Amit Shah ನಕಲಿ ವೀಡಿಯೋ :ತೆಲಂಗಾಣ ಸಿಎಂಗೆ ಪೊಲೀಸ್‌ ಸಮನ್ಸ್‌

ಹೈದ್ರಾಬಾದ್‌: ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರ ತಿರುಚಿದ ವೀಡಿಯೋ ಹಂಚಿಕೊಂಡ ತೆಲಂಗಾಣ ಸಿಎಂ ರೇವಂತ್‌ ರೆಡ್ಡಿಗೆ ದಿಲ್ಲಿ ಪೊಲೀಸ್‌ ಸಮನ್ಸ್‌ ಜಾರಿ ಮಾಡಿದೆ. ಸಿಎಂ ಜತೆ ಇನ್ನೂ ನಾಲ್ವರಿಗೆ ವಿಚಾರಣೆಗೆ ಹಾಜರಾ ಗುವಂತೆ ತಿಳಿಸಲಾಗಿದೆ. ಜತೆಗೆ ಟ್ವಿಟರ್‌ ಮತ್ತು ಫೇಸ್‌ಬುಕ್‌ಗಳಿಗೂ ನೋಟಿಸ್‌ ನೀಡಲಾಗಿದೆ.

ಬಿಜೆಪಿಯು ಎಸ್‌ಸಿ, ಎಸ್‌ಟಿ, ಒಬಿಸಿಗಿರುವ ಮೀಸಲಾತಿ ತೆಗೆಯಲಿದೆ ಎಂಬ ಶಾ ಅವರ ತಿರುಚಿದ ವೀಡಿಯೋವನ್ನು ತೆಲಂಗಾಣ ಕಾಂಗ್ರೆಸ್‌ ಟ್ವಿಟರ್‌ನಲ್ಲಿ ಹಂಚಿ ಕೊಳ್ಳ ಲಾಗಿತ್ತು. ಬಳಿಕ ಪಕ್ಷದ ನಾಯಕರು ಈ ವೀಡಿಯೋವನ್ನು ಮರು ಹಂಚಿಕೊಂಡಿದ್ದರು. ವೀಡಿಯೋ ಪ್ರಕರ ಣಕ್ಕೆ ಸಂಬಂಧಿಸಿದಂತೆ ಅಸ್ಸಾಂ ಕಾಂಗ್ರೆಸ್‌ ಜತೆಗೆ ಗುರುತಿಸಿಕೊಂಡಿರುವ ವ್ಯಕ್ತಿಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ.

ದಿಲ್ಲಿ ಪೊಲೀಸರ ನೋಟಿಸ್‌ಗೆ ಹೆದರಲಾರೆ. ಸೂಕ್ತ ಉತ್ತರ ನೀಡಲಾಗುವುದು. ಈ ವರೆಗೆ ಪಿಎಂ ಮೋದಿ ಇ.ಡಿ. ಸಿಬಿಐ ದುರ್ಬಳಕೆ ಮಾಡುತ್ತಿದ್ದರು. ಈಗ ದಿಲ್ಲಿ ಪೊಲೀಸರನ್ನೂ ಉಪಯೋಗಿ ಸುತ್ತಿದ್ದಾರೆ.- ರೇವಂತ್‌ ರೆಡ್ಡಿ