Bantwal ಸ್ಕೂಟರಿಗೆ ಢಿಕ್ಕಿ ಹೊಡೆದ ಲಾರಿ ಪರಾರಿ; ಬೆನ್ನಟ್ಟಿ ಹಿಡಿದ ಪೊಲೀಸ್‌ ಸಿಬಂದಿ

ಬಂಟ್ವಾಳ: ರಾ.ಹೆ.75ರ ಬಿ.ಸಿ.ರೋಡು ಪೇಟೆಯಲ್ಲಿ ಲಾರಿಯೊಂದು ಸ್ಕೂಟರಿಗೆ ಹಿಂಬದಿಯಿಂದ ಢಿಕ್ಕಿ ಹೊಡೆದು ಪರಾರಿಯಾಗಿ ಬಳಿಕ ಬಂಟ್ವಾಳ ಸಂಚಾರ ಪೊಲೀಸ್‌ ಸಿಬಂದಿ ಲಾರಿಯನ್ನು ಬೈಕಿನಲ್ಲಿ ಬೆನ್ನಟ್ಟಿ ಅಡ್ಡ ಹಾಕಿ ಲಾರಿ ಸಹಿತ ಚಾಲಕನನ್ನು ಹಿಡಿದ ಘಟನೆ ಶುಕ್ರವಾರ ನಡೆದಿದೆ.

ಬಿ.ಸಿ.ರೋಡಿನ ಕೈಕುಂಜೆ ಕ್ರಾಸ್‌ ಬಳಿ ಸವಾರ ಗಿರಿಯಪ್ಪ ಮೂಲ್ಯ ಜಾರಂದಗುಡ್ಡೆ ಅವರ ಸ್ಕೂಟರಿಗೆ ಮಂಗಳೂರು ಭಾಗದಿಂದ ಆಗಮಿಸುತ್ತಿದ್ದ ಈಶರ್‌ ಲಾರಿ ಢಿಕ್ಕಿ ಹೊಡೆದಿದ್ದು, ಘಟನೆಯಲ್ಲಿ ಸ್ಕೂಟರಿನ ಪಲ್ಟಿಯಾಗಿ ಹಿಂಬದಿ ಜಖಂಗೊಂಡಿರುವ ಜತೆಗೆ ಸವಾರ ಗಾಯಗೊಂಡಿದ್ದರು.

ಆದರೆ ಚಾಲಕ ಲಾರಿಯನ್ನು ನಿಲ್ಲಿಸದೆ ಪರಾರಿಯಾಗಿದ್ದು, ಅಪಘಾತದ ವಿಚಾರ ತಿಳಿಯುತ್ತಿದ್ದಂತೆ ಪೇಟೆಯಲ್ಲಿ ಸಂಚಾರ ನಿಯಂತ್ರಣದ ಕರ್ತವ್ಯ ನಿರ್ವಹಿಸುತ್ತಿದ್ದ ಪೊಲೀಸ್‌ ಸಿಬಂದಿ ರಾಜು ಪೂಜಾರಿ ಅವರು ಲಾರಿಯನ್ನು ಬೆನ್ನಟ್ಟಿ ಬಂಟ್ವಾಳ ಬಸ್ತಿಪಡ್ಪು ಬಳಿ ಅಡ್ಡ ಹಾಕಿ ವಶಕ್ಕೆ ಪಡೆದಿದ್ದಾರೆ. ಘಟನೆಯ ಕುರಿತು ಬಂಟ್ವಾಳ ಸಂಚಾರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.