KLE Technological University: ಮುರುಗೇಶ್‌ ನಿರಾಣಿ ಅವರಿಗೆ ಗೌರವ ಡಾಕ್ಟರೇಟ್ ಪ್ರದಾನ

ಹುಬ್ಬಳ್ಳಿ: ಮಾಜಿ ಸಚಿವ, ಉದ್ಯಮಿ‌ ಮುರುಗೇಶ ನಿರಾಣಿ ಅವರಿಗೆ ಕೆಎಲ್ಇ ತಾಂತ್ರಿಕ ವಿಶ್ವವಿದ್ಯಾಲಯದಿಂದ ಗೌರವ ಡಾಕ್ಟರೇಟ್ ನೀಡಿ‌ ಗೌರವಿಸಲಾಯಿತು.

ವಿವಿ 6ನೇ ಘಟಿಕೋತ್ಸವದಲ್ಲಿ ಉದ್ಯಮಿಗಳಾಗಿ ಮುರುಗೇಶ ನಿರಾಣಿ ಹಾಗೂ ಅರವಿಂದ ಮೆಳ್ಳಿಗೇರಿ‌ ಅವರಿಗೆ ಗೌರವ ಡಾಕ್ಟರೇಟ್ ನೀಡಲಾಯಿತು. ಮೆಳ್ಳಿಗೇರಿ ಅವರು ವಿದೇಶಕ್ಕೆ ತೆರಳಿದ್ದರಿಂದ ಅವರ ಅನುಪಸ್ಥಿಯಲ್ಲಿ‌ ಗೌರವ ಡಾಕ್ಟರೇಟ್ ಪ್ರದಾನ ಮಾಡಲಾಯಿತು.

ಗೌರವ ಡಾಕ್ಟರೇಟ್ ಸ್ವೀಕರಿಸಿ ಮಾತನಾಡಿದ ಮುರುಗೇಶ ನಿರಾಣಿ, ಬಿವಿಬಿ‌ ಕಾಲೇಜು‌ ವಿದ್ಯಾರ್ಥಿಯಾಗಿ‌ ಇದೇ ಕ್ಯಾಂಪಸ್ ನಲ್ಲಿ‌ ವ್ಯಾಸಂಗ ಮಾಡಿದ ದಿನಗಳನ್ನು‌ ಮೆಲುಕು ಹಾಕಿದರಲ್ಲದೆ, ನನ್ನದೇ ಕಾಲೇಜು‌ ಕ್ಯಾಂಪಸ್ ನಲ್ಲಿ‌ ಗೌರವ ಡಾಕ್ಟರೇಟ್ ನೀಡಿರುವುದು ಸಂತಸ ತರಿಸಿದೆ, ತವರು ಮನೆಯ ಉಡುಗೊರೆ ಇದಾಗಿದೆ ಎಂದರು.

ಕೆಎಲ್ಇ ಸಂಸ್ಥೆ ಬಾಗಲಕೋಟೆಯಲ್ಲಿ‌ ಶಿಕ್ಷಣ ಸಂಸ್ಥೆ ಆರಂಭಿಸಿದರೆ ಅಲ್ಲಿ ಐದು‌ ಎಕರೆ ಜಮೀನು ನೀಡುವುದಾಗಿ ಮುರುಗೇಶ್ ನಿರಾಣಿ ಘೋಷಣೆ ಮಾಡಿದರು.