ನಾನೇಕೆ ಅಂಜಲಿ?

ನ್ಯೂಟನ್‌ ಚಿತ್ರ ಆಸ್ಕರ್‌ ಪ್ರಶಸ್ತಿಗೆ ಸ್ಪರ್ಧಿಸಲು ಆಯ್ಕೆಯಾದ ಬಳಿಕ ಚಿತ್ರದ ಹೀರೊ ರಾಜ್‌ಕುಮಾರ್‌ ರಾವ್‌ ದೇಶವಿಡೀ ಪರಿಚಿತರಾಗಿದ್ದಾರೆ. ಆದರೆ, ಚಿತ್ರದ ನಾಯಕಿ ಯಾರು ಎಂದು ಕೇಳಿದರೆ ಮಾತ್ರ ಉತ್ತರ ಸಿಗುವುದು ಕಷ್ಟ. 

ಅಂಜಲಿ ಪಾಟೀಲ್‌ ಎಂಬ ಅಪ್ಪಟ ಮಹಾರಾಷ್ಟ್ರೀಯನ್‌ ಹುಡುಗಿಯೇ ನ್ಯೂಟನ್‌ ನಾಯಕಿ. ಹಿಂದಿ, ತೆಲುಗು, ಮಲಯಾಳ, ಇಂಗ್ಲಿಶ್‌, ಮರಾಠಿ, ಕನ್ನಡ ಮಾತ್ರವಲ್ಲದೆ ಸಿಂಹಳ ಭಾಷೆಯಲ್ಲಿ ನಟಿಸಿ ಹಲವು ಅಂತಾರಾಷ್ಟ್ರೀಯ ಪ್ರಶಸ್ತಿಗಳನ್ನು ಪಡೆದಿದ್ದರೂ ಅಪರಿಚಿತಳಾಗಿಯೇ ಉಳಿದಿದ್ದಾಳೆ ಅಂಜಲಿ. ಥಳಕುಬಳುಕಿನ ಗ್ಲಾಮರಸ್‌ ನಾಯಕಿಯರಿಗೆ ಮಾತ್ರ ಮಾಧ್ಯಮಗಳು ಮಣೆ ಹಾಕುವುದರಿಂದ ಅಂಜಲಿಯಂತಹ ನೈಜ ಪ್ರತಿಭೆಗಳು ಬೆಳಕಿಗೆ ಬರುವುದಿಲ್ಲ. ಅವರ ಖ್ಯಾತಿ ಏನಿದ್ದರೂ ಕಲಾತ್ಮಕ ಚಿತ್ರಗಳಿಗೆ ಸೀಮಿತವಾಗಿರುತ್ತದೆ. ಡೆಲ್ಲಿ ಇನ್‌ ಎ ಡೇ ಎಂಬ ಕಿರುಚಿತ್ರದ ಮೂಲಕ ಬಣ್ಣದ ನಂಟು ಪ್ರಾರಂಭಿಸಿದ ಅಂಜಲಿ ಹಿಂದಿಯಲ್ಲಿ  ಗ್ರೀನ್‌ ಬ್ಯಾಂಗಲ್ಸ್‌ , ಚಕ್ರವ್ಯೂಹ್‌, ಶ್ರೀ, ಕಿಲ್‌ ದ ರೇಪಿಸ್ಟ್‌ , ಮಿಜ್ಯಾì, ನಿಮ್ಮೊ ಚಿತ್ರಗಳಲ್ಲಿ ನಟಿಸಿದ್ದಾಳೆ. ಈ ಪೈಕಿ ಅವಳಿಗೆ ಕಮರ್ಶಿಯಲ್‌ ಆಗಿ ತುಸು ಹೆಸರು ತಂದುಕೊಟ್ಟ ಚಿತ್ರ ಚಕ್ರವ್ಯೂಹ್‌. ಈ ಚಿತ್ರದಲ್ಲಿ ಆಕೆಯ ಅಭಿನಯವನ್ನು ನೋಡಿದ ನಿರ್ದೇಶಕ ರಾಕೇಶ್‌ ಓಂಪ್ರಕಾಶ್‌ ಕೂಡಲೇ ತನ್ನ ಮುಂದಿನ ಎರಡು ಚಿತ್ರಗಳಿಗೆ ಕಾಲ್‌ಶೀಟ್‌ ಪಡೆದುಕೊಂಡಿದ್ದರು. ಈ ಪೈಕಿ ಮೇರೆ ಪ್ಯಾರೇ ಪ್ರೈಮ್‌ ಮಿನಿಸ್ಟರ್‌ ಚಿತ್ರ ಮುಹೂರ್ತ ನೆರವೇರಿಸಿಕೊಂಡಿದೆ.

ಉಳಿದ ನಟಿಯರಂತೆ ಅಂಜಲಿ ಅಕಸ್ಮಾತ್‌ ಆಗಿ ಅಥವಾ ಮಾಡೆಲಿಂಗ್‌ ಕ್ಷೇತ್ರದಿಂದ ಬಡ್ತಿ ಪಡೆದುಕೊಂಡು ಹಿರಿತೆರೆಗೆ ಬಂದವಳಲ್ಲ. ಶಾಲೆಯಲ್ಲಿರುವಾಗಲೇ ತಾನು ನಟಿಯಾಗಬೇಕೆಂದು ತೀರ್ಮಾನಿಸಿ ಅದಕ್ಕೆ ಅಗತ್ಯವಿರುವ ಪೂರ್ವಸಿದ್ಧತೆ ಮಾಡಿಕೊಂಡೇ ಬಂದವಳು. ಮುಖ್ಯವಾಹಿನಿಯ ಸಿನೆಮಾಗಳಲ್ಲಿ ಮಿಂಚಲು ಸಾಧ್ಯವಾಗದಿದ್ದರೂ ಅವಳು ಅಂತಾರಾಷ್ಟ್ರೀಯವಾಗಿ ಗಮನ ಸೆಳೆದಿರುವುದಕ್ಕೆ ಆಕೆಗೆ ಸಂದಿರುವ ಹಲವು ಪ್ರತಿಷ್ಠಿತ         ಪ್ರಶಸ್ತಿಗಳೇ ಸಾಕ್ಷಿ.