ಗ್ಯಾಸ್‌ ಸಂಪರ್ಕ ಇರುವವರಿಗೂ ಸೀಮೆಎಣ್ಣೆ: ಸಚಿವ ಖಾದರ್‌

ಮಂಗಳೂರು: ರಾಜ್ಯದಲ್ಲಿ ನಗರ ಪ್ರದೇಶಗಳನ್ನು ಹೊರತು ಪಡಿಸಿ ಗ್ರಾಮಾಂತರ ಪ್ರದೇಶಗಳಲ್ಲಿ ಗ್ಯಾಸ್‌ ಹೊಂದಿರುವ ಪಡಿತರ ಚೀಟಿದಾರರಿಗೆ 1 ಲೀ. ಸೀಮೆಎಣ್ಣೆ ವಿತರಿಸಬೇಕೆಂಬ ಪ್ರಸ್ತಾವಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅನುಮೋದನೆ ನೀಡಿದ್ದಾರೆ ಎಂದು ಆಹಾರ ಮತ್ತು ನಾಗರಿಕ ಪೂರೈಕೆ ಖಾತೆ ಸಚಿವ ಯು.ಟಿ. ಖಾದರ್‌ ತಿಳಿಸಿದ್ದಾರೆ.

ಗ್ರಾಮಾಂತರ ಪ್ರದೇಶಗಳಲ್ಲಿ , ಅದರಲ್ಲೂ ಮುಖ್ಯವಾಗಿ ಮಲೆನಾಡು ಜಿಲ್ಲೆಗಳಲ್ಲಿ ಗ್ಯಾಸ್‌ ಇದ್ದವರಿಗೂ ಸೀಮೆಎಣ್ಣೆಯ ಆವಶ್ಯಕತೆ ಇರುವುದನ್ನು ಮನಗಂಡು ತಿಂಗಳಿಗೆ 1 ಲೀ. ಸೀಮೆಎಣ್ಣೆಯನ್ನಾದರೂ ವಿತರಿಸಲು ವ್ಯವಸ್ಥೆ ಆಗಬೇಕೆಂದು ಆಹಾರ ಇಲಾಖೆಯಿಂದ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿತ್ತು. ಈಗ ಅದನ್ನು ಮುಖ್ಯಮಂತ್ರಿ ಅನುಮೋದಿಸಿದ್ದಾರೆ. ಇದರಿಂದ ಬಹುಕಾಲದ ಬೇಡಿಕೆಯೊಂದು ಈಡೇರಿದಂತಾಗಿದೆ ಎಂದವರು ಗುರುವಾರ ಇಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. 

ಒಪ್ಪಿಗೆ ಪತ್ರ ಕೊಡಬೇಕು: ಗ್ಯಾಸ್‌ ಹೊಂದಿದವರು ಈ 1 ಲೀ. ಸೀಮೆ ಎಣ್ಣೆಯನ್ನು ಪಡೆಯಲು ಒಪ್ಪಿಗೆ ಪತ್ರವನ್ನು (ವಿಲ್ಲಿಂಗ್‌ನೆಸ್‌ ಲೆಟರ್‌) ಗ್ರಾ.ಪಂ.ಗೆ ಸಲ್ಲಿಸಬೇಕು. ಒಂದು ಬಾರಿ ಈ ಪತ್ರವನ್ನು ಕೊಟ್ಟರೆ ಸಾಕು ಎಂದು ಸಚಿವರು ತಿಳಿಸಿದರು.ಕೇಂದ್ರ ಸರಕಾರವು ಉಜ್ವಲ ಯೋಜನೆಯಡಿ ಸೀಮೆಎಣ್ಣೆ ಮುಕ್ತ ವಲಯ ಸೃಷ್ಟಿಸಬೇಕೆಂದು ಸಲಹೆ ನೀಡಿದೆ ಎಂದು ಅವರು ತಿಳಿಸಿದರು.