಿನ ‘ಪಡಿತರ ಚೀಟಿ ಇದೆ; ಸಾಮಗ್ರಿ ಸಿಗಲ್ಲ’ ಎಂಬ ಶೀರ್ಷಿಕೆಯಡಿ ಬಾಬು ಕುಟುಂಬದ ಸಮಸ್ಯೆ ಬಗ್ಗೆ ಸಮಗ್ರ ವರದಿ ಪ್ರಕಟಿಸಿತ್ತು. ವರದಿ ಆಧರಿಸಿ ಜು.13 ರಂದು ತಾಲೂಕು ಆಹಾರ ನಿರೀಕ್ಷಕ ಎಂ.ಎಲ್‌.ಶಂಕರ್‌ ಅವರು ಬಾಬು ಅವರ ಮನೆಗೆ ಭೇಟಿ ನೀಡಿ ಕುಟುಂಬ ಸದಸ್ಯರಿಂದ ಮಾಹಿತಿ ಪಡೆದಿದ್ದರು. ಆನ್‌ ಲೈನ್‌ನಲ್ಲಿ ಮರು ನೋಂದಣಿ ಆರಂಭವಾದ ತತ್‌ಕ್ಷಣ ಕಾರ್ಡ್‌ ಒದಗಿಸುವ ಭರವಸೆ ನೀಡಿದ್ದರು.

ನೋಂದಣಿ ಪ್ರಕ್ರಿಯೆ ಆರಂಭದ ಬೆನ್ನಲ್ಲೇ ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಲಾಗಿದೆ. ತಾ| ಆಹಾರ ನಿರೀಕ್ಷಕರು ಖುದ್ದು ಮುತುವರ್ಜಿ ವಹಿಸಿ ಸ್ಪಂದಿಸಿದ್ದಾರೆ. ಹೊಸ ಕಾರ್ಡ್‌ ಅನ್ನು ಅಂಚೆ ಮುಖಾಂತರ ಮನೆಗೆ ತಲುಪಿದೆ ಎಂದು ಬಾಬು ಅವರು ಪತ್ರಿಕೆಗೆ ತಿಳಿಸಿದ್ದಾರೆ.