ಪತ್ನಿ ಚರಾಸ್ತಿಯಲ್ಲ, ಆಕೆಗೆ ಒತ್ತಡ ಹೇರುವಂತಿಲ್ಲ

ಹೊಸದಿಲ್ಲಿ: ಪತ್ನಿಯ ಇಷ್ಟಕ್ಕೆ ವಿರುದ್ಧವಾಗಿ ಆಕೆಯ ಜತೆ ವಾಸಿಸಲು ಸಾಧ್ಯವಿಲ್ಲ. ಏಕೆಂದರೆ ಆಕೆ ಚರಾಸ್ತಿ ಅಥವಾ ವಸ್ತುವಲ್ಲ ಎಂದು ಸುಪ್ರೀಂಕೋರ್ಟ್‌ ಅಭಿಪ್ರಾಯಪಟ್ಟಿದೆ. ಪತಿ ತನ್ನ ಜತೆಗೆ ಕ್ರೂರತನದಿಂದ ವರ್ತಿಸುತ್ತಿರುವುದರಿಂದ ವಿವಾಹ ವಿಚ್ಛೇದನ ಬೇಕು ಎಂಬ ಮಹಿಳೆಯೊಬ್ಬರ ಮನವಿಗೆ ಸಂಬಂಧಿಸಿದಂತೆ ನ್ಯಾ.ಎಂ.ಬಿ.ಲೋಕುರ್‌ ನೇತೃತ್ವದ ಪೀಠ ಈ ಅಭಿಪ್ರಾಯ ವ್ಯಕ್ತಪಡಿಸಿದೆ. ಆದರೆ ಪತಿ ಪತ್ನಿ ಜತೆಗೆ ವಾಸಿಸಲು ಸಿದ್ಧವೆಂದು ವಾದಿಸಿದ್ದ. ಈ ವಾದ ಕೇಳಿದ ನ್ಯಾಯಪೀಠ, ಪತ್ನಿಗೆ ಮನಸ್ಸಿಲ್ಲದೇ ಇರುವಾಗ ಒತ್ತಡ ಹೇರುವುದು ಸರಿಯಲ್ಲ. ನೀವೇಕೆ (ಪತಿ) ನಿರ್ಧಾರ ಬದಲಾಯಿಸಬಾರದು ಎಂದು ಪ್ರಶ್ನಿಸಿತು. ಆ.5ರಂದು ಪ್ರಕರಣದ ಮುಂದಿನ ವಿಚಾರಣೆ ನಡೆಯಲಿದೆ.