ಮುಖ್ಯಮಂತ್ರಿ ಕಚೇರಿ ಹೆಸರಲ್ಲಿ ನಕಲಿ ಕರೆ ಮಾಡಿದ ಅಧಿಕಾರಿ

ಬೆಂಗಳೂರು: ರಾಜ್ಯ ಸರ್ಕಾರದಲ್ಲಿ ಶಾಸಕರ ನಕಲಿ ಲೆಟರ್‌ ಹೆಡ್‌ಗಳ ಮೂಲಕ ವರ್ಗಾವಣೆ ಹಾಗೂ ಅನುದಾನ ಬಿಡುಗಡೆ ಮಾಡಿಕೊಳ್ಳುತ್ತಿರುವವರ ಸಾಲಿಗೆ ಈಗ ನಕಲಿ ದೂರವಾಣಿ ಕರೆ ಮಾಡಿ ಅಧಿಕಾರಿ ಸಿಲುಕಿಕೊಂಡಿರುವ ಪ್ರಕರಣ ಬೆಳಕಿಗೆ ಬಂದಿದೆ.

ಕೆಪಿಟಿಸಿಎಲ್‌ ಉದ್ಯೋಗಿ ಬಿ.ಎಲ್‌.ನರಸಿಂಹ ಮೂರ್ತಿ ಎನ್ನುವವರು, ತಮ್ಮ ವರ್ಗಾವಣೆಯನ್ನು ಮಾರ್ಪಡಿಸಲು ಮುಖ್ಯಮಂತ್ರಿ ಕಚೇರಿಯಿಂದ ಕರೆ ಮಾಡಿರುವುದಾಗಿ ಸುಳ್ಳು ಹೇಳಿದ್ದಾರೆ. ಬೆಸ್ಕಾಂನ ಕೆಂಗೇರಿಯ ಕಾರ್ಯಪಾಲನಾ ವಿಭಾಗದಲ್ಲಿ ಮುಂದುವರಿಯಲು ಸುಳ್ಳು ಕರೆ ಮಾಡಿ ಆದೇಶ ಮಾರ್ಪಾಡು ಮಾಡಿಸಿಕೊಂಡಿದ್ದಾರೆ.

ಅವರು ಆದೇಶ ಮಾರ್ಪಡಿಸಿಕೊಳ್ಳಲು ಮುಖ್ಯಮಂತ್ರಿಯವರ ಕಚೇರಿ ಹೆಸರು ಬಳಸಿಕೊಂಡು ಸುಳ್ಳು ಹೇಳಿರುವುದು ನಿಗಮದ ಗಮನಕ್ಕೆ ಬಂದಿರುವುದರಿಂದ ಅವರ ವರ್ಗಾವಣೆ ಆದೇಶವನ್ನು ಮಾರ್ಪಡಿಸಿ, ಕೆಪಿಟಿಸಿಎಲ್‌ ಕಾರ್ಯಾಲಯದಲ್ಲಿ ವರದಿ ಮಾಡಿಕೊಳ್ಳುವಂತೆ ಸೂಚಿಸಲಾಗಿದೆ.