ಆಕ್ಲೆಂಡ್‌ ಕ್ಲಾಸಿಕ್‌ ಟೆನಿಸ್‌ ಪ್ರಶಸ್ತಿ ಉಳಿಸಿಕೊಂಡ ಜೂಲಿಯಾ

ಆಕ್ಲೆಂಡ್‌: ಹಾಲಿ ಚಾಂಪಿಯನ್‌ ಜರ್ಮನಿಯ ಜೂಲಿಯಾ ಜಾರ್ಜಸ್‌ “ಆಕ್ಲೆಂಡ್‌ ಕ್ಲಾಸಿಕ್‌’ ಟೆನಿಸ್‌ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

ರವಿವಾರ ನಡೆದ ಫೈನಲ್‌ನಲ್ಲಿ ಜೂಲಿಯಾ ಜಾರ್ಜಸ್‌ ಕೆನಡಾದ ಯುವ ಟೆನಿಸ್‌ ಆಟಗಾರ್ತಿ ಬಿಯಾಂಕಾ ಆ್ಯಂಡ್ರಿಸ್ಕಾ ಅವರನ್ನು 2-6, 7-5, 6-1 ಸೆಟ್‌ಗಳಿಂದ ಸೋಲಿಸಿದರು. ಫೈನಲ್‌ ಹಾದಿಯಲ್ಲಿ ವಿಶ್ವದ ಮಾಜಿ ನಂ. ವನ್‌ ಆಟಗಾರ್ತಿಯರಾದ ವೀನಸ್‌ ವಿಲಿಯಮ್ಸ್‌, ಕ್ಯಾರೊಲಿನ್‌ ವೋಜ್ನಿಯಾಕಿ ಅವರನ್ನು ಸೋಲಿಸಿದ್ದ ಬಿಯಾಂಕಾ, ಹಾಲಿ ಚಾಂಪಿಯನ್‌ ಎದುರು ಮುಗ್ಗರಿಸಿದರು.

ಮೊದಲ ಸೆಟ್‌ ಗೆದ್ದ ಬಿಯಾಂಕಾ, ದ್ವಿತೀಯ ಸೆಟ್‌ ಅನ್ನು ಜಿದ್ದಾಜಿದ್ದಿ ಹೋರಾಟದಲ್ಲಿ ಕಳೆದುಕೊಳ್ಳಬೇಕಾಯಿತು. ಇದು ಜಾರ್ಜಸ್‌ ಅವರ ವೃತ್ತಿಜೀವನದ 7ನೇ ಟೆನಿಸ್‌ ಪ್ರಶಸ್ತಿ.

“ಬಿಯಾಂಕಾ ನನಗೆ ತಕ್ಕ ಪೈಪೋಟಿಯನ್ನೇ ನೀಡಿದ್ದಾರೆ. ಮುಂದೆ ಆಕೆಯ ಕುರಿತು ಸಾಕಷ್ಟು ಸಂತಸದ ಸುದ್ದಿಗಳು ನನ್ನ ಕಿವಿಗೆ ಬೀಳುತ್ತದೆ ಎಂಬ ಬಗ್ಗೆ ನಂಬಿಕೆಯಿದೆ. ಇವತ್ತು ನನ್ನ ಅನುಭವವನ್ನೆಲ್ಲ ಒಟ್ಟುಗೂಡಿಸಿ ಆಡಿದೆ. ಇದು ಅವಿಸ್ಮರಣೀಯ ಕ್ಷಣ’ ಎಂಬುದು ವಿಶ್ವ ರ್‍ಯಾಂಕಿಂಗ್‌ನಲ್ಲಿ 14ನೇ ಸ್ಥಾನದಲ್ಲಿರುವ ಜೂಲಿಯಾ ಜಾರ್ಜಸ್‌ ಪ್ರತಿಕ್ರಿಯೆ.