ಗುತ್ತಿಗಾರು-ಮೆಟ್ಟಿನಡ್ಕ ರಸ್ತೆ ದುರಸ್ತಿಗೆ ಕ್ರಮ

ಸುಬ್ರಹ್ಮಣ್ಯ: ಹದಗೆಟ್ಟ ಗುತ್ತಿಗಾರು-ಮೆಟ್ಟಿನಡ್ಕ ಸಂಪರ್ಕ ರಸ್ತೆಯ ಸ್ಥಳಕ್ಕೆ ಜಿ.ಪಂ. ಅಸಿಸ್ಟೆಂಟ್‌ ಎಕ್ಸಿಕ್ಯೂಟಿವ್‌ ಎಂಜಿನಿಯರ್‌ ಹನುಮಂತರಾಯಪ್ಪ ಹಾಗೂ ಎಂಜಿನಿಯರ್‌ ರತ್ನಾಕರ ಗುರುವಾರ ಭೇಟಿ ನೀಡಿ ರಸ್ತೆಯ ಸ್ಥಿತಿಗತಿ ಪರಿಶೀಲಿಸಿದರು. ಇನ್ನೆರಡು ದಿನಗಳಲ್ಲಿ ಈ ರಸ್ತೆಯನ್ನು ತಾತ್ಕಾಲಿಕವಾಗಿ ದುರಸ್ತಿಪಡಿಸುವ ಭರವಸೆಯನ್ನು ಗ್ರಾಮಸ್ಥರಿಗೆ ನೀಡಿದರು. ಕಂದ್ರಪ್ಪಾಡಿ ಇತರೆ ಭಾಗಗಳಿಗೆ ಸಂಪರ್ಕ ಕಲ್ಪಿಸುವ ಗುತ್ತಿಗಾರು- ಮೆಟ್ಟಿನಡ್ಕ ಕ್ರಾಸ್‌ ಬಳಿಯಿಂದ ಪೂಜಾರಿಮನೆ ತನಕದ ರಸ್ತೆ ಸಂಪೂರ್ಣ ಹದಗೆಟ್ಟು ಸಂಚಾರಕ್ಕೆ ಅಯೋಗ್ಯವಾಗಿತ್ತು. ಈ ರಸ್ತೆಯನ್ನು ನಮ್ಮ ಗ್ರಾಮ ನಮ್ಮ ರಸ್ತೆ ಯೋಜನೆಯಡಿ ಶಾಶ್ವತವಾಗಿ ಅಭಿವೃದ್ಧಿಪಡಿಸಲು 1.43 ಕೋಟಿ ರೂ. ಅನುದಾನ ಮೀಸಲಿರಿಸಿದ್ದರೂ ಕಾಮಗಾರಿ ಆರಂಭವಾಗಿರಲಿಲ್ಲ. 

ಈ ಭಾಗದಲ್ಲಿ ಮಳೆ ಪ್ರಮಾಣ ತೀವ್ರವಾಗಿದ್ದ ಕಾರಣ ಈ ಸಂಪರ್ಕ ರಸ್ತೆ ಪೂರ್ತಿ ಹೊಂಡಗಳು ನಿರ್ಮಾಣವಾಗಿ ಸಂಚರಿಸಲು ಸಾಧ್ಯವೇ ಇಲ್ಲ ಎನ್ನುವ ಸ್ಥಿತಿಗೆ ತಲುಪಿತ್ತು. ಈ ಕುರಿತು ಸ್ಥಳಿಯರು ಜನಪ್ರತಿನಿ ಗಳ, ಅಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜನ ಆಗಿರಲಿಲ್ಲ. ಈ ರಸ್ತೆ ಅವ್ಯವಸ್ಥೆ ಮತ್ತು ಹದಗೆಟ್ಟ ರಸ್ತೆಯಲ್ಲಿ ಸಂಚಾರ ವೇಳೆ ಸಾರ್ವಜನಿಕ ಪ್ರಯಾಣಿಕರು ಶಾಲಾ ಮಕ್ಕಳು ಅನುಭವಿಸುತ್ತಿರುವ ಯಾತನೆ ಕುರಿತು ಜು. 18ರಂದು ಉದಯವಾಣಿ ಸುದಿನದಲ್ಲಿ ವಿಸ್ತೃತ ವರದಿ ಪ್ರಕಟಿಸಿ, ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕೆ ತಂದಿತ್ತು. ಇದಕ್ಕೆ ಸ್ಪಂದಿಸಿದ ಜಿ.ಪಂ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ, ಮುಂದಿನ ಎರಡು ದಿನಗಳಲ್ಲಿ ಈ ರಸ್ತೆಯನ್ನು ತಾತ್ಕಾಲಿಕವಾಗಿ ದುರಸ್ತಿಗೊಳಿಸಲಾಗುವುದು ಎಂಬ ಭರವಸೆಯನ್ನು ಸ್ಥಳೀಯ ಗ್ರಾಮಸ್ಥರಿಗೆ ನೀಡಿದ್ದಾರೆ.

ಫಲಾನುಭವಿಗಳಾದ ಚಂದ್ರಶೇಖರ ಕಡೋಡಿ, ರವೀಂದ್ರ ಕೂಡಂಬು, ಸುನೀಲ್‌ ಅಮೆ, ಯತೀಶ್‌ ಪಾರೆಪ್ಪಾಡಿ, ಮೋಹನ ಮುಕ್ಕೂರು, ಪ್ರವೀಣ ಪಂಜಿಪಳ್ಳ, ಪ್ರಶಾಂತ ಬಳ್ಳಡ್ಕ, ವಸಂತ ಛತ್ರಪ್ಪಾಡಿ. ವಿನೋದ ಛತ್ರಪ್ಪಾಡಿ, ಉದಯ ಹಾಲೆಮಜಲು, ವಿನಯ ಕುತ್ಯಾಳ, ರಾಧಾಕೃಷ್ಣ ಹೊಸೋಳಿಕೆ, ವಿಶ್ವನಾಥ ಆಚಳ್ಳಿ ಉಪಸ್ಥಿತರಿದ್ದರು.