ಯಕ್ಷಗಾನ ಹಿರಿಯ ಕಲಾವಿದ ಸತ್ಯ ಹೆಗಡೆ ಇನ್ನಿಲ್ಲ

ಹೊನ್ನಾವರ: ತಾಲೂಕಿನ ಹಡಿನಬಾಳದ ಯಕ್ಷಗಾನ ಹಿರಿಯ ಕಲಾವಿದ ಸತ್ಯ ಹೆಗಡೆ (88) ಗುರುವಾರ ನಿಧನರಾದರು. ಮೃತರು ಪತ್ನಿ, ಇಬ್ಬರು ಪುತ್ರರು, ಪುತ್ರಿಯರು ಹಾಗೂ ಅಪಾರ ಬಂಧು-ಬಳಗ, ಅಭಿಮಾನಿಗಳನ್ನು ಅಗಲಿದ್ದಾರೆ. ಯಕ್ಷಗಾನ ಕಲಾವಿದರಾಗಿ, 
ಸಂಘಟಕರಾಗಿ, ಗುಂಡಬಾಳ ಮೇಳದ ಯಜಮಾನರಾಗಿ 55 ವರ್ಷ ಸೇವೆ ಸಲ್ಲಿಸಿದ್ದರು.  ಪಾತ್ರದ ಔಚಿತ್ಯಕ್ಕೆ ತಕ್ಕ ಅಭಿನಯ, ಪ್ರಬುದ್ಧ ಮಾತುಗಾರಿಕೆ, ದಕ್ಷ ಆಡಳಿತ, ಕಟ್ಟುನಿಟ್ಟು, ಅಚ್ಚುಕಟ್ಟುತನದ ಮೂಲಕ ಪ್ರಸಿದ್ಧರಾಗಿದ್ದರು.

ಯಕ್ಷಗಾನ ಅಕಾಡಮಿ ಪ್ರಶಸ್ತಿ, ಕರಾವಳಿ ಯಕ್ಷಗಾನ ಸಮ್ಮೇಳನದ ಗೌರವ ಸೇರಿ ಅನೇಕ ಪ್ರಶಸ್ತಿ, ಸನ್ಮಾನಗಳಿಗೆ ಪಾತ್ರರಾಗಿದ್ದರು. ಅವರ ಕುರಿತು ಸತ್ಯ ಹೆಗಡೆ ಅಭಿನಂದನಾ ಗ್ರಂಥ, ಆತ್ಮಚರಿತ್ರೆ ಪುಸ್ತಕಗಳು ಪ್ರಕಟಗೊಂಡಿವೆ. ಯಕ್ಷಗಾನ ಕಲೆಯ ಖ್ಯಾತ ಹಿರಿಯ ಕಲಾವಿದ ಹಾಗೂ ಸಂಘಟಕರಾದ ಸತ್ಯ ಹೆಗಡೆ ಹಡಿನಬಾಳ ಅವರ ನಿಧನಕ್ಕೆ ಶಾಸಕ ಮಂಕಾಳ ವೈದ್ಯ, ಕೆರೆಮನೆ ಇಡಗುಂಜಿ ಯಕ್ಷಗಾನ ಮೇಳದ ಶಿವಾನಂದ ಹೆಗಡೆ ಸೇರಿ ಗಣ್ಯರು, ಅಪಾರ ಅಭಿಮಾನಿಗಳು ಸಂತಾಪ ವ್ಯಕ್ತಪಡಿಸಿದ್ದಾರೆ.