ಪಾಟ್ನಾ: ಇತ್ತೀಚೆಗೆ ಖ್ಯಾತ ನಟ ಸಲ್ಮಾನ್‌ ಖಾನ್‌, ಶಾರುಖ್‌ ಖಾನ್‌ ಅವರಿಗೆ ಜೀವ ಬೆದರಿಕೆ ಕರೆಗಳು ಬಂದಿವೆ. ಈ ಸಂಬಂಧ ಪೊಲೀಸರು ಈಗಾಗಲೇ ಆರೋಪಿಗಳನ್ನು ಬಂಧಿಸಿದ್ದಾರೆ. ಇದೀಗ ಖ್ಯಾತ ನಟಿಯೊಬ್ಬರಿಗೆ ಅಪಚಿತರು ಜೀವ ಬೆದರಿಕೆಯ ಕರೆ ಮಾಡಿದ್ದಾರೆ ಎಂದು ವರದಿಯಾಗಿದೆ.
ಭೋಜ್‌ ಪುರಿ ಚಿತ್ರರಂಗದ ಖ್ಯಾತ ನಟಿ (Bhojpuri actress), ಬಿಗ್ ಬಾಸ್ ಓಟಿಟಿ-1 (ಹಿಂದಿ) ಯ ಸ್ಪರ್ಧಿಯ ಅಕ್ಷರಾ ಸಿಂಗ್ (Akshara Singh) ಅವರಿಗೆ ಜೀವ ಬೆದರಿಕೆಯ ಕರೆಗಳು ಬಂದಿದೆ.
ಅಕ್ಷರಾ ಸಿಂಗ್ ಅವರಿಗೆ ನವೆಂಬರ್ 11 ರ ರಾತ್ರಿ ದೂರವಾಣಿ ಕರೆ ಮಾಡಿ ಬೆದರಿಕೆ ಹಾಕಲಾಗಿದ್ದು, ಕರೆ ಮಾಡಿದವರು 50 ಲಕ್ಷ ರೂಪಾಯಿ ಡಿಮ್ಯಾಂಡ್ ಮಾಡಿದ್ದಾರೆ. ಕೊಡದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾರೆ. ಎರಡು ಬೇರೆ ಬೇರೆ ನಂಬರ್ ಗಳಿಂದ ಕರೆಗಳು ಬಂದಿದ್ದು, ಇದರಿಂದಾಗಿ ಭೀತಿಗೊಳಗಾದ ನಟಿ ಅಕ್ಷರಾ ಪಾಟ್ನಾದಲ್ಲಿ ಎಫ್‌ಐಆರ್ ದಾಖಲಿಸಿದ್ದಾರೆ ಎಂದು ವರದಿಯಾಗಿದೆ.
ಸದ್ಯ ಈ ಕುರಿತು ಪೊಲೀಸರು ತನಿಖೆ ಆರಂಭಿಸಿ ಆರೋಪಿ ಬಂಧನಕ್ಕೆ ಬಲೆ ಬೀಸಿದ್ದಾರೆ.
ಸುಲಿಗೆ ಮತ್ತು ಕೊಲೆ ಬೆದರಿಕೆಗೆ ಸಂಬಂಧಿಸಿದಂತೆ ಅಕ್ಷರ ಸಿಂಗ್ ದೂರು ದಾಖಲಿಸಿದ್ದಾರೆ ಎಂದು ಪೊಲೀಸ್ ಠಾಣೆಯ ಪ್ರಭಾರ ಅಧಿಕಾರಿ ಪ್ರಶಾಂತ್ ಕುಮಾರ್ ಭಾರದ್ವಾಜ್ ಖಚಿತಪಡಿಸಿದ್ದಾರೆ.
ಯಾರು ಈ ಅಕ್ಷರಾ?:
ಅಕ್ಷರಾ ಸಿಂಗ್ ಭೋಜ್‌ಪುರಿ ಚಿತ್ರರಂಗದ ಖ್ಯಾತ ನಟಿಯರಲ್ಲಿ ಒಬ್ಬರು. ರವಿ ಕಿಶನ್ ಜೊತೆಗೆ ʼಸತ್ಯಮೇವ ಜಯತೇʼ ಚಿತ್ರದ ಮೂಲಕ ಪಾದಾರ್ಪಣೆ ಮಾಡಿದರು. ನಂತರ ಅವರು ʼಸತ್ಯʼ, ʼತಬಡ್ಲಾʼ ಮತ್ತು ʼಮಾ ತುಜೆ ಸಲಾಮ್ʼ ಸೇರಿದಂತೆ ಹಲವಾರು ಯಶಸ್ವಿ ಚಿತ್ರಗಳಲ್ಲಿ ನಟಿಸಿದ್ದಾರೆ.
ತನ್ನ ನಟನಾ ವೃತ್ತಿಜೀವನದ ಜೊತೆಗೆ ಅಕ್ಷರಾ ತನ್ನ ಗಾಯನ ಪ್ರತಿಭೆಯಿಂದಲೂ ಗುರುತಿಸಲ್ಪಟ್ಟಿದ್ದಾರೆ. ಬಿಗ್ ಬಾಸ್‌ನಂತಹ ಜನಪ್ರಿಯ ರಿಯಾಲಿಟಿ ಶೋಗಳಲ್ಲಿ ಭಾಗವಹಿಸಿದ್ದಾರೆ. ಇವರ ಇತ್ತೀಚಿನ ಹಾಡು ʼಮೇರೆ ದುಬಾಲೆ ಪಿಯಾʼ ಹಿಟ್ ಆಗಿದ್ದು, ಯೂಟ್ಯೂಬ್‌ನಲ್ಲಿ 2 ಮಿಲಿಯನ್ ವೀಕ್ಷಣೆಗಳನ್ನು ಗಳಿಸಿದೆ.
ಪ್ರಶಾಂತ್ ಕಿಶೋರ್ ಅವರ ʼಜನ್ ಸುರಾಜ್ʼ ಪಕ್ಷದ ಪರವಾಗಿ ಅವರು ಕ್ಯಾಂಪೇನ್‌ ಮಾಡಿದ್ದಾರೆ.
