ಜಮ್ಮು ಕಾಶ್ಮೀರದಲ್ಲಿ ಈ ತನಕ 800 ಉಗ್ರರ ಹತ್ಯೆ : ಕೇಂದ್ರ ಸರಕಾರ

ಹೊಸದಿಲ್ಲಿ : 2014ರ ಬಳಿಕ ಈ ವರೆಗೆ ಜಮ್ಮ ಕಾಶ್ಮೀರದಲ್ಲಿ 800 ಉಗ್ರರ ಹತ್ಯೆಗೈಯಲಾಗಿದೆ. 2018ರಲ್ಲಿ 249 ಉಗ್ರರನ್ನು ಹತ್ಯೆಗೈಯಲಾಗಿದೆ ಎಂದು ಕೇಂದ್ರ ಸರಕಾರ ಇಂದು ಬುಧವಾರ ಸಂಸತ್ತಿಗೆ ತಿಳಿಸಿತು.

ಲೋಕಭೆಗೆ ನೀಡಿದ ಲಿಖೀತ ಉತ್ತರದಲ್ಲಿ ಕೇಂದ್ರ ಸಹಾಯಕ ರಕ್ಷಣಾ ಸಚಿವ ಶ್ರೀಪಾದ್‌ ನಾಯಕ್‌ ಅವರು 2014ರಲ್ಲಿ 104, 2015ರಲ್ಲಿ 97, 2016ರಲ್ಲಿ 140 ಮತ್ತು 2017ರಲ್ಲಿ 210 ಉಗ್ರರನ್ನು ಹತ್ಯೆಗೈಯಲಾಗಿದೆ ಎಂದು ಹೇಳಿದರು.

ಗಡಿ ನಿಯಂತ್ರಣ ಉದ್ದಕ್ಕೂ ಭಾರತೀಯ ಸೇನೆ ಉಗ್ರ ಚಟುವಟಿಕೆಗಳನ್ನು ನಿರ್ನಾಮ ಮಾಡಲು ನಿರಂತರ ಕಾರ್ಯಾಚರಣೆ ನಡೆಸುತ್ತಿದೆ; ಅಂತೆಯೇ ಜಮ್ಮು ಕಾಶ್ಮೀರದ ಒಳಗೆ ಅಡಗಿರುವ ಉಗ್ರರನ್ನು ಶೋಧಿಸಿ ಮಟ್ಟ ಹಾಕುವ ಕಾರ್ಯಾಚರಣೆಯನ್ನು ಕೂಡ ನಿರಂತರವಾಗಿ ಮಾಡುತ್ತಿದೆ ಎಂದು ಸಚಿವರು ಹೇಳಿದರು.