ತಮಿಳು ನಟಿ ಚಿತ್ರಾ ಇನ್ನಿಲ್ಲ   

ಚೆನ್ನೈ: ತಮಿಳು ಹಾಗೂ ತೆಲುಗು ಸಿನಿಮಾಗಳ ಖ್ಯಾತ ನಟಿ ಚಿತ್ರಾ (56) ಅವರು ಹೃದಯಾಘಾತದಿಂದ ಇಂದು (ಆ.21) ಸಾವನ್ನಪ್ಪಿದ್ದಾರೆ.

ಚಿತ್ರಾ ಬಾಲನಟಿಯಾಗಿ ಕಮಲ್​ ಹಾಸನ್​ ಅಭಿನಯದ ‘ಅಪೂರ್ವ ರಾಗಂಗಳ್​’ ಚಿತ್ರದ ಮೂಲಕ  ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ತಮಿಳಿನ ಹಲವು ಧಾರಾವಾಹಿಗಳಲ್ಲಿ ನಟಿಸಿದ್ದ ಚಿತ್ರಾ ಅವರು ಜನರ ಮನಗೆದ್ದಿದ್ದರು. ಅಲ್ಲದೆ, ವಿವಿಧ ಭಾಷೆಗಳಲ್ಲಿ 100ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಚಿತ್ರಾ ನಟಿಸಿದ್ದಾರೆ.

‘ನಲ್ಲೆನೈ’ ಚಿತ್ರಾ ಎಂದು ಕೂಡ ಅವರನ್ನು ಕರೆಯಲಾಗುತ್ತಿತ್ತು. ಎಣ್ಣೆ ಕಂಪನಿಯೊಂದರ ಜಾಹೀರಾತಿನಲ್ಲಿ ನಟಿಸಿ ಫೇಮಸ್​ ಆಗಿದ್ದರಿಂದ ಅವರನ್ನು ಹೀಗೆ ಕರೆಯುತ್ತಿದ್ದರು. ಮಲಯಾಳಂನಲ್ಲಿ ಅವರು ನಾಯಕಿಯಾಗಿ ನಟಿಸಿದ ಮೊದಲ ಸಿನಿಮಾ ‘ಅಟ್ಟಕಳಶಂ’. ಆ ಚಿತ್ರದಲ್ಲಿ ಮೋಹನ್​ ಲಾಲ್​ ಮತ್ತು ಪ್ರೇಮ್​ ನಜಿರ್​ ಜೊತೆ ತೆರೆಹಂಚಿಕೊಳ್ಳುವ ಅವಕಾಶ ಚಿತ್ರಾಗೆ ಸಿಕ್ಕಿತ್ತು. ಮಾಲಿವುಡ್​ನ ಮತ್ತೋರ್ವ ಸ್ಟಾರ್​ ನಟ ಮಮ್ಮೂಟ್ಟಿ ಜೊತೆಗೂ ಅವರು ಹಲವು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ.

1990ರಲ್ಲಿ ವಿಜಯ್​ ರಾಘವನ್​ ಜೊತೆ ಅವರು ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ನಂತರ ಸಿನಿಮಾಗಳಿಂದ ದೂರು ಉಳಿದುಕೊಂಡಿದ್ದ ಅವರು ಕುಟುಂಬದ ಕಡೆಗೆ ಹೆಚ್ಚು ಗಮನ ನೀಡಿದರು. ಈಗ ಪತಿ ಮತ್ತು ಮಗಳು ಮಹಾಲಕ್ಷ್ಮೀ ಅವರನ್ನು ಚಿತ್ರಾ ಅಗಲಿದ್ದಾರೆ.