ಸಿಡ್ನಿ ಪ್ರಶಸ್ತಿ ಗೆದ್ದ ಕೆರ್ಬರ್‌

ಸಿಡ್ನಿ: ಮಾಜಿ ನಂಬರ್‌ ವನ್‌ ಆಟಗಾರ್ತಿ, ಜರ್ಮನಿಯ ಆ್ಯಂಜೆಲಿಕ್‌ ಕೆರ್ಬರ್‌ ಸಿಡ್ನಿ ಇಂಟರ್‌ನ್ಯಾಶನಲ್‌ ವನಿತಾ ಸಿಂಗಲ್ಸ್‌ ಟೆನಿಸ್‌ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಶನಿವಾರದ ಫೈನಲ್‌ ಕಾಳಗದಲ್ಲಿ ಅವರು ತವರಿನ ಭರವಸೆಯ ಆಟಗಾರ್ತಿ ಆ್ಯಶ್ಲಿ ಬಾರ್ಟಿ ವಿರುದ್ಧ 6-4, 6-4 ಅಂತರದ ಜಯ ಸಾಧಿಸಿದರು.

ಎರಡು ಬಾರಿಯ ಗ್ರ್ಯಾನ್‌ಸ್ಲಾಮ್‌ ವಿಜೇತೆಯಾಗಿರುವ ಕೆರ್ಬರ್‌ 2017ರ ಋತುವನ್ನು ಬಹಳ ನಿರಾಶಾದಾಯಕವಾಗಿ ಮುಗಿಸಿದ್ದರು. ಈಗ 2018ರ ಆರಂಭದಲ್ಲೇ ಯಶಸ್ಸಿನ ರುಚಿ ಅನುಭವಿಸಿದ್ದು, ಆಸ್ಟ್ರೇಲಿಯನ್‌ ಓಪನ್‌ಗೆ ಹೊಸ ಹುಮ್ಮಸ್ಸಿನಲ್ಲಿ ಸಜ್ಜಾಗಿದ್ದಾರೆ.

29ರ ಹರೆಯದ ಎಡಗೈ ಆಟಗಾರ್ತಿ ಕೆರ್ಬರ್‌ ಕಳೆದ ಎಪ್ರಿಲ್‌ ಬಳಿಕ ಆಡುತ್ತಿರುವ ಮೊದಲ ಫೈನಲ್‌ ಇದಾಗಿದೆ. “ಮತ್ತೆ ಅಮೋಘ ಟೆನಿಸ್‌ ಪ್ರದರ್ಶನ ನೀಡುತ್ತಿರುವುದಕ್ಕೆ ಖುಷಿಯಾಗುತ್ತಿದೆ. ನನ್ನನ್ನು ಬೆಂಬಲಿಸಿದ ಎಲ್ಲರಿಗೂ ಕೃತಜ್ಞತೆಗಳು’ ಎಂದು ಕೆರ್ಬರ್‌ ಗೆಲುವಿನ ಬಳಿಕ ಪ್ರತಿಕ್ರಿಯಿಸಿದರು.