2 ಸಾವಿರ ಚಿನ್ನದ ನಾಣ್ಯಗಳ ಬಿಡುಗಡೆ

ಹರಾರೆ: ಜಿಂಬಾಬ್ವೆ ರಾಷ್ಟ್ರದ ಆರ್ಥಿಕ ಪರಿಸ್ಥಿತಿ ತೀವ್ರವಾಗಿ ಹದಗೆಟ್ಟಿರುವ ಕಾರಣ, ಅಲ್ಲಿನ ಸರ್ಕಾರ ಚಿನ್ನದ ನಾಣ್ಯಗಳನ್ನು ಟಂಕಿಸಿ, ಅವುಗಳನ್ನು ತನ್ನ ಜನರಿಗೆ ಮಾರಾಟ ಮಾಡಲು ಮುಂದಾಗಿದೆ. ಈ ಕುರಿತಂತೆ, ರಿಸರ್ವ್‌ ಬ್ಯಾಂಕ್‌ ಆಫ್ ಜಿಂಬಾಬ್ವೆ ಪ್ರಕಟಣೆ ಹೊರಡಿಸಿದೆ.

ಮೊದಲ ಹಂತದಲ್ಲಿ 2 ಸಾವಿರ ಚಿನ್ನದ ನಾಣ್ಯಗಳನ್ನು ಬಿಡುಗಡೆ ಮಾಡಲಾಗಿದೆ. ಮೌಲ್ಯ ಕಳೆದುಕೊಂಡಿರುವ ಜಿಂಬಾಬ್ವೆ ಕರೆನ್ಸಿಯ ಬಗ್ಗೆ ತನ್ನ ಜನರಲ್ಲಿ ನಂಬಿಕೆ ಮೂಡುವಂತೆ ಮಾಡಲು ಈ ಕ್ರಮಕ್ಕೆ ಮುಂದಾಗಿರುವುದಾಗಿ ಸರ್ಕಾರ ಹೇಳಿದೆ.

2008ರಿಂದಲೇ ಜಿಂಬಾಬ್ವೆಯ ಆರ್ಥಿಕ ಪರಿಸ್ಥಿತಿ ಪಾತಾಳಕ್ಕೆ ಕುಸಿದು ಅಲ್ಲಿನ ಕರೆನ್ಸಿಗೆ ಮೌಲ್ಯವಿಲ್ಲದಂತಾಗಿತ್ತು. ಇದರ ಪರಿಣಾಮ, ಸರ್ಕಾರದ ಬೊಕ್ಕಸ ಬರಿದಾಯಿತು.

ಹಾಗಾಗಿ, ಸರ್ಕಾರ ಅಲ್ಲಿನ ಬ್ಯಾಂಕುಗಳಲ್ಲಿದ್ದ ಜನರ ಹಣವನ್ನು ಮುಲಾಜಿಲ್ಲದೆ ಜಪ್ತಿ ಮಾಡಿ ತನ್ನ ವಶಕ್ಕೆ ತೆಗೆದುಕೊಂಡಿತ್ತು.