ಮಕ್ಕಳ ಲಸಿಕೆಗೆ ಈ ವಾರವೇ ಒಪ್ಪಿಗೆ?

ನವದೆಹಲಿ/ವಾಷಿಂಗ್ಟನ್‌: ಝೈಡಸ್‌ ಕ್ಯಾಡಿಲಾ ಕಂಪನಿಯ ಲಸಿಕೆಗೆ ಈ ವಾರವೇ ತುರ್ತು ಬಳಕೆಗೆ ಒಪ್ಪಿಗೆ ಸಿಗುವ ಸಾಧ್ಯತೆ ಅಧಿಕವಾಗಿದೆ. ಈ ಕಂಪನಿಯು ಭಾರತದಲ್ಲಿ 12-18 ವಯೋಮಾನದವರೂ ಸೇರಿದಂತೆ ಭಾರೀ ಸಂಖ್ಯೆಯ ಜನರ ಮೇಲೆ ದೊಡ್ಡ ಮಟ್ಟದ ಕ್ಲಿನಿಕಲ್‌ ಟ್ರಯಲ್‌ ನಡೆಸಿದೆ. ಝೈಕೋವ್‌-ಡಿ ಲಸಿಕೆಗೆ ಒಪ್ಪಿಗೆ ಸಿಕ್ಕಿದರೆ, ದೇಶದಲ್ಲಿ 12-18ರ ವಯೋಮಾನದವರಿಗೆ ದೊರಕುವ ಮೊದಲ ಲಸಿಕೆ ಇದಾಗಲಿದೆ.

ಝೈಕೋವ್‌-ಡಿ ಎನ್ನುವುದು ಮೂರು ಡೋಸ್‌ನ ಲಸಿಕೆಯಾಗಿದೆ. ಇದನ್ನು ಟ್ರೋಪಿಸ್‌ ಎಂಬ ಸೂಜಿರಹಿತ ವ್ಯವಸ್ಥೆ ಮೂಲಕ ನೀಡಲಾಗುತ್ತದೆ. ಇದರಿಂದಾಗಿ ಅಡ್ಡ ಪರಿಣಾಮವೂ ಕಡಿಮೆಯಿರುತ್ತದೆ ಎಂದು ಹೇಳಲಾಗಿದೆ.

35,499 ಪ್ರಕರಣ:
ಭಾನುವಾರದಿಂದ ಸೋಮವಾರಕ್ಕೆ ದೇಶದಲ್ಲಿ 35,499 ಮಂದಿಗೆ ಸೋಂಕು ತಗುಲಿದ್ದು 447 ಮಂದಿ ಸಾವಿಗೀಡಾಗಿದ್ದಾರೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ 4,02,188ಕ್ಕಿಳಿದಿದೆ. ಗುಣಮುಖ ಪ್ರಮಾಣ ಶೇ.97.39ಕ್ಕೇರಿಕೆಯಾಗಿದೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ಮಾಹಿತಿ ನೀಡಿದೆ.

ಇದನ್ನೂ ಓದಿ:ತಿಂಗಳಂತ್ಯದಲ್ಲಿ ವಿದ್ಯಾಗಮ ನಿರ್ಧಾರ: ಶಿಕ್ಷಣ ಸಚಿವ ನಾಗೇಶ್‌

ಐಸಿಯು ಬೆಡ್‌ಗೂ ಪರದಾಟ!
ಅಮೆರಿಕದಲ್ಲಿ ಕೋವಿಡ್‌ ಡೆಲ್ಟಾ ರೂಪಾಂತರಿಯ ಅಬ್ಬರ ತೀವ್ರಗೊಂಡಿದ್ದು, ದಿನಕ್ಕೆ ಲಕ್ಷ ದಷ್ಟು ಪ್ರಕರಣಗಳು ಪತ್ತೆಯಾಗುತ್ತಿವೆ. 24 ಲಕ್ಷ ಜನ ಸಂಖ್ಯೆಯಿರುವ ಆಸ್ಟಿನ್‌ ನಗರದಲ್ಲಿ ಈಗ ಖಾಲಿಯಿರುವುದು ಕೇವಲ 6 ಐಸಿಯು ಬೆಡ್‌ಗಳು. ಇದು ಪರಿಸ್ಥಿತಿಯ ಭೀಕರತೆಯನ್ನು ತೋರಿಸಿದೆ. ಇಲ್ಲಿನ ಪರಿಸ್ಥಿತಿ ಅತ್ಯಂತ ಗಂಭೀರವಾಗಿದೆ ಎಂದು ಅಧಿಕಾರಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ. ಇದೇ ವೇಳೆ, ಕೋವಿಡ್‌ ನಿಯಂತ್ರಣದಲ್ಲಿ ಅಮೆ ರಿಕವು ವಿಫ‌ಲವಾಗುತ್ತಿದೆ ಎಂದು ರಾಷ್ಟ್ರೀಯ ಆರೋಗ್ಯ ಸಂಸ್ಥೆ ನಿರ್ದೇಶಕ ಫ್ರಾನ್ಸಿಸ್‌ ಕೋಲಿನ್ಸ್‌ ಹೇಳಿದ್ದಾರೆ.