ರೌಡಿಗಳ ಗ್ಯಾಂಗ್‌ವಾರ್‌; ಇಬ್ಬರ ಸಾವು

ಬೆಂಗಳೂರು: ಭಾನುವಾರ ತಡರಾತ್ರಿ ಸುಬ್ರಹ್ಮಣ್ಯಪುರ ಠಾಣಾ ವ್ಯಾಪ್ತಿಯಲ್ಲಿ ಎರಡು ರೌಡಿಶೀಟರ್‌ಗಳ ನಡುವೆ ನಡೆದ ಮಾರಾಮಾರಿಯಲ್ಲಿ ಗಾಯಗೊಂಡಿದ್ದ ಮತ್ತೂಬ್ಬ ರೌಡಿಶೀಟರ್‌ ಕೂಡ ಚಿಕಿತ್ಸೆ ಫಲಕಾರಿಯಾಗದೇ ಸೋಮವಾರ ಮೃತಪಟ್ಟಿದ್ದಾನೆ. ಸುಬ್ರಹ್ಮಣ್ಯಪುರದ ಮನೋಜ್‌ ಕೊಲೆಯಾದ ಮತ್ತೂಬ್ಬ ರೌಡಿಶೀಟರ್‌. ಭಾನು ವಾರ ರಾತ್ರಿ ರೌಡಿ ಮುಕುಂದ ಅಲಿಯಾಸ್‌ ಕರಿಹಂದಿ ಎಂಬಾತ ಕೊಲೆಯಾಗಿದ್ದ ಎಂದು ಪೊಲೀಸರು ಹೇಳಿದರು.

ಹನುಮಂತ ನಗರದ ರೌಡಿಶೀಟರ್‌ ಮುಕುಂದ ಹಾಗೂ ಶ್ರೀನಗರದ ರೌಡಿಶೀಟರ್‌ ರಜತ್‌ ಅಲಿಯಾಸ್‌ ರಜ್ಜು ಎಂಬಾತನ ತಂಡಗಳ ನಡುವೆ ನಾಲ್ಕೈದು ವರ್ಷಗಳಿಂದ ದ್ವೇಷ ಇದೆ. ಎರಡು ವರ್ಷಗಳ ಹಿಂದೆ ಮುಕುಂದನ ಸಹಚರರು ರಜತ್‌ ಹತ್ಯೆಗೆ ಯತ್ನಿಸಿದ್ದರು. ಈ ವೇಳೆ ಮಾರಣಾಂತಿಕ ಹಲ್ಲೆಗೊಳಗಾಗಿ ರಜತ್‌ ಪ್ರಾಣಾಪಾಯದಿಂದ ಪಾರಾಗಿದ್ದ. ಅಂದಿನಿಂದಲೂ ರಜತ್‌, ಮುಕುಂದನ ಕೊಲೆಗೆ ಸಂಚು ರೂಪಿಸುತ್ತಲೇ ಇದ್ದ. ಮುಕುಂದನ ಸಹಚರರ ಮೇಲೂ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿದ್ದ.

ಹೀಗೆ ಎರಡು ಗ್ಯಾಂಗ್‌ನ ನಡುವೆ ದ್ವೇಷ ಮುಂದುವರಿದಿತ್ತು. ಈ ದ್ವೇಷಕ್ಕೆ ಅಂತ್ಯ ಹಾಡಲು ಎರಡು ಗ್ಯಾಂಗ್‌ನವರು ರಾಜಿಗೆ ಮುಂದಾಗಿದ್ದರು. ರಾಜಿ ಮಾಡಿಕೊಳ್ಳುವ ಸಲುವಾಗಿಯೇ ಭಾನುವಾರ ರಾತ್ರಿ ನಾಗಪ್ಪ ಲೇಔಟ್‌ನಲ್ಲಿ ಸೇರಿದ್ದರು. ಮುಕುಂದ ಮತ್ತು ರಜತ್‌ ಬರಿಗೈಲಿ ಬಂದರೂ ಅವರ ಸಹಚರರ ಬಳಿ ಮಾರಕಾಸ್ತ್ರಗಳಿದ್ದವು. ಪರಸ್ಪರ ಎರಡು ಗ್ಯಾಂಗ್‌ನವರು ಮಾರಕಾಸ್ತ್ರಗಳನ್ನು ನೋಡಿದ ಕೂಡಲೇ ಪರಸ್ಪರ ದಾಳಿಗೆ ಇಳಿದಿದ್ದರು. ರಾಜಿಗೆಂದು ಕರೆಸಿ ಮನೋಜ್‌ ಕೊಲೆಗೆ ಸ್ಕೆಚ್‌ ಹಾಕಿದ್ದಾನೆ ಎಂದು ಮುಕುಂದನ ಕಡೆಯವರು ಭಾವಿಸಿ ಪ್ರತಿ ದಾಳಿ ನಡೆಸಿದ್ದಾರೆ. ಪರಿಣಾಮ ರಜತ್‌ ಗ್ಯಾಂಗ್‌ನ ಮನೋಜ್‌ ಮತ್ತು ಮುಕುಂದ ಇಬ್ಬರೂ ಕೊಲೆ ಆಗಿದ್ದಾರೆ.

ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳ ಪತ್ತೆಗೆ ಶೋಧ ನಡೆಸಲಾಗುತ್ತಿದೆ ಎಂದು ಪೊಲೀಸರು ಹೇಳಿದರು.