ಕೆರೆಗಳ ಸಂರಕ್ಷಣೆಗೆ 150 ಗೃಹ ರಕ್ಷಕರ ನೇಮಕ

ಬೆಂಗಳೂರು: ಬೆಂಗಳೂರು ನಗರ ಹಾಗೂ ಗ್ರಾಮಾಂತರ ಪ್ರದೇಶ ವ್ಯಾಪ್ತಿಯ ಕೆರೆಗಳ ಸಂರಕ್ಷಣೆಗೆ ಹೆಚ್ಚುವರಿಯಾಗಿ 150 ಜನ ಗೃಹರಕ್ಷಕ ದಳ ಸಿಬ್ಬಂದಿಯನ್ನು ನೇಮಿಸಿಕೊಳ್ಳಲು ಪಾಲಿಕೆ ಮುಂದಾಗಿದೆ.

ಕೋವಿಡ್ ಸೋಂಕು ತಡೆ ಹಾಗೂ ಭತ್ಯೆ ಮಂಜೂರಾತಿ ಸೇರಿದಂತೆ ಕೆಲವು ನಿರ್ದಿಷ್ಟ ಷರತ್ತುಗಳನ್ನು ವಿಧಿಸಿ ಗೃಹರಕ್ಷಕ ದಳ ಪಾಲಿಕೆಗೆ ಗೃಹರಕ್ಷಕ ದಳದ 150 ಜನ ಸಿಬ್ಬಂದಿ ಸೇವೆ ನೀಡಲು ಒಪ್ಪಿಗೆ ನೀಡಿದೆ. ಬೆಂಗಳೂರು ಉತ್ತರ, ದಕ್ಷಿಣ, ಗ್ರಾಮಾಂತರ ಸೇರಿ ಈಗಾಗಲೇ 438 ಜನ ಗೃಹರಕ್ಷಕ ದಳ ಸಿಬ್ಬಂದಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಹೊಸದಾಗಿ 150 ಸಿಬ್ಬಂದಿಯನ್ನು 2021ರ ಜ.31ರವರೆಗೆ ಪಾಲಿಕೆ ನೇಮಕ ಮಾಡಿಕೊಂಡಿದೆ.ಕೆರೆಗಳಿಗೆ ಕಸ, ಕಟ್ಟಡ ತ್ಯಾಜ್ಯ ಹಾಗೂ ಕೊಳಚೆ ನೀರು ಬಿಡುವುದು, ಕೆರೆ ವ್ಯಾಪ್ತಿ ಯ ಪಾರ್ಕ್‌ ಹಾಳಾಗದಂತೆ ಹಾಗೂ ಕೆರೆಗಳ ಸುತ್ತ ಹಾಕಲಾಗಿರುವ ತಂತಿಗಳನ್ನು ಯಾರು ಹಾಳು ಮಾಡದಂತೆ ಎಚ್ಚರ ವಹಿಸುವ ಕೆಲಸವನ್ನು ಗೃಹರಕ್ಷಕ ದಳದ ಸಿಬ್ಬಂದಿ ಮಾಡಲಿದ್ದಾರೆ.

ಕೆರೆ ಒತ್ತುವರಿ ತೆರವು; ಐದು ಬಾರಿ ಸರ್ಕಾರಕ್ಕೆ ಪತ್ರ :  ನಗರದಲ್ಲಿಕೆರೆ ಒತ್ತುವರಿ ತೆರವಿಗೆ ತಹಶೀಲ್ದಾರರನ್ನು ನಿಯೋಜನೆ ಮಾಡುವಂತೆ ಪಾಲಿಕೆ ಸರ್ಕಾರಕ್ಕೆ ಸತತ ಐದನೇ ಬಾರಿ ಪತ್ರ ಬರೆದಿದೆ. ಆದರೆ, ಸರ್ಕಾರದಿಂದ ಈ ವರೆಗೆ ಯಾವುದೇ ಉತ್ತರ ಸಿಕ್ಕಿಲ್ಲ.ಕೆರೆ ಒತ್ತುವರಿ ತೆರವು ಮಾಡಲು ಕೆಲವು ತಹಶೀಲ್ದಾರರಿಗೆ ಮ್ಯಾಜಿಸ್ಟ್ರೇಟ್‌ ಅಧಿಕಾರ ನೀಡಲಾಗಿದ್ದು, ಪಾಲಿಕೆಯಲ್ಲಿ ವರದಿ ಮಾಡಿಕೊಳ್ಳುವಂತೆ ನಿರ್ದೇಶಿಸಲಾಗಿದೆ. ಆದರೆ, ಇಲ್ಲಿಯವರೆಗೆ ಯಾವುದೇ ತಹಶೀಲ್ದಾರರು ಪಾಲಿಕೆಗೆ ವರದಿ ಮಾಡಿಕೊಂಡಿಲ್ಲ. ಈ ಸಂಬಂಧ ನಗರಾಭಿವೃದ್ಧಿ ಇಲಾಖೆಗೂ ಪತ್ರ ಬರೆಯಲಾಗಿದೆ. ಹೀಗಾಗಿ,ಕೆರೆ ಒತ್ತುವರಿ ತೆರವುಕಾರ್ಯಾಚರಣೆಗೆ ಹಿನ್ನಡೆ ಆಗಿದೆ ಎಂದು ಹೆಸರು ಹೇಳಲು ಇಚ್ಛಿಸದ ಪಾಲಿಕೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ನೇಮಕಕ್ಕೆಗೃಹರಕ್ಷಕ ದಳದ ಷರತ್ತುಗಳು :

• ಗೃಹರಕ್ಷಕ ದಳ ಸಿಬ್ಬಂದಿಗೆ ಮಾಸ್ಕ್, ಸ್ಯಾನಿಟೈಸರ್‌ ಹಾಗೂ ಗ್ಲೌಸ್‌ ನೀಡಬೇಕು.
• ಸಿಬ್ಬಂದಿಗೆ ನಿತ್ಯ 455 ರೂ. ವೇತನ, 80 ರೂ. ಭತ್ಯೆ ನೀಡಬೇಕು. ಕರ್ತವ್ಯ ಅವಧಿ 8 ಗಂಟೆ ಮೀರಬಾರದು.
• ಸೋಂಕಿನ ಲಕ್ಷಣಗಳು ಕಂಡುಬಂದರೆ ಸ್ವ್ಯಾಬ್‌ ಟೆಸ್ಟ್‌ ಮಾಡಿಸಬೇಕು ಎಂಬದು ಸೇರಿದಂತೆ ಹಲವು ಷರತ್ತು ವಿಧಿಸಲಾಗಿದೆ.