ವಿಂಬಲ್ಡನ್‌ ಟೆನಿಸ್‌ ಕೂಟ : ಆ್ಯಶ್ಲಿ ಬಾರ್ಟಿ ಗೆಲುವಿನ ಓಟ

ಲಂಡನ್‌ : ಅಗ್ರ ಶ್ರೇಯಾಂಕದ ಆ್ಯಶ್ಲಿ ಬಾರ್ಟಿ ವಿಂಬಲ್ಡನ್‌ ಟೆನಿಸ್‌ ಕೂಟದ ಮೊದಲ ಸುತ್ತಿನಲ್ಲಿ ಕಠಿನ ಗೆಲುವು ದಾಖಲಿಸಿದ್ದಾರೆ.
ಕ್ಯಾನ್ಸರ್‌ ಗೆದ್ದ ಬಳಿಕ ಎರಡನೇ ಗ್ರ್ಯಾನ್‌ಸ್ಲಾಮ್‌ ಕೂಟ ಆಡುತ್ತಿರುವ ಸ್ಪೇನಿನ ಕಾರ್ಲಾ ಸೂರೆಜ್‌ ನವಾರೊ ಮೊದಲ ಸೆಟ್‌ 6-1 ಅಂತರದಿಂದ ಸೋತರೂ ಟ್ರೈ ಬೇಕರ್‌ಗೆ ಸಾಗಿದ ದ್ವಿತೀಯ ಸೆಟ್‌ನಲ್ಲಿ ಗೆಲುವು ಸಾಧಿಸುವ ಮೂಲಕ ಪ್ರಬಲ ಹೋರಾಟವೊಂದನ್ನು ಜಾರಿಯಲ್ಲಿರಿಸಿದರು. ಆದರೆ ನಿರ್ಣಾಯಕ ಸೆಟ್‌ನಲ್ಲಿ ಬಾರ್ಟಿ ಅವರ ಬಲಿಷ್ಠ ಸರ್ವ್‌ಗಳ ಮುಂದೆ ಸಂಪೂರ್ಣ ವಿಫ‌ಲರಾಗಿ ಶರಣಾದರು. ಬಾರ್ಟಿ ಗೆಲುವಿನ ಅಂತರ 6-1, 6-7(7-1), 6-1.

ಮತ್ತೂಂದು ಮಹಿಳಾ ಸಿಂಗಲ್ಸ್‌ ಪಂದ್ಯದಲ್ಲಿ ವೀನಸ್‌ ವಿಲಿಯಮ್ಸ್‌ ಮತ್ತು ಗೀಸ್‌ನ ಮರಿಯಾ ಸಕ್ಕರಿ ಗೆಲುವಿನ ಮುನ್ನಡೆ ಸಾಧಿಸಿದ್ದಾರೆ.

ವೀನಸ್‌ 7-5, 4-6, 6-3 ಅಂತರದಿಂದ ಬುಜರ್‌ನೆಸ್ಕೂ ಅವರನ್ನು ಮಣಿಸಿದರೆ, ಮರಿಯಾ ಸಕ್ಕರಿ ಅವರು ಅರಂಕ್ಸಾ ರುಸ್‌ ವಿರುದ್ಧ 6-1, 6-1 ನೇರ ಸೆಟ್‌ಗಳಿಂದ ಗೆದ್ದು ಬಂದರು.

ಇದನ್ನೂ ಓದಿ :ಸಾರ್ವಜನಿಕ ಸ್ಥಳದಲ್ಲಿ ಕಸ ಎಸೆದ ಪ್ರಕರಣ : ಮಾಜಿ ಕ್ರಿಕೆಟಿಗ ಅಜಯ್‌ ಜಡೇಜಗೆ 5 ಸಾವಿರ ದಂಡ

ಪ್ಲಿಸ್ಕೋವಾ ಮುನ್ನಡೆ
ಕ್ಯಾರೊಲಿನಾ ಪ್ಲಿಸ್ಕೋವಾ ಸ್ಲೊವೇನಿಯಾದ ತಮಾರ ಜಿದನ್ಸೆಕ್‌ ಅವರನ್ನು 7-5, 6-4 ಅಂತರದಿಂದ ಮಣಿಸಿ ಮುಂದಿನ ಹಂತಕ್ಕೆ ಲಗ್ಗೆ ಇರಿಸಿದ್ದಾರೆ.

ಜ್ವೆರೇವ್‌ ಗೆಲುವು
ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ 4ನೇ ಶ್ರೇಯಾಂಕದ ಅಲೆಕ್ಸಾಂಡರ್‌ ಜ್ವೆರೇವ್‌ ಶ್ರೇಯಾಂಕ ರಹಿತ ಆಟಗಾರನಾದ ಟಾಲನ್‌ ಗ್ರಿಕ್ಸ್‌ ಪೋರ್‌ ವಿರುದ್ಧ 6-3, 6-4, 6-1 ಅಂತರದ ನೇರ ಸೆಟ್‌ಗಳ ಸುಲಭ ಗೆಲುವು ಕಂಡಿದ್ದಾರೆ.