ಇತಿಹಾಸ ಸೃಷ್ಟಿ: ಕಾನೂನನ್ನೇ ಬದಲಿಸಿ ಸತತ 3ನೇ ಬಾರಿ ಚೀನಾ ಅಧ್ಯಕ್ಷರಾದ ಜಿನ್‌ಪಿಂಗ್‌

ಬೀಜಿಂಗ್‌: ಚೀನಾದ ಅತ್ಯಂತ ಪ್ರಭಾವಿ ರಾಜಕಾರಣಿ ಕ್ಷಿ ಜಿನ್‌ಪಿಂಗ್‌, ದೇಶದ ಇತಿಹಾಸದಲ್ಲೇ ಮೊದಲಬಾರಿಗೆ ಸತತ 3ನೇ ಬಾರಿ ಅಧ್ಯಕ್ಷ ಗಾದಿಗೆಯನ್ನೇರಿದ್ದಾರೆ. ರಬ್ಬರ್‌ ಸ್ಟಾಂಪ್‌ ಸಂಸತ್ತಾಗಿರುವ ನ್ಯಾಷನಲ್‌ ಪೀಪಲ್‌ ಕಾಂಗ್ರೆಸ್‌ನ 3 ಸಾವಿರ ಸದಸ್ಯರು ಮತ ಚಲಾಯಿಸುವ ಮೂಲಕ ಅವಿರೋಧವಾಗಿ ಕ್ಷಿ ಮತ್ತೆ ಅಧಿಕಾರ ಹಿಡಿದಿದ್ದಾರೆ.

ಮಾವೋ ಜೆಡಾಂಗ್‌ ಬಳಿಕ ದೇಶದ ಅತ್ಯಂತ ಪ್ರಭಾವಿ ರಾಜಕಾರಣಿ ಎನಿಸಿಕೊಂಡಿರುವ ಕ್ಷಿ, ಚೀನಾದಲ್ಲಿ ಅಧ್ಯಕ್ಷರಾಗಲು ಕೇವಲ 2 ಬಾರಿ ಅವಕಾಶವಿದ್ದ ಕಾನೂನನ್ನೇ ತಮ್ಮ ಅಧಿಕಾರ ಬಳಸಿಕೊಂಡು ಬದಲಿಸಿದ್ದ ವ್ಯಕ್ತಿ. ಈಗ ಮತ್ತೆ ಚೀನಾದ ಪಾರುಪತ್ಯ ಕ್ಸಿ ಕೈ ಸೇರುವ ಮೂಲಕ ಮತ್ತೆ ತಾನೊಬ್ಬ ಪ್ರಭಾವಿ ನಾಯಕ ಎಂಬುದನ್ನು ನಿರೂಪಿಸಿಕೊಂಡಿದ್ದಾರೆ..

ಪ್ರತಿಭಟನೆಗಳಿಗೂ ಕುಗ್ಗಲಿಲ್ಲ: ಚೀನಾದಲ್ಲಿ ಸರ್ವಾಧಿಕಾರಿಯಂತೆಯೇ ವರ್ತಿಸುವ ಕ್ಷಿ, ಲಾಕ್‌ಡೌನ್‌ನಿಂದಾಗಿ ಆದ ಸಾವುನೋವುಗಳು, ಜೀರೋ ಕೋವಿಡ್‌ ನಿಯಮಗಳಂತ ವಿಚಾರದಿಂದ ಜನರ ಪ್ರತಿರೋಧ ಎದುರಿಸಬೇಕಾಯಿತು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರತಿರೋಧ ಪ್ರತಿಧ್ವನಿಸಿದರೂ ಮತ್ತೆ 3ನೇ ಬಾರಿಗೆ ಅಧಿಕಾರಕ್ಕೇರಿದ್ದಾರೆ!

ಸೇನಾಬಲ ಹೆಚ್ಚಳ: ಭಾರತದೊಂದಿಗೆ ಗಡಿ ಬಿಕ್ಕಟ್ಟು ಎದುರಿಸುತ್ತಿರುವ ಚೀನಾ ಈಗಾಗಲೇ ತನ್ನ ಸೇನೆಯನ್ನು ಪ್ರಬಲಗೊಳಿಸುವ ಹಾಗೂ ಮೂಲಸೌಕರ್ಯಗಳನ್ನು ಹೆಚ್ಚಿಸುವ ಮೂಲಕ ಭಾರೀ ಕುತಂತ್ರಕ್ಕೆ ಸಿದ್ಧತೆ ನಡೆಸುತ್ತಿದೆ. ಈ ನಡುವೆ ಕ್ಷಿ ಆಯ್ಕೆಯು ಚೀನಾ ಸೇನೆಯನ್ನು ಮತ್ತಷ್ಟು ಪ್ರಬಲಗೊಳಿಸಲಿದೆ. ತೈವಾನ್‌ ಮೇಲಿನ ಚೀನಾ ಆಕ್ರಮಣ ಸಾಧ್ಯತೆಯನ್ನೂ ಅಲ್ಲಗೆಳೆಯುವಂತಿಲ್ಲ ಎನ್ನುವುದು ಹಲವರ ಅಭಿಪ್ರಾಯ.