ಏನಿದು ಸ್ವಯಂ ಮದುವೆ? ಹೊರದೇಶಗಳಲ್ಲಿ ಈ ಟ್ರೆಂಡ್‌ ಹೇಗಿದೆ?

ಗುಜರಾತ್‌ನ ವಡೋದರದ ಯುವತಿ ಕ್ಷಮಾ ಬಿಂದು ದಿಢೀರನೇ ಸುದ್ದಿಯಲ್ಲಿದ್ದಾಳೆ. ತನಗೆ ತಾನೇ ವಿವಾಹವಾಗುವುದಾಗಿ ಹೇಳಿ ಎಲ್ಲರಲ್ಲೂ ಅಚ್ಚರಿ ಮೂಡಿಸಿದ್ದಾಳೆ. ಹಾಗಾದರೆ ಈ ಸೋಲೋಗಮಿ ವಿವಾಹವೆಂದರೇನು? ಹೊರದೇಶಗಳಲ್ಲಿ ಈ ಟ್ರೆಂಡ್‌ ಹೇಗಿದೆ? ಈ ಬಗ್ಗೆ ಒಂದು ಸೂಕ್ಷ್ಮ ನೋಟ ಇಲ್ಲಿದೆ…

ಸೋಲೋಗಮಿ ವಿವಾಹವೆಂದರೇನು?
ಸಾರ್ವಜನಿಕವಾಗಿ ತನ್ನನ್ನು ತಾನೇ ವಿವಾಹವಾಗುವುದಕ್ಕೆ ಸ್ವಯಂ ವಿವಾಹ ಅಥವಾ ಸೋಲೋಗಮಿ ಮದುವೆ ಎಂದು ಕರೆಯಲಾಗುತ್ತದೆ. ಆದರೆ ಈ ವಿವಾಹಗಳಿಗೆ ಕಾನೂನಿನ ಮಾನ್ಯತೆ ಇರುವುದಿಲ್ಲ. ಆದರೆ ಸಾಂಕೇತಿಕವಾಗಿ ವಿವಾಹ ಸಮಾರಂಭ ನಡೆಯುತ್ತದೆ ಅಷ್ಟೇ.’

ಆರಂಭಿಸಿದ್ದು ಯಾರು?
1993ರಲ್ಲಿ ಅಮೆರಿಕದ ದಂತ ಶುಚಿತ್ವ ತಜ್ಞೆ ಲಿಂಡಾ ಬೇಕರ್‌ ಎಂಬವರು ಸ್ವಯಂ ವಿವಾಹವಾಗಿದ್ದರು. ಇದನ್ನೇ ಜಗತ್ತಿನ ಮೊದಲ ಸೋಲೋಗಮಿ ವಿವಾಹವೆಂದು ಕರೆಯಲಾಗುತ್ತದೆ. ಈ ವಿವಾಹದಲ್ಲಿ ಸುಮಾರು 75 ಮಂದಿ ಭಾಗಿಯಾಗಿದ್ದರು.

ಡೈವೋರ್ಸ್‌ಗೆ ಅವಕಾಶವಿದೆಯೇ?
ವಿಚಿತ್ರವೆನಿಸಿದರೂ ಸತ್ಯ. ಈ ಸ್ವಯಂ ವಿವಾಹದಲ್ಲಿ ಡೈವೋರ್ಸ್‌ ಕೂಡ ಉಂಟು. ಕಳೆದ ವರ್ಷವಷ್ಟೇ ಬ್ರೆಜಿಲ್‌ನ ಮಾಡೆಲ್‌ ಕ್ರಿಸ್‌ ಗೆಲೆರಾ ಎಂಬಾಕೆ, ವಿವಾಹವಾದ 90 ದಿನಗಳ ಬಳಿಕ ತನಗೆ ತಾನೇ ಡೈವೋರ್ಸ್‌ ಕೊಟ್ಟುಕೊಂಡಿದ್ದಳು. ಏಕೆಂದರೆ ಈಕೆಗೆ ಒಬ್ಬ ಬಾಯ್‌ಫ್ರೆಂಡ್‌ ಸಿಕ್ಕಿದ್ದನಂತೆ.

ರೀತಿ ರಿವಾಜುಗಳಿವೆಯೇ?
ಈ ವಿವಾಹವನ್ನು ಇಂಥದ್ದೇ ರೀತಿಯಲ್ಲಿಯೇ ಆಗಬೇಕು ಎಂದೇನಿಲ್ಲ. ಆದರೂ ವಿವಾಹ ಸಂದರ್ಭದಲ್ಲಿ ಆಗುವ ಎಲ್ಲ ಸಂಪ್ರದಾಯಗಳನ್ನುಪಾಲಿಸುವುದಾಗಿ ಬಿಂದು ಹೇಳಿಕೊಂಡಿದ್ದಾಳೆ.