ಆಧಾರ್‌ ಸೋರಿಕೆ ಸವಾಲು

ಹೊಸದಿಲ್ಲಿ: ಆಧಾರ್‌ ಮಾಹಿತಿ ಸೋರಿಕೆ ಸಂಬಂಧ ಟ್ರಾಯ್‌ ಮುಖ್ಯಸ್ಥ ಆರ್‌.ಎಸ್‌.ಶರ್ಮಾ ಎಸೆದಿದ್ದ ಸವಾಲು ಹೊಸ ಚರ್ಚೆಗೆ ನಾಂದಿ ಹಾಡಿದೆ. ಟ್ವಿಟರ್‌ ನಲ್ಲಿ ಶನಿವಾರ ಸಂಜೆ ತಮ್ಮ 12 ಅಂಕಿಗಳ ಆಧಾರ್‌ ಸಂಖ್ಯೆಯನ್ನು ಬರೆದುಕೊಂಡ ಶರ್ಮಾ, ಇದನ್ನು ಹೇಗೆ ದುರುಪಯೋಗಪಡಿಸಬಹುದು, ಹೇಗೆ ಹಾನಿಯುಂಟುಮಾಡಬಹುದು ಎಂಬುದನ್ನು ಸಾಬೀತುಪಡಿಸಿ ಎಂದು ಮುಕ್ತ ಸವಾಲು ಹಾಕಿದ್ದರು.

ಇದಕ್ಕೆ ಪ್ರತಿಯಾಗಿ ಟ್ವೀಟ್‌ ಗಳ ಸುರಿಮಳೆಯಾಗಿದ್ದು, ಅವರ ಪೂರ್ಣ ಹೆಸರು, ವಿಳಾಸ, ಮೊಬೈಲ್‌ ಸಂಖ್ಯೆ, ಪ್ಯಾನ್‌ ಕಾರ್ಡ್‌ ಸಂಖ್ಯೆ, ಜನ್ಮ ದಿನಾಂಕ ಇತ್ಯಾದಿ ಮಾಹಿತಿಯನ್ನು ಪತ್ತೆ ಮಾಡಿರುವುದಾಗಿ ಟ್ವೀಟಿಗರು ಹೇಳಿಕೊಂಡರು. ಆದರೆ ಇದಕ್ಕೆ ಪ್ರತಿಕ್ರಿಯಿಸಿದ ಶರ್ಮಾ, ಇದೆಲ್ಲಾ  ಸಾರ್ವಜನಿಕವಾಗಿ ಲಭ್ಯವಿರುವ ಮಾಹಿತಿ. ಹೊಸ ಸಂಗತಿ ಹೇಳಿ ಎಂಬುದಾಗಿ ಮತ್ತೂಮ್ಮೆ ಸವಾಲು ಹಾಕಿದರು. ಡಿಜಿಟಲ್‌ ಜಗತ್ತಿನಲ್ಲಿ ಡಾಟಾದ ಖಾಸಗಿತನ ತುಂಬಾ ಮಹತ್ವದ ವಿಷಯ. ಆದರೆ ಆಧಾರ್‌ ಖಾಸಗಿತನವನ್ನು ಉಲ್ಲಂಘಿಸುವುದಿಲ್ಲ ಎಂದು ಹೇಳಿಕೊಂಡರು.

ಇನ್ನೊಬ್ಬ ಟ್ವೀಟಿಗರು, ಶರ್ಮಾ ಅವರ ಜನ್ಮ ದಿನಾಂಕ ಮತ್ತು ವಿಳಾಸದೊಂದಿಗೆ ತಾವು ಟ್ರಾಯ್‌ ಅಧ್ಯಕ್ಷ ಎಂದು ಹೇಳಿ ಏರ್‌ ಇಂಡಿಯಾಕ್ಕೆ ಕರೆ ಮಾಡಿ ಫ್ರೀಕ್ವೆಂಟ್‌ ಫ್ಲೈಯರ್‌ ನಂಬರ್‌ ಅನ್ನು ಪಡೆದುಕೊಂಡಿದ್ದಾರೆ. ಶರ್ಮಾ ಅವರು ಆ ಸಂಖ್ಯೆಯನ್ನೇ ತಮ್ಮ ಜಿಮೇಲ್‌ ಸೆಕ್ಯೂರಿಟಿ ಪ್ರಶ್ನೆಗೂ ಬಳಸಿಕೊಂಡಿರುವುದು ತಿಳಿದುಬಂದಿದೆ. ಇದನ್ನು ಆ ಟ್ವೀಟಿಗರು ಹೇಳಿಕೊಂಡಾಗ, ಇದರಿಂದ ತಮಗೇನೂ ಹಾನಿಯಾಗದು ಎಂದು ಶರ್ಮಾ ಉತ್ತರಿಸಿದ್ದಾರೆ. ಈ ಎಲ್ಲ ಬೆಳವಣಿಗೆಯ ಬಳಿಕ ಆಧಾರ್‌ ಪ್ರಾಧಿಕಾರದಿಂದಲೂ ಸ್ಪಷ್ಟನೆ ಬಂದಿದ್ದು, ‘ಟ್ವೀಟಿಗರು ನೀಡಿರುವಂಥ ಮಾಹಿತಿಗಳು ಆಧಾರ್‌ ದತ್ತಾಂಶದಿಂದ ಪಡೆದಿದ್ದಲ್ಲ’ ಎಂದು ಹೇಳಿದೆ.