ಫ್ಯಾಂಟಮ್ ಬಳಗ ಸೇರಿದ ಅಜನೀಶ್ ಲೋಕನಾಥ್

ಕಿಚ್ಚ ಸುದೀಪ್ ಮತ್ತು ನಿರ್ದೇಶಕ ಅನೂಪ್ ಭಂಡಾರಿ ಕಾಂಬಿನೇಷನ್‍ನಲ್ಲಿ ಫ್ಯಾಂಟಮ್ ಚಿತ್ರ ಈಗಾಗಲೇ ಘೋಷಣೆಯಾಗಿದ್ದು, ಇದೀಗ ಚಿತ್ರದ ಸಂಗೀತ ನಿರ್ದೇಶನದ ಜವಾಬ್ದಾರಿ ಅಜನೀಶ್ ಲೋಕನಾಥ್ ಅವರ ಹೆಗಲೇರಿದೆ. ಶಿಶಿರ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಅಜನೀಶ್, ಉಳಿದವರು ಕಂಡಂತೆ, ರಂಗಿತರಂಗ, ಕಿರಿಕ್ ಪಾರ್ಟಿ, ಸರ್ಕಾರಿ ಹಿ.ಪ್ರಾ ಶಾಲೆ , ಬೆಲ್ ಬಾಟಮ್, ಅವನೇ ಶ್ರೀ ಮನ್ನಾರಾಯಣ ಮೊದಲಾದ ಹತ್ತಾರು ಸೂಪರ್ ಹಿಟ್ ಚಿತ್ರಗಳಿಗೆ ಸಂಗೀತ ನೀಡಿದ್ದಾರೆ.

ಕನ್ನಡದ ಬಹುತೇಕ ನಟರ ಚಿತ್ರಗಳಿಗೆ ಸಂಗೀತ ನೀಡಿ ಸೈ ಎನಿಸಿಕೊಂಡಿರುವ ಅಜನೀಶ್ ಇದೇ ಮೊದಲ ಬಾರಿಗೆ ಸುದೀಪ್ ಚಿತ್ರಕ್ಕೆ ಸಂಗೀತ ನೀಡುತ್ತಿದ್ದಾರೆ. ಇನ್ನು ಫ್ಯಾಂಟಮ್ ಚಿತ್ರವನ್ನು ಚಿತ್ರತಂಡ ದೊಡ್ಡ ಮಟ್ಟದಲ್ಲಿಯೇ ಪ್ಲ್ಯಾನ್ ಮಾಡಿಕೊಂಡು, ಅದನ್ನು ತೆರೆಗೆ ತರುತ್ತಿದೆ. ಚಿತ್ರಕ್ಕಾಗಿ ಬಹುಕೋಟಿ ವೆಚ್ಚದಲ್ಲಿ ತೆಲಂಗಾಣದಲ್ಲಿ ಕಾಡಿನ ಸೆಟ್ ಹಾಕಿಸಲಾಗುತ್ತಿದೆ.

ರಂಗಿತರಂಗ’ ರೀತಿಯ ಉತ್ತಮ ಚಿತ್ರ ನೀಡುವ ಮೂಲಕ ಕನ್ನಡ ಸಿನಿಪ್ರಿಯರನ್ನು ರಂಜಿಸಿರುವ ನಿರ್ದೇಶಕ ಅನೂಪ್ ಭಂಡಾರಿ, ಸುದೀಪ್‍ಗಾಗಿ ಮತ್ತೊಂದು ಅಂಥದ್ದೇ ಡಿಫರೆಂಟ್ ಕಥೆಯನ್ನ ಫ್ಯಾಂಟಮ್ ಚಿತ್ರಕ್ಕಾಗಿ ಸಿದ್ಧ ಮಾಡಿಕೊಂಡಿದ್ದು, ಚಿತ್ರದ ಮೇಲೆ ಸಾಕಷ್ಟು ಕುತೂಹಲ ಮೂಡಿದೆ.