“ಎ’ತಂಡಗಳ ಟೆಸ್ಟ್‌ ಪಂದ್ಯ: ಭಾರತದ ಬ್ಯಾಟಿಂಗ್‌ ಮೇಲುಗೈ

ಮೌಂಟ್‌ ಮೌಂಗನುಯಿ (ನ್ಯೂಜಿಲ್ಯಾಂಡ್‌): ಆತಿಥೇಯ ನ್ಯೂಜಿಲ್ಯಾಂಡ್‌ “ಎ’ ವಿರುದ್ಧ ಆರಂಭಗೊಂಡಿರುವ 4 ದಿನಗಳ ಅನಧಿಕೃತ ಟೆಸ್ಟ್‌ ಪಂದ್ಯದಲ್ಲಿ ಭಾರತ “ಎ’ ತಂಡ ಉತ್ತಮ ಮಟ್ಟದ ಬ್ಯಾಟಿಂಗ್‌ ಪ್ರದರ್ಶಿಸಿದೆ. ಮೊದಲ ದಿನದಾಟದ ಅಂತ್ಯಕ್ಕೆ 5 ವಿಕೆಟ್‌ ಕಳೆದುಕೊಂಡು 340 ರನ್‌ ಪೇರಿಸಿದೆ.

ಪೃಥ್ವಿ ಶಾ, ಮಾಯಾಂಕ್‌ ಅಗರ್ವಾಲ್‌, ಹನುಮ ವಿಹಾರಿ ಮತ್ತು ಪಾರ್ಥಿವ್‌ ಪಟೇಲ್‌ ಅವರ ಅರ್ಧ ಶತಕ ಭಾರತ ಸರದಿಯ ಆಕರ್ಷಣೆ ಆಗಿತ್ತು. ಆರಂಭಕಾರ ಶಾ 62 ರನ್‌ ಹೊಡೆದರು (88 ಎಸೆತ, 6 ಬೌಂಡರಿ, 1 ಸಿಕ್ಸರ್‌). ಶಾ-ಮುರಳಿ ವಿಜಯ್‌ (28) ಮೊದಲ ವಿಕೆಟ್‌ ಜತೆಯಾಟದಲ್ಲಿ 61 ರನ್‌ ಒಟ್ಟುಗೂಡಿತು.

ವನ್‌ಡೌನ್‌ನಲ್ಲಿ ಬ್ಯಾಟ್‌ ಹಿಡಿದು ಬಂದ ಮಾಯಾಂಕ್‌ ಅಗರ್ವಾಲ್‌ ಹೆಚ್ಚು ಆಕ್ರಮಣಕಾರಿ ಆಟ ಪ್ರದರ್ಶಿಸಿದರು. ಅವರ ಗಳಿಕೆ 65 ರನ್‌. 108 ಎಸೆತ ಎದುರಿಸಿದ ಅಗರ್ವಾಲ್‌ 2 ಸಿಕ್ಸರ್‌ ಹಾಗೂ 10 ಬೌಂಡರಿ ಸಿಡಿಸಿದರು.

ನೂರೈವತ್ತು ಎಸೆತಗಳಿಂದ 86 ರನ್‌ ಮಾಡಿದ ಹನುಮ ವಿಹಾರಿ ಸದ್ಯ ಭಾರತೀಯ ಸರದಿಯ ಟಾಪ್‌ ಸ್ಕೋರರ್‌ ಆಗಿದ್ದಾರೆ (8 ಬೌಂಡರಿ). ಕೀಪರ್‌ ಪಾರ್ಥಿವ್‌ ಪಟೇಲ್‌ 79 ರನ್‌ ಮಾಡಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ (111 ಎಸೆತ, 10 ಬೌಂಡರಿ). ಆದರೆ ನಾಯಕ ರಹಾನೆ ಬ್ಯಾಟಿಂಗ್‌ ವೈಫ‌ಲ್ಯ ಅನುಭವಿಸಿದರು (12). ವಿಹಾರಿ ಔಟಾದೊಡನೆ ದಿನದಾಟವನ್ನು ಕೊನೆಗೊಳಿಸಲಾಯಿತು. ಆಗ 2 ಎಸೆತವಷ್ಟೇ ಬಾಕಿ ಉಳಿದಿತ್ತು.