Radhika Kumaraswamy: ಭೈರಾದೇವಿ ಗೆದ್ದರಷ್ಟೇ ನಟನೆ ಮುಂದುವರಿಸುವೆ!: ರಾಧಿಕಾ

ರಾಧಿಕಾ ಕುಮಾರಸ್ವಾಮಿ (Radhika Kumaraswamy) ನಟನೆಯ ಭೈರಾದೇವಿ ಚಿತ್ರ (Bhairadevi Movie) ಅಕ್ಟೋಬರ್‌ 3ರಂದು ತೆರೆಕಾಣುತ್ತಿದೆ. ಇದು ಅವರ ಡ್ರೀಮ್‌ ಪ್ರಾಜೆಕ್ಟ್ ಕೂಡಾ. ಈ ಚಿತ್ರದ ಮೂಲಕ ರಾಧಿಕಾ ಒಂದು ನಿರ್ಧಾರಕ್ಕೆ ಬಂದಿರೆ. ಅದು ಮುಂದಿನ ನಟನೆಯ ಕುರಿತಾಗಿ. ಈ ಚಿತ್ರ ಜನರಿಗೆ ಇಷ್ಟವಾಗಿ ಕೈ ಹಿಡಿದರೆ ನಟನೆ ಮುಂದುವರೆಸಲು ಹಾಗೂ ಇಷ್ಟವಾಗದಿದ್ದರೆ ನಟನೆ ನಿಲ್ಲಿಸಲು.

ಇತ್ತೀಚೆಗೆ ಚಿತ್ರದ ಟ್ರೇಲರ್‌ ಬಿಡುಗಡೆಯಲ್ಲಿ ಈ ಕುರಿತು ರಾಧಿಕಾ ಮಾತನಾಡಿ, “ನಿರ್ದೇಶಕ ಶ್ರೀಜೈ ಅವರಿಗೆ ಮೊದಲೇ ಹೇಳಿದ್ದೆ, ಭೈರಾದೇವಿ ಸಿನಿಮಾ ಗೆದ್ದರೆ, ಪ್ರೇಕ್ಷಕರಿಗೆ ಇಷ್ಟ ಆದರೆ ಮತ್ತೆ ಸಿನಿಮಾ ಮಾಡುತ್ತೇನೆ. ಇಲ್ಲವಾದರೆ ಸಿನಿಮಾದಿಂದ ದೂರ ಇರುತ್ತೇನೆ. ಜೊತೆಗೆ ನಾನು ನಟಿಸಿರುವ ಕೊನೆ ಸಿನಿಮಾ ಇದಾಗಿರುತ್ತದೆ. ನನ್ನ ಮೇಲೆ ನಂಬಿಕೆ ಇಟ್ಟು, ಪ್ರೋತ್ಸಾಹ ಕೊಟ್ಟು, ನಿರ್ದೇಶಕರು ಈ ಸಿನಿಮಾ ಮಾಡಿಸಿದ್ದಾರೆ. ಇದು ದೊಡ್ಡ ಯಶಸ್ಸಾಗುತ್ತದೆ ಎಂಬ ನಂಬಿಕೆ ನನಗಿದೆ. ಚಿತ್ರದಲ್ಲಿ ರಮೇಶ್‌ ಅರವಿಂದ್‌ ಅವರು ಅದ್ಭುತ ಪಾತ್ರ ಮಾಡಿದ್ದಾರೆ. ಚಿತ್ರೀಕರಣದ ವೇಳೆ ಆ ಗೆಟಪ್‌ ಹಾಕಿದ ತಕ್ಷಣ ನನಗೆ ಬಹಳ ಸುಸ್ತಾಗುತ್ತಿತ್ತು. ನಡೆಯೋಕೆ, ಎದ್ದು ನಿಲ್ಲೋಕೂ ಆಗುತ್ತಿರಲಿಲ್ಲ. ಕೊನೆಗೆ ನಮ್ಮ ತಂಡದವರು ಅಲ್ಲೇ ಇದ್ದ ಒಂದು ದೇವಸ್ಥಾನಕ್ಕೆ ಕರೆದುಕೊಂಡು ಹೋಗಿ ದೃಷ್ಟಿ ತೆಗೆದರು. ಆ ನಂತರ ಚಿತ್ರೀಕರಣ ಶುರು ಮಾಡಿದೆವು’ ಎಂದು ತಮ್ಮ ಅನುಭವ ಹಂಚಿಕೊಂಡರು.

ಈಗಾಗಲೇ ಭೈರಾದೇವಿ ಚಿತ್ರದ ಟ್ರೇಲರ್‌ಗೆ ಉತ್ತಮ ಪ್ರತಿಕ್ರಿಯೆ ಬರುತ್ತಿವೆ. ರಮೇಶ್‌ ಅರವಿಂದ, ರವಿಶಂಕರ್‌, ಅನುಪ್ರಭಾಕರ್‌, ರಂಗಾಯಣ ರಘು ಮುಂತಾದವರು ಚಿತ್ರದಲ್ಲಿ ನಟಿಸಿದ್ದಾರೆ.