Pune: ಮೂರು ಕಾಲಿನ ಹಸುವಿಗೆ ಕೃತಕ ಕಾಲು ತೊಡಿಸಿದ ಪುಣೆ ಆಸ್ಪತ್ರೆ!

ಪುಣೆ: ನಡೆಯಲಾಗದೇ ಕಷ್ಟಪಡುತ್ತಿದ್ದ ಪುಣೆಯ ಗ್ರಾಮವೊಂದರ 3 ಕಾಲಿನ ಹಸುವಿಗೆ ಮರು ಜನ್ಮ ಸಿಕ್ಕಿದೆ. ನಗರದ ಸಂಚೇತಿ ಆಸ್ಪತ್ರೆ ವೈದ್ಯರ ತಂಡವು ಈ ಹಸುವಿಗೆ ಶಸ್ತ್ರಚಿಕಿತ್ಸೆ ನಡೆಸಿ ಕೃತಕ ಕಾಲನ್ನು ಉಚಿತವಾಗಿ ಅಳವಡಿಸುವ ಮೂಲಕ ನೆರವಾಗಿದೆ.

ಆ.2ರಂದು ಈ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ. ಮೊದಲೇ ದುರ್ಬಲವಾಗಿದ್ದ ಬೀದಿ ಹಸುವನ್ನು ಚೌಫುಲಾದಲ್ಲಿನ ಪ್ರಾಣಿಗಳ ಆಶ್ರಯ ತಾಣದಿಂದ ರಕ್ಷಣೆ ಮಾಡಲಾಗಿತ್ತು. ಬಳಿಕ ಆಸ್ಪತ್ರೆಯ ಪ್ರಾಸ್ಥೆಟಿಕ್‌ ಮತ್ತು ಆಥೋìಟಿಕ್ಸ್‌ ವಿಭಾಗವನ್ನು ಸಂಪರ್ಕಿಸಿ ಗಮನಕ್ಕೆ ತರಲಾಯಿತು. ಇಲ್ಲಿ ಮನುಷ್ಯರಿಗೆ ಕೃತಕ ಕಾಲುಗಳನ್ನು ತಯಾರಿಸಲಾಗುತ್ತದೆಯಾದರೂ ಆಸ್ಪತ್ರೆಯು ಮಾನವೀಯತೆ ಮೆರೆದು ಈ ಹಸುವಿಗೂ ಉಚಿತವಾಗಿ ಶಸ್ತ್ರಚಿಕಿತ್ಸೆ ಮಾಡಿ ನೆರವಿಗೆ ಬಂದಿದೆ.

ನಮ್ಮ ವೈದ್ಯರ ತಂಡ ಹಸುವಿನ ಅಂಗರಚನಾಶಾಸ್ತ್ರವನ್ನು ಅಧ್ಯಯನ ಮಾಡಿ, ಕಾಲಿನ ವಿನ್ಯಾಸ ಸಿದ್ಧಪಡಿಸಿತು. ಈಗ ಹಸು ನಿಲ್ಲಲು ಸಮರ್ಥವಾಗಿರುವುದಲ್ಲದೆ, ನಿಧಾನವಾಗಿ ನಡೆಯುತ್ತಿದೆ ಎಂದು ವೈದ್ಯರು ಹೇಳಿದ್ದಾರೆ.