ಪತಂಜಲಿ ಸಿಮ್‌ ಕಾರ್ಡ್‌ ಬಿಡುಗಡೆ

ಹೊಸದಿಲ್ಲಿ: ಗೃಹೋಪಯೋಗಿ ವಸ್ತುಗಳ ಉತ್ಪಾದನೆಯಿಂದ ಜನ ಮನ್ನಣೆಗಳಿಸಿರುವ ಯೋಗಗುರು ಬಾಬಾ ರಾಮ್‌ ದೇವ್‌ ಅವರ “ಪತಂಜಲಿ’ ಸಂಸ್ಥೆ, ಇದೀಗ ದೂರ ಸಂಪರ್ಕ ಕ್ಷೇತ್ರಕ್ಕೆ ಕಾಲಿಟ್ಟಿದೆ.

ಸರ್ಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ ಜತೆಗೆ ಒಪ್ಪಂದ ಮಾಡಿಕೊಂಡಿರುವ ಪತಂಜಲಿ, ತನ್ನದೇ ಹೊಸ ಬ್ರಾಂಡ್‌ನ‌ ಸಿಮ್‌ ಕಾರ್ಡ್‌ಗಳನ್ನು ಬಿಡುಗಡೆಗೊಳಿಸಿದೆ. ರವಿವಾರ ನಡೆದ ಸರಳ ಸಮಾರಂಭದಲ್ಲಿ, “ಸ್ವದೇಶಿ ಸಮೃದ್ಧಿ’ ಎಂಬ ಹೆಸರಿನ ಸಿಮ್‌ ಕಾರ್ಡ್‌ಗಳು ಬಿಡುಗಡೆಯಾಗಿವೆ. ಆರಂಭದಲ್ಲಿ, ಈ ಸಿಮ್‌ ಗಳನ್ನು ಪತಂಜಲಿ ಸಂಸ್ಥೆಯ ಉದ್ಯೋಗಿಗಳು, ಅಧಿಕಾರಿಗಳಿಗೆ ನೀಡಲಾಗಿದೆ. 

144 ರೂ. ರೀಚಾರ್ಜ್‌ಗೆ ಅನಿಯಮಿತ ಕರೆಗಳು ಹಾಗೂ ದಿನವೊಂದಕ್ಕೆ 2 ಜಿಬಿ ಡೇಟಾ ಹಾಗೂ 100 ಎಸ್‌ಎಂಎಸ್‌ಗಳನ್ನು ಕಳುಹಿಸಬಹುದು. ಇದರ ಜತೆಗೆ, ಗ್ರಾಹಕರಿಗೆ 2.5 ಕೋಟಿಯ ಆರೋಗ್ಯ, ಅಪಘಾತ ಹಾಗೂ 5 ಕೋಟಿ ರೂ. ಮೌಲ್ಯದ ಜೀವ ವಿಮೆ ಸೌಲಭ್ಯಗಳೂ ಸಿಗಲಿವೆ ಎಂದು ಟೈಮ್ಸ್‌ ಆಫ್ ಇಂಡಿಯಾ ವರದಿ ಮಾಡಿದೆ.