ಹಣ ಸಂಪಾದನೆಗೆ ಬೇರೆ ದಾರಿ ಹಿಡಿದ ಆಸ್ಟ್ರೇಲಿಯ ಕ್ರಿಕೆಟಿಗರು

ಮೆಲ್ಬರ್ನ್: ವೇತನ ವಿವಾದ ಇನ್ನೂ ಬಗೆಹರಿಯದಿರುವುದರಿಂದ ಹಣ ಸಂಪಾದನೆಗಾಗಿ ಆಸ್ಟ್ರೇಲಿಯ ಕ್ರಿಕೆಟಿಗರು ಪರ್ಯಾಯ ಮಾರ್ಗಕ್ಕೆ ಮೊರೆ ಹೋಗಿದ್ದಾರಂತೆ! 

ಆಸೀಸ್‌ ಕ್ರಿಕೆಟ್‌ ಮಂಡಳಿ ಹೊಸ ವೇತನ ಗುತ್ತಿಗೆಯನ್ನು ಘೋಷಣೆ ಮಾಡಿತ್ತು. ಇದಕ್ಕೆ ಕ್ರಿಕೆಟಿಗರ ಸಂಘ ವಿರೋಧ ವ್ಯಕ್ತಪಡಿಸಿತ್ತು. ಇಲ್ಲಿಯ ವರೆಗೆ ಆಟಗಾರರಿಗೆ ಹೊಸ ಗುತ್ತಿಗೆ ಒಪ್ಪಿಗೆಯಾಗಿಲ್ಲ. ಪರಿಣಾಮ, ಆಟಗಾರರು ನಿರೋದ್ಯೋಗಿಗಳಾಗಿದ್ದಾರೆ. 

ಇದರಿಂದ ಅಂತಾರಾಷ್ಟ್ರೀಯ ತಾರೆಯರೇನೋ ಬಚಾವಾಗುತ್ತಾರೆ. ದೇಶೀಯ ಕ್ರಿಕೆಟಿಗರ ಗತಿಯೇನು? ಅವರೀಗ ಹಣ ಸಂಪಾದನೆಗೆ ಬೇರೆ ದಾರಿ ಕಾಣದೇ ಯಾವ ಯಾವುದೋ ಕೆಲಸ ಮಾಡುತ್ತಿದ್ದಾರಂತೆ. ಕೆಲವು ಕ್ರಿಕೆಟಿಗರು ತಾವು ಊಹಿಸಿಯೇ ಇರದ ಕೆಲಸ ಮಾಡಬೇಕಾಗಿದೆಯಂತೆ. ಆಸ್ಟ್ರೇಲಿಯ ಕ್ರಿಕೆಟ್‌ ಸಂಸ್ಥೆ ಮತ್ತು ಕ್ರಿಕೆಟಿಗರ ಸಂಘದ ನಡುವಿನ ಜಗಳದಿಂದ 230ಕ್ಕೂ ಹೆಚ್ಚು ಕ್ರಿಕೆಟಿಗರು ನಿರುದ್ಯೋಗಿಗಳಾಗಿದ್ದಾರೆ. ಕೆಲವು ಪ್ರವಾಸಗಳಿಗೆ ಕ್ರಿಕೆಟಿಗರು ಬಹಿಷ್ಕಾರ ಹಾಕಿದ್ದಾರೆ. ಪ್ರತಿಷ್ಠಿತ ಆ್ಯಶಸ್‌ ಕೂಡ ಭೀತಿಯಲ್ಲಿದೆ.