ಯುವರಾಜ್‌ ಸಿಂಗ್‌ಗೆ ಗೌರವ ಡಾಕ್ಟರೇಟ್‌

ಹೊಸದಿಲ್ಲಿ: ಭಾರತ ಕ್ರಿಕೆಟಿಗ ಯುವರಾಜ್‌ ಸಿಂಗ್‌ ಅವರಿಗೆ ಮಧ್ಯಪ್ರದೇಶದ ಗ್ವಾಲಿಯರ್‌ ಐಟಿಎಂ ತಾಂತ್ರಿಕ ವಿಶ್ವ ವಿದ್ಯಾನಿಲಯದಿಂದ ಗೌರವ ಡಾಕ್ಟರೇಟ್‌ ನೀಡಲಾಗಿದೆ. ಕ್ರಿಕೆಟಿಗೆ ನೀಡಿದ ಅಮೋಘ ಕೊಡುಗೆಗಾಗಿ ಡಾಕ್ಟರೇಟ್‌ಗೆ ಗೌರವಕ್ಕೆ ಅವರನ್ನು ಆಯ್ಕೆ ಮಾಡಲಾಗಿದೆ. ಯುವರಾಜ್‌ ಇದನ್ನು ಕೃತಜ್ಞತಾ ಪೂರ್ವಕವಾಗಿ ಸ್ವೀಕರಿಸಿದ್ದಾರೆ.

ಈ ವೇಳೆ ಮಾತಾಡಿದ ಯುವರಾಜ್‌, “ಡಾಕ್ಟರೇಟ್‌ ಗೌರವದಿಂದ ನನ್ನ ಮೇಲಿನ ಜವಾಬ್ದಾರಿ ಹೆಚ್ಚಾಗಿದೆ. ಇದನ್ನು ಪ್ರಾಮಾಣಿಕತೆಯಿಂದ ಸ್ವೀಕರಿಸುತ್ತಿದ್ದೇನೆ.  ಸಮಾಜಕ್ಕೆ ಮುಂದೆಯೂ ಮಾದರಿ ವ್ಯಕ್ತಿಯಾಗಿ ಇರುತ್ತೇನೆ’ ಎಂದರು. ಯುವರಾಜ್‌ ಸಿಂಗ್‌ 2011ರ ವಿಶ್ವಕಪ್‌ ಪ್ರಶಸ್ತಿ ಗೆಲುವಿನ ರೂವಾರಿಯಾಗಿದ್ದರು. ಆ ಬಳಿಕ ಯುವಿ ಮಾರಕ ಕ್ಯಾನ್ಸರ್‌ನಿಂದ ನರಳಿ ಪುನರ್ಜನ್ಮ ಪಡೆದು ಬಂದದ್ದು ಈಗ ಇತಿಹಾಸ.