ಏಷ್ಯಾ ಕಪ್‌ ಹಾಕಿವೀರರಿಗೆ ಸಂಭ್ರಮದ ಸ್ವಾಗತ, ಸಮ್ಮಾನ

ಬೆಂಗಳೂರು: ಇತ್ತೀಚೆ ಗಷ್ಟೇ ಜಪಾನ್‌ನಲ್ಲಿ ನಡೆದ ವನಿತಾ ಜೂನಿಯರ್‌ ಏಷ್ಯಾ ಕಪ್‌ ಹಾಕಿ ಪಂದ್ಯಾವಳಿಯಲ್ಲಿ ಪ್ರಶಸ್ತಿ ಗೆದ್ದ ಭಾರತೀಯ ತಂಡ ಮಂಗಳವಾರ ಬೆಂಗಳೂರಿನ ಕೆಂಪೇಗೌಡ ಅಂತಾ ರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿಯಿತು. ಈ ವೇಳೆ ಭಾರತೀಯ ಕ್ರೀಡಾ ಪ್ರಾಧಿಕಾರದ ಅಧಿಕಾರಿಗಳು ಆಟಗಾರ್ತಿಯರನ್ನು ಸ್ವಾಗತಿಸಿದರು. ವಿಮಾನ ನಿಲ್ದಾಣದಲ್ಲಿದ್ದ ಇತರ ಜನರು ಆಟಗಾರ್ತಿಯರ ಸುತ್ತ ನೆರೆದು ಸೆಲ್ಫಿ ತೆಗೆದುಕೊಂಡರು.

ಈ ಸ್ವಾಗತ ನೋಡಿ ಆಟಗಾರ್ತಿ ಯರು ಸಂಭ್ರಮಗೊಂಡರು. ಈ ಬಗ್ಗೆ ಪ್ರತಿಕ್ರಿಯಿಸಿದ ನಾಯಕಿ ಪ್ರೀತಿ, “ಈ ಸ್ವಾಗತ ನೋಡಿ ನಾವೆಲ್ಲ ಬಹಳ ಸಂತಸಗೊಂಡಿದ್ದೇವೆ. ಇಡೀ ಕೂಟದಲ್ಲಿ ನಮಗೆ ಬಹಳ ಪ್ರೀತಿ, ಬೆಂಬಲ ಸಿಕ್ಕಿತ್ತು. ಇಂಥದ್ದೊಂದು ಸ್ವಾಗತವನ್ನು ನಾವು ಊಹಿಸಿಯೂ ಇರಲಿಲ್ಲ. ವಿಮಾನ ನಿಲ್ದಾಣದಿಂದ ಹಿಡಿದು ಹೋದ ಕಡೆಯಲ್ಲೆಲ್ಲ ನಮ್ಮ ಸಾಧನೆಗೆ ಬಹಳ ಮೆಚ್ಚುಗೆ ದೊರಕಿದೆ’ ಎಂದರು.

ಸಮ್ಮಾನ, ಅಭಿಮಾನ
ಬಳಿಕ ಬೆಂಗಳೂರಿನ ಭಾರತೀಯ ಕ್ರೀಡಾ ಪ್ರಾಧಿಕಾರದಲ್ಲಿ ಹಾಕಿ ಸಾಧಕಿ ಯರನ್ನು ಸಮ್ಮಾನಿಸಲಾ ಯಿತು. ಇವರಲ್ಲಿ 17 ಮಂದಿ ಖೇಲೋ ಇಂಡಿಯಾ ಕ್ರೀಡಾಪಟು ಗಳಾಗಿದ್ದರು. ಎಲ್ಲರೂ ವಿವಿಧ ಸಾಯ್‌ ನ್ಯಾಶನಲ್‌ ಸೆಂಟರ್‌ ಆಫ್ ಎಕ್ಸಲೆನ್ಸ್‌ನ ಭಾಗವಾ ಗಿದ್ದರು. ಆಯ್ಕೆ ಸಿದ್ಧತೆ, ತರಬೇತಿಯೆಲ್ಲ ಬೆಂಗಳೂರಿನಲ್ಲೇ ನಡೆದಿತ್ತು. ಈ ತಂಡ ವೀಗ ಚಾಂಪಿಯನ್‌ ಆಗಿ ಹೊರಹೊಮ್ಮಿರುವುದು ಬೆಂಗ ಳೂರಿನ ಪಾಲಿಗೂ ಹೆಮ್ಮೆಯ ಸಂಗತಿಯಾಗಿದೆ.

“ನಮ್ಮ ಸಮಸ್ಯೆಗಳೇನೇ ಇದ್ದರೂ ಬೆಂಗಳೂರಿನ ಸಾಯ್‌ ಕೇಂದ್ರಕ್ಕೆ ಒಂದು ಕರೆ ಮಾಡಿದರೆ ಸಾಕಿತ್ತು, ಸಮಸ್ಯೆ ಕೂಡಲೇ ಬಗೆಹರಿಯುತ್ತಿತ್ತು. ನಮ್ಮ ನೆರವಿಗೆ ನಿಂತ ಬೆಂಗಳೂರಿನ ಸಾಯ್‌ ಕೇಂದ್ರದ ಪ್ರತಿಯೊಬ್ಬರಿಗೂ ಧನ್ಯವಾದಗಳು’ ಎಂಬುದಾಗಿ ನಾಯಕಿ ಪ್ರೀತಿ ಹೇಳಿದರು.

ಭಾರತ ಈ ಪಂದ್ಯಾವಳಿಯನ್ನು ಅಜೇಯವಾಗಿ ಮುಗಿಸಿತ್ತು. ಆಡಿದ 6 ಪಂದ್ಯಗಳಲ್ಲಿ ಐದನ್ನು ಜಯಿಸಿತ್ತು. ದಕ್ಷಿಣ ಕೊರಿಯಾ ವಿರುದ್ಧ ಡ್ರಾ ಸಾಧಿಸಿತ್ತು. ಬಳಿಕ ಫೈನಲ್‌ನಲ್ಲಿ 4 ಬಾರಿಯ ಚಾಂಪಿಯನ್‌ ದಕ್ಷಿಣ ಕೊರಿಯಾವನ್ನೇ ಮಣಿಸಿ ಇತಿಹಾಸ ನಿರ್ಮಿಸಿತು.